EJJEETTO 16 - Qullaawa Maxaafa

SAMISONI GAAZAHO

¹ Mitto barra Samisoni Gaaza ha'ri. Hakkiichono mitte gursumeette afe galara isewa ei.

² Gaaza mannino Samisoni katama einota afe doyisse, hashsha wo'ma katamu xullichira gaa'le agari. Soodanno woyite shitara yite hashsha sammi yite galtu.

³ Samisonino goxinowiinni hashshu mereerira kae, katamu xullichi cufana haa're, lamenka waalchono waawannate ledo buqqi asse fushshi. Hakkunni gedensaanni, qoteho wodhe Kebiroonira albaanni noo ilaali aana masse huni.

SAMISONINNA DALIILA

⁴ Hakkunni gedensaanni, Samisoni Soreeqi yinanni lagira heedhannota mitte Daliila yinanni mancho lae baxi.

⁵ Filisxeemete jajjabbi isewa marte, «Ninke mittu mittunku 1,100 kinchu birra uyineemmohena, iso usurre angankera qo'lineemmo gede aanasi noo wolqa maminni afi'rinotero dogisiisse xa'minke» yituse.

⁶ Daliilano Samisoni, «Tenne wolqa hiikkiinni afi'roottoronna, usurrihero fulte afattokkihu hiissineennaatiro kulie ballo» yitusi.

⁷ Samisonino, «7 shamu sunchinni usuriero wolqa diafi'reemmo; wolu manni gedeeha ikkeemmo» yiise.

⁸ Hakkunni gedensaanni, Filisxeemete roorrooti 7 shama suncho haadhe abbitu. Daliilano Samisoni usurtu.

⁹ Holgeenni manna maaxxe worte, «Samisoni, Filisxeemootu dagguhe!» yitusi. Samisoni kayinni giira ittino fatilchi gede asse sunna tattayise tugi. Tenne wolqa maminni afi'rinoro afate didandiitino.

¹⁰ Daliila Samisoni, «Dogoottoe; halaale dikuloottoe. Ate hiitto assine usura dandiinanniro ballo kulie» yitusi.

¹¹ Isino, «Haaro siiwonni usurriero, wolqa diafi'reemmo; wolu manni gedeeha ikkeemmo» yiise.

¹² Daliilano, haaro siibba haadhe Samisoni usurte xaano holgeenni manna maaxxe worte, «Samisoni, Filisxeemootu dagguhe!» yite cancitu. Isi kayinni cigilesi usurroonni siibba fatilchu gede asse tattayisi.

¹³ Xaano Daliila Samisoni, «Xaa geeshsha balalsitanni noottoe; halaale dikuloottoe. Eeggatena ate hiitto assine usurranniro kulie» yitusi. Isino daware, «Lamalanta umi'ya guduro meqeerrite cifichoho usurittaro wolqa diafi'reemmo; wolu manni gedeeha ikkeemmo» yiise.

¹⁴ Samisoni goxissuhe gedensaanni, lamalanta gudurosi meqeerrite cifichoho usurtu. Hakkunni gedensaanni, «Samisoni, Filisxeemootu dagguhe!» yite cancitu. Samisonino goxichunni baqqi yee, cifichoho gannoonnita gudurosi buqqi asse fushshi.

¹⁵ Daliila, «Wodanikki anewiinni fafe hee'reenna mayira, ‹Baxeemmohe› yaattoe? Doggannae tini disayikkite? Tenne wolqa hiikkiinni afi'roottoro dikuloottoe» yitusi.

¹⁶ Kunni garinni uurranna ofolla ho'lite reyo halchanno gede assitusi.

¹⁷ Isino shete, «Ama'ya godowinni fulummonkunni Maganoho baxxoommoha ikkoommohura umo meende diegenninoonnie. Umo'ya meendiro kayinni wolqa'ya anewiinni ba'eenna wolu manni gedeeha ikkeemmo» yiise.

¹⁸ Daliilano halaale coyi'rinota affe, «Halaale coyi'rinona amme!» yite sokkeenna Filisxeemete roorrooti woxe haadhe galagalte daggu.

¹⁹ Daliila Samisoni giwoodise aana goxisse, mitto mancho woshshite lamalanta umisi guduro meedisiissu; wolqasi ba'ino daafira usurte,

²⁰ «Samisoni, Filisxeemootu dagguhe!» yitu. Samisonino goxichunni baqqi yee, albi gede ikke tayise fuleemmo yee hedi. Kaaliiqi agurinosita kayinni diafino.

²¹ Hakkunni gedensaanni Filisxeemootu dagge amaddusi. Illesino giddonni fushshite Gaaza haadhe hadhusi; camote cagaagenni usurte usuru mine gide daahanno gede assitusi.

²² Meendihu gedensaanni umisi dananchi galagale lophi.

SAMISONI REYO

²³ Hatte yannara Filisxeemete gashshaano, «Maganinke Daagooni, diinanke Samisoni angankera sayise uyinonke» yite maganinsara Daagoonira jawa kakkalo shiqishshara gamba yitu.

^24-25 Lowo geeshsha tashshi yiinonsa daafira, «Albankeenni godo'lanni ososhshiishonkena Samisoni woshshenke» yitu. Isono usuru mininni fushshite abbite hagiirsiisannonsa gede, tuuqqate mereero uurrissu. Mannuno gamba yee Samisoni la"anni, «Baattonke gudinoha, lowoha mannanke shiinoha, diinanke maganinke angara sayise uyinonke» yee maganonsa guwisi.

²⁶ Lamu tuuqi qarra uurrissusita massaganni noosi beetto, «Irki'reemmona ballo mine amaddino tuuqqawa shiqqi assie» yii.

²⁷ Hatte yannara meya labbaahu mine wo'me no. Filisxeemete gashshaano baalantino hakkiicho no. Samisoni godo'le la"ara shiqinohu 3,000 ikkanno meentinna labballi minu aana seekkinoonni darga no.

²⁸ Samisoni Kaaliiqa, «Kaaliiqa Mooticha'ya ballo qaagie; ba'ino ille'ya daafira Filisxeemoota rabbisi'reemmona Magano'ya ballo mitte higge calla jawaachishie» yee huucci'ri.

²⁹ Hakkunni gedensaanni, mine amadde noore 2 mereeri tuuqqa mitto guracho anganni layinkiha qiniitichotenni amade,

³⁰ «Filisxeemootu ledo mitteenni reemmo» yee hede noosi wolqanni xiiwita, minu mootoollatenna giddo noo manni baalunku aana toi. Lubbotenni hee're shiinonkunni, reyanni shiino manni kiiro roortu.

³¹ Roduuwisinna ayiddisi marte reeshshasi haadhe abbite, annisi Maanuhe moogi noowa Tsorianna Eshitaooli mereero madaartusi. Samisoni Israeele 20 diro gashshino.