ERMIYAASI 16 - Qullaawa Maxaafa

ERMIYAASI HEESHSHO SOKKASI LABBANNO

¹ Kaaliiqi,

² «Konne darga galte adhitooti; oosono iltooti.

³ Konne darga ilantino oosora, amuwinsaranna annuwinsara daanno coye kuleemmohena macciishshi.

⁴ Bushu dhibbinni reyitanno; wi'lannonsahunna madaarannonsahu dihee'ranno. Reeshshinsa ishinu gede xawoho duunamanno; olunna hude guddannonsa. Reeshshinsa moyichohonna allaattete sagale ikkanno.

⁵ «Ermiyaasi, macciishshi! Wi'late minira hadhooti; aye daafirano manchittooti. Kunni ka'a manni'yara keere dieemmo; bagamannokkiha baxille'yanna maaro'ya ho'leemmonsa.

⁶ Tenne baattora noohu buxichuno dureessuno reyanno. Wi'lannonsahunna madaarannonsahu dihee'ranno; xissiisi're baqqaalla bici'rannohunna umo meexxannohu dihee'rannonsa.

⁷ Shii'rinoha sheshifachishate sagale qishe abbannohu dihee'rannonsa. Annanna ama shii'rinoha nafa sheshifachishannoha dianfanni.

⁸ «Insa ledo itatenna agate jilu minira martooti.

⁹ Ani Israeelete Magani Olantote Mootichi yeemmoti: Ki'ne ille affanna konne darga hagiirrunna qeexaalu, adhatenna adhamate ililleette diheedhanno.

¹⁰ «Konne coye kulattonsa yannara, ‹Maganinke Kaaliiqi konne busha kaajjado coye mayira hedinke? Ma sao assinummo? Ma cubbo loonsummo?› yite xa'mitannohe.

¹¹ Atino, ‹Kaaliiqi akaakka'ne anera badhe wodhite kaphu maganna magansidhanni insara soqqantino; aneno agurtino; seera'yano diagadhitino.

¹² Ki'neno akaakka'nenni roore bushshinoonni. Baalunku hettisamaanonna haxawarroota ikkitinoonni. Ani yoommotano gibbinoonni.

¹³ Kunni daafira, ki'ne tenne gobbanni fushshe ki'nenna akaakka'ne affinoonnikki gobba qole shorreemmo'ne. Hakkiicho hashshanna barra kaphu maganna magansidhinanni. Anino horonta dimaareemmo'ne› yiino yite kulinsa» yiinoe.

¹⁴ Kaaliiqi qole, «Ikkirono, ‹Israeelete manna Gibitsete gobbanni fushshihu Heeshshote Kaaliiqi lao!› yine xaarrannikki barri daanno.

¹⁵ Hatto yaa agurre akaakkansara oommo gobba qoleemmonsa daafira, ‹Israeelete manna aliyyenninna billaallisinonsa gobba baalatenni fushshinohu Heeshshote Kaaliiqi lao!› yinanni» yii.

¹⁶ «Xa kayinni qulxu'me woshshaandannihu gede woshshaaddannorennna moyicho ugaanxannihu gede assite ugaaxxannore soyemmo. Insano ilaallatenna gaarrate, hattono kinnate giddo noo goddara ugaaxxe amaddannonsa.

¹⁷ Assitannore baala afeemmo; insano alba'yaanni no; cubbinsano ille'yanni digo'lanno.

¹⁸ Baatto'ya lubbo afidhinokki misillanni batteessitinohuranna umi'yara doodhoommo baattora battete maganna wonshitino daafira, gatisammonsara albaanni, 2 ero qorichisheemmonsa» yii.

KAALIIQI ADDAXXINANNIHO

¹⁹ Kaaliiqa, ati jawaante'yaatinna golo'yaati; ati qarru barra maaxameemmowaati. Gobba baalantenni gosa atewa shiqqe, «Akaakkankera kaphu maganna agurranna noonsari dino; misilla baalanti mittoreno dikaa'litannoreeti» yitanno.

²⁰ Mannu umisira magano kalaqi're afannoni? Ee dandaannona, hattilla kayinni mullicho misileeti.

²¹ Kaaliiqi, «Kunnira, manna baalaho wolqa'yanna roorre'ya egensiiseemmo; hakkunni gedensaanni ani Kaaliiqa ikkoommota affanno» yii.