ERMIYAASI 10 - Qullaawa Maxaafa

KAPHU MAGANNA MAGANSI'RA DIBA'RAASSANNO

¹ Kaaliiqi, «Ki'ne Israeelete manni macciishshe!

² Wole daga hadhanno doogo hadhinoonte; insa affe egentinokkire, gordu iima affanno woyite, waajjite huxi'ra rosonsaati. Ki'ne kayinni konne coye affine waajjitinoonte.

³ Kaphu magano magansidhanno daga hadhanno doogo haafaho; haqqe dubbunni karranni; angate ogimma afi'rinohu qottotenni boce seekkanno.

⁴ Birrunninna culkunni biifisanno; ubbannokki gede misimaaretenni wiqqi asse aguranno.

⁵ Togoo misilla baaqulu giddo qansoonni kankichi gedeereeti; coyi'ra didandiitanno; ha'rano dandiitannokki daafira, mannu duhannonsa. Danchano bushano assite affannokki daafira, horonta hakkore waajjitinoonte» yii.

ERMIYAASI KAALIIQA GALATI

⁶ Kaaliiqa'ya, ate gedeehu dino; ati wolqaataamoho; su'mikkino jawahonna waajjinanniho.

⁷ Gobba baalate moote ikkoottoha, ate waajjannokkihu ayeti? Uullate egennaamminna, gashshaano baalate giddo ate gedeehu dinona, ayirrinyu hasiisannohe.

⁸ Baalunku gowwootahonna hawanyootaho; haqqa bonce seekkinoonni maganna mittoreno dirosiissanno.

⁹ Misillansa, Terseesinni dayino birrinni seekkinoonni; Ufaazinni dayino culka, aanaho xallinoonnireeti; hayyoole seekkite biifissino; ogeeyye gantinota bulenna duume uddano uddisiinsannireeti.

¹⁰ Kaaliiqa, ati kayinni halaalanya Maganooti; ati heeshshote Maganooti; hegere Mooteeti. Ati hanqatto woyite kalqe baala huxidhanno; gobbate gashshaano ate hanqo uurrisa didandiitanno.

¹¹ Atino, «Gordonna baatto kalaqqinokkiri kaphunniti maganna'ne baattote aaninni ba'anno yite kulinsa» yoottoe.

¹² Kaaliiqa ati, wolqakkinni baatto kalaqootto; egennokkinni kalqe xintootto; afakkinni gordo diriirsootto.

¹³ Ati hajajatto yannara gordoho noo wayibba luultanno; baattote qaccennino gomicho gamba assite abbatto; xeenu yannarano banqo beleqqanno gede assatto; bubbeno maaxoottowiinni fushshatto.

¹⁴ Kaphu maganna seekkidhannori, gowwootahonna balalootaho. Tini kaphunniti magannansa, lubbo afidhinokki daafira, insa seekkidhuri saalfattanno.

¹⁵ Tini maganna mullare ikkitino daafira, minshe hunnanni; ati Kaaliiqi qorichishattonsara daatto yannara ba'anno.

¹⁶ Ati baalankare kalaqoottohu, Israeelete Magani kayinni, insa gedeeha di"ikkootto. Israeelete manna umikki manna assidhe doodhootto; su'mikkino Olantote Mootichaati.

YIHUDU MANNI DARAMARA KAI

¹⁷ Anino Yihudu mannira, «Diinu doyisse noo'nena uduunne'ne gamba assidhe.

¹⁸ Kaaliiqi umisi tenne baattonni fushshe hunanno'neti yanna iillitino; mittuno gattinikkinni cancane hunanno'ne» yiino yee kuloommonsa.

¹⁹ Mannuno qole, «Lowo geeshsha madi'noommona ninkera bayisibao! Madanke hurtannokkita ikkitinohura, reyate mule hee'noommo. Hurreemmo yineno dihexxineemmo.

²⁰ Dukkannanke diigantu; bedeendanni siibba baalano tatta'u; oosonke ninkewiinni baxxite hadhinohura, galagalche dukkannanke qasannohunna, dukko dukkannohu mittu nafa dino» yitu.

²¹ Anino, «Gashshaanonke hawanyoota allaalaasineeti; Kaaliiqi mala dihasidhino; qiniinonsakkihunna manninke billaallinohuno kunni daafiraati.

²² Kune bushu duduwi dayinona macciishshe! Aliyyehu diinu gashshooti, Yihudu katamma diige mulla darga asseenna, yeedaala galtannowa ikkitino» yoommo.

ERMIYAASI HUUCCATTO

²³ Kaaliiqa'ya, mannu heeshsho angasi nookkitanna, ha'rinshosino mannu umisi qineessi're dandaannokkita afoommo.

²⁴ Kaaliiqa, ati taashshattoha ikkootto daafira seejjinke; ikkollana co'o yine ba'neemmona, hanqite heedhe seejjitootinke.

²⁵ Hanqokki ate egentinokki daganna, ate magansidhannokkiri aana dirrisi. Insa mannakki guddino; ninke baalanaka co'o assite gudde, baattonke mulla assitino.