ERMIYAASI 17 - Qullaawa Maxaafa

YIHUDU MANNI CUBBONNA IILLINONSA QORICHA

¹ Kaaliiqi, «Yihudu manna! Cubbi'ne aani'nenni diho'lannoho. Kinchu aana borreessinoonnihu gede, wodani'neranna kakkalote buudda aana siwiilu kuulinni borreessamino.

² Manni'ne jajjabba haqqe hunda, gaarratenna ilaallate aana kakkalote darga seekki're Asheera magansi'ranno.

³ Baatto baalate aana loossinoonni cubbi daafira, noo'ne jironna jajja'ne baala diini'ne adhe ha'ranno gede asseemmo.

⁴ Hanqo'ya giirate gede bushshitine xoannokkiha assitinoonni daafira, iqqoommo'ne baatto hoogginanni gedenna egentinoonnikki gobba hadhine diini'nera soqqantinanni gede asseemmo'ne» yii.

MAASSONNA RUMO

⁵ Kaaliiqi, «Ane agure manna irki'rannohunna, mannu wolqa hexxannohu rumaminoho.

⁶ Hattoo manchi, noori nookkiwa, maxinete baattora, moola gobbara fulino citi gedeeho. Mitturino qinaannosiri dihee'ranno.

⁷ «Ane Kaaliiqa hexxannohunna, ane hawaqi're hee'rannohu maassaminoho.

⁸ Isi wayi gama kaanseenna, rumushsho wayi widira diriirsidhino haqqicho gedeeho. Tini haqqicho wo'manka woyite latte heedhanno daafira, arrishshu yannarano diyaaddanno; xeenu nookki yannarano ruxxi yitukkinni laaltanno.

⁹ Mannu wodani baalunkurinni roore xagaraamoho; diinofayyannoho; giddosireno afannohu dino.

¹⁰ «Ani Kaaliiqi kayinni, mannaho ha'rinshosinna qaafosi garinni loosisita aate, mannunniha wodananna, hedosi baala fonqole laeemmo.

¹¹ Hanaaqunni jiro gamba assi'rannohu, wolete quuphe hanqafidhe, dadhitanno heeyyakko gedeeho» yaanno. Gamba assi'rino jiro, taalootu dirisinni iso agurte hadhanno; goofimarchohono gowwimmasi xawo fultanno.

¹² Kaaliiqa, Qullaawu Minikki noo dargi, hundunni kayise, ayirrado ilaalu aana noo barcimaati.

¹³ Kaaliiqa! Ati Israeelete hexxooti; ate agurtannori baalu saalfattanno. Heeshshote buicho ikkoottoha ate Kaaliiqa agurtannori, bukote aana borreessinoonni su'mi gede ikkite ba'anno.

ERMIYAASI KAALIIQI GATISANNOSI GEDE HUUCCI'RI

¹⁴ Kaaliiqa! Hureemmona, hursie; galaxxeemmohu ate ikkootto daafira, keere hee'reemmo gede, gatisie.

¹⁵ Kune, «Kaaliiqi yii coyi hiikkiyya? Hanni xa ikkossiyya?» yitannoe.

¹⁶ Ikkollana Kaaliiqa'ya, allaalaasinchonsa ikke atera soqqamoommo; ani yoommore baala ati egennoottona, qoomama abbattonsara yee dicoyi'roommo.

¹⁷ Qarru barra ati golo'yaatina, waajjishshootie.

¹⁸ Shorritannoere irraawisi; ane kayinni saalunni gatisie. Insa hembeelsi; ane kayinni masillunni agarie; insa maniidha geeshsha marro marro higge gani.

FOOLIISHSHOTE BARRA AYIRRINSANNI GARA

¹⁹ Kaaliiqi, «Yihudu mootoolla e'annowanna fultannowa Mannu Waalchira marte uurri. Qolteno wole Yerusaalamete waalchuwara marte uurrite,

²⁰ tenne waalchuwa widoonni higgine e'inannirira, Yihudu mootoollaranna manna baalaho, qolteno tenne waalchuwa hige eannohura Yerusaalamete manni baalunkura,

²¹ Kaaliiqi, ‹Fooliishshote Barra mittoreno dukkinannikki gedenna Yerusaalamete waalchuwa widoonni qoltine abbitinannikki gede qorophe!

²² Minna'nenni Fooliishshote Barra duha dukkine fultinoonte. Fooliishshote Barra mittoreno loossinoonte. Akaakka'nera kuloommo garinni konne barra qullaawa assitine agadhe!

²³ Akaakka'ne kayinni yoommota dimacciishshitino; maccansano diqoltino. Haxo mokkookkite macciishshanna yoommo gede ikka gibbino.

²⁴ « ‹Ani Kaaliiqi yoommota macciishshitinanniha ikkiro, Fooliishshote Barra mittoreno dukkine katamu waalchuwa widoonni higgine sa'inoonte. Fooliishshote Barra qullaawa asse ikkinnina hakko barra mittoreno loossinoonte.

²⁵ Yoommo gede ikkitiniro, mootoolla Daawiti sirchinni fultanno. Ledonsa gashshaanono katamu waalchuwa widoonni higge sa'anno. Mootoollanna ledonsa gashshaano faradi gaarensanna faradonsa guluffeenna, Yihudunna Yerusaalamete manni dukkisannonsa. Yerusaalamete katamino wo'manka woyite mannu hee'rannoha ikkanno.

²⁶ Mannu Yihudu katammanninna Yerusaalamete qarqarinni, Biiniyaami gobbanni, galchimi gaari hundinni, gaarratenninna wodiidi Yihudinni shilqote kakkalo, gidu fushshaate, hixaananna Qullaawu Minira galatu kakkalo haa're abbanno.

²⁷ Fooliishshote Barra mitore dukkine Yerusaalamete waalchuwa widoonni higgine sa'inanni qullaawa assitine agara giwatenni yoommore huntiniro kayinni, Yerusaalamete waalchuwara xo'annokki giira soyemmo. Yerusaalamenniti gashshootu minna giirantanno; xoyissannohuno dihee'ranno› yoommo» yii.