ERMIYAASI 14 - Qullaawa Maxaafa

SHETISSANNO MOOLLE

¹ Xeena ganikkinni lowo yanna keeshshe hee'reenna, Kaaliiqi mannaho,

² «Yihudu wi'lanno; katammasino mooltanno; mannisino dadille baattote aana diriiranno; Yerusaalamete katamino kaa'lote raaranno.

³ Mootoolla soqqamaanonsa waa dirritara kofamma sokkanno; shiima waano hoogge ora'e, mulla gambayibba adhite higganno.

⁴ Xeenu hoogino daafira, baatto moolte dhodhookkanno; loosidhannorino tultaabbe, umo heeshshi yitanno.

⁵ Dubbu gaarraanchi nafa itannore hooge, xaalla qalaminoha qallosi mullawa hune ha'ranno.

⁶ Gobba harreno ittannore hoogge, mullichu gaari aana uurrite, yeedaalate gede he'litanno; ittannore hooggeenna, illensa giddora ba'anno yite kuli» yiie.

KAALIIQI MANNI HUUCCATTO

⁷ Bati'ru cubbinke hasanni noonkeha nafa ikkiro, su'mikkira yite gatisinke; lowo yanna atewiinni fanfe keeshshinoommo; ate aanano sao assinoommo.

⁸ Ati Israeelete hexxo ikkoottohu, qarru yannara gatisattonkehu, baattonkera wosinchonna, hashsha calla gale ha'ranno doogaasinchi gede mayira ikkitto?

⁹ Gara hawino manchi gedenna, kaa'lara dandaannokki olamaanchi gede mayira ikkitto? Kaaliiqa! Ati ledonke noottona, ninkeno mannakkiitina agurtootinke.

KAALIIQI QOLINO DAWARO

¹⁰ Manna'ya! Ki'ne foortinoonni; umo'ne ittisi'ra dihasidhinoonni. Kunnira ani giweemmo'ne; cubbo'ne qaage qorichisheemmo'ne.

KAPHU HIMANAANO

¹¹ Kaaliiqi, «Kunni mannira danchare assammora huuccitootie.

¹² Qatunte huuccidheenna nafa dimacciishsheemmonsa. Shilqote kakkalonna gidu fushshaate uyiteennaeno diadheemmo; roorenka insa olunni, hudetenninna dhibbunni gudeemmo» yiie.

¹³ Anino qole, «Mooticha'ya Kaaliiqa! Himanaano mannaho, ‹Oluno hudeno diheedhanno› yite kultanno. ‹Halaalinta ani gobba'nera hegere keere eemmo'ne› yiino yitanno» yoommo.

¹⁴ Hakkunni gedensaanni Kaaliiqi, «Himanaano ane su'minni kapho coyidhanno. Ani kayinni disoommonsa; mittoreno dicoyi'roommonsa. Himaninsa mullicho haaqeeti. Tidhitinokki masaalootinna uminsa qalooti ikkinnina anewiinni fultinota di"ikkitino.

¹⁵ Ani soyummokkinni, ‹Gobbankera oluno hudeno diheedhanno› yitanno himanaano, ani Kaaliiqi olunninna hudetenni gooffanno gede asseemmo.

¹⁶ Insa himana coyidhanno mannano olunna hude guddanno. Reeshshinsano Yerusaalamete dooggara diriiranno; madaarannonsahuno dihee'ranno. Kuni coyi meentinsa, oosonsanna seenninsa aana ikkanno. Saonsa deerrinni malinonsa qoricha adhitanno» yee dawari.

¹⁷ Kaaliiqi anera leellannoere mare kuleemmonsa gede soyinoe. Anino, «Manni'ya lowo geeshsha madi'rino daafira, hashshanna barra ille'yanni hindiiddo lolakku.

¹⁸ Xawo fuleemmo woyite reyino manni reeshsha afeemmo; katama e"eemmo woyiteno hude guddanni noo manna laeemmo; himanaanonna qeesootu kayinni ikkinore affannokkiha, loosonsa loosidhanno» yee kuloommonsa.

MANNU KAALIIQIWA HIGE WOXARATI

¹⁹ Yihuda co'onta giwittoni? Tsiyooni manna tiyyi'rittoni? Ka'neemmokki gede assite, mayira gawajjittonke? Keere afi'neemmo yine hexxinoommo; kayinnilla mittono dancha coye diafi'noommo; hurreemmo yine hexxinoommo; ikkollana yaaddo callalla lexxitinonke.

²⁰ Kaaliiqa, ninke ate aana sao assinoommo; kunnira, ninkehanna akaakkanke cubbo ifaaxxineemmo.

²¹ Su'mikki daafira yite mishshootinke; ayirrado barcimakkino shollishshooti. Ninke ledo eootto gondooro qaagi; diiggooti.

²² Dagate maganna mittuno xeena dirrisse diaffanno; gorduno umisinni shora dishoranno. Kaaliiqa Maganonke, konne baala assa dandaattohu ate ikkootto daafira, ninke ate hexxineemmo.