ERMIYAASI 19 - Qullaawa Maxaafa

HIIQQAMINO GAMBAYICHI LAWISHSHA

¹ Kaaliiqi, «Hadhe dora ganannohuwiinni gambayicho hidhi. Mannu giddonni jajjabba gashshaanonna albiidi qeesoota ledokki haadhe ha'ri.

² Hiiqqaqqamino bacci noo waalchi widoonni higge Hinoomi Lagichira gobbaanni fulte, ani kuleemmohere,

³ ‹Yihudu mootollanna Yerusaalamete manni! Kaaliiqi yaannore macciishshe; Israeelete Magani Olantote Mootichi Kaaliiqi: Macciishshihu baalu macca cu'mi'ranno bao kawiira abbeemmo.

⁴ Togo asseemmohuno ane agurtinoehuraatinna, konne darga allagga magannaha assitino daafiraati. Insa, annuwansanna Yihudu mootoolla egentinokki magannara kakkaltino. Konne dargano keeraanote mundee duntino.

⁵ Ani hede, coyi'renna hajaje egennoommokkiha ooso giirate shilqinshe Ba"aalira kakkallanniha kakkalote darga seekkitino.

⁶ Kunnira, konne darga Tofeetinna Hinoomi yaa agurre, Gorrote Dargaati yinanni yanna dagganno.

⁷ Konne darga Yihudunnihanna Yerusaalamete mala diigeemmo; diinnansa bagadunni shitannonsa gede asseemmo. Reeshshansano allaattetenna moyichoho eemmo.

⁸ Konne katamano diigame duunamanno gede asseemmo; hakkaanni hige sa"annohu baalu mase afoo cu'mi'ranno; ikkino coye lae maala'lanno.

⁹ Diinu katama doyisse amade shetisannonsa. Hatte yannara sagale hooggeenna mimmitinsa maala ittanno. Wole agurreenna oosonsa maala nafa ittanno› yite kuli» yiie.

¹⁰ Hakkunni gedensaanni gambayicho ledo'ya ha'ri manni albaanni hiiqqeemmo gede kulinoe.

¹¹ Hakkawoyintenni Olantote Mootichi, «Kuni doru uduunnichi layinkimeeshsho dhaawamannokkinte gede, konne mannanna konne katama hakko garinni hiiqqaqqeemmo; reeshsha madaadhitannowa hoogge massite Tofeeti madaadhitanno.

¹² Konne mannanna konne katama Tofeeti assummo gede asseemmo.

¹³ Yerusaalamennitinna Yihudu mootoolla minna, qolteno beeddahete hixaana giirranni minna, qalchuwanna kaphu magannara woyinete xajje fushshaate dunnanniwi baalu Tofeeti gede battaawinoha ikkanno» yii.

¹⁴ Anino Kaaliiqi himana kuleemmo gede soyinoe darginni Tofeetinni kae daye, Kaaliiqi mini nafara uurre mannaho,

¹⁵ «Israeelete Magani Olantote Mootichi, ani yeemmore macciishsha giwate haxo mokkookkitinona, ‹Kunni katamiranna qooxeessisira noo katammara, dagganno yee kuloommo bao abbeemmo› yiino» yoommo.