EFESOONI SOKKA 6 - Qullaawa Maxaafa

OOSONNA ILTINONSA ANNANNA AMA

¹ Ooso! Mootichu Yesuusire ikkitinoonnihura, anni'neranna ama'nera hajajamme. Kuni hasiisanno coyeti.

² «Annakkinna amakki ayirrisi!» yitannoti hexxo giddo afi'rate umi hajajooti.

³ Hatto assittoro, «Baalunku coyi seyannohe; baattote aana dirikkino seedanno» yaanno.

⁴ Ki'ne annuwa! Ooso'ne Mootichu amaalenni seejjitinanni lossensa ikkinnina, caacceessitinoontensa.

BOROJJENNA BIILLA

⁵ Borojje! Uullate aana biilla ikkitino'nerira Kiristoosira soqqantinanni gede ikkitine, taalu wodaninni waajjatenninna ayirrinyunni hajajammensa.

⁶ Maganu hedo wonshannohu Kiristoosi borojji gede ikkinnina, manna hagiirsiisate yitine leellamate soqqansho soqqantinoonte.

⁷ Mannaho ikkikkinni Mootichaho soqqamannohu gede, mootoolle'nera hisattine soqqamme.

⁸ Borojjichono ikko, mootichano ikko, assannohura danchu coyi baalaho Mootichu daafurisi guma aannosita affinoonni.

⁹ Ki'ne mootoolleno, borojji'nera hatto assensa. Mannu alba lae godowa hosannokkihu insanna ki'ne Mootichi iima gordoho noota qaagginanni hatto asse.

MAGANUNNIHA OLU BAGADO

¹⁰ Hakkiinni sa'uta, Mootichunninna jawa wolqasinni jawaattine heedhe.

¹¹ Sheexaanu xagarro ittisa dandiitinanni gede, Maganunniha olu bagado baala uddidhe.

¹² Ninke oli mannu ledo ikkikkinni, tenne tunsichu yannara bushuullu gordu gobbara noo wolqaataammi ledo, gashshaanote ledo, roorrootu ledonna bushuullu gordunna baattote mereero noo ayyaanna ledooti.

¹³ Kunnira, busha barra diina ittissinihunna qeeltinihu gedensaannino kaajjitine uurra dandiitinanni gede, Maganunniha olu bagado baala uddidhe.

¹⁴ Halli'nera halaale sinnaaru gede qodhitine, keeraanchimma gagasu uddano olunnite gede assitine uddidhine,

¹⁵ keerunniha Hagiirru Duduwo kulate qixxaawo lekka'nera koattimma wodhe.

¹⁶ Kunni baalu aleenni, giirate gede wala yaannoha bushu koottalo baala hunate kaa'litannota ammanate wonqo wonqidhe.

¹⁷ Gatonnita siwiilu gullee umoho wodhe; Qullaawu Ayyaani bise ikkinoha Maganu qaale suxxe.

¹⁸ Wo'manka woyite hasiisanno coyi baalaho, Qullaawu Ayyaaninni huuccidhe. Hakko garinni qullaawu manni baalahono jaattine huuccensa.

¹⁹ Qoleno Danchu Duduwiha go'lino coye ruxxi yuummokkinni coyi'rate, hasiisino qaale aannoe gede anerano huucce"e.

²⁰ Xaano kune usurame noommohu Danchu Duduwi afoo ikkoommohuraati. Konne coye waajjummokkinni coyi'reemmo gede Magano huucce"e.

JEEFOTE KEERE

²¹ Baxaminohu rodiinkenna Mootichaho ammanamino soqqamaanchi Tikiqoosi, ani noommo garanna assanni noommore baala kulanno'ne.

²² Iso ki'newa soyate kaima ikkino coyi, ninke hee'noommo gara kulanno'nenna ki'neno jawaachishanno'ne gedeeti.

²³ Maganu Annunna Mootichu Yesuusi Kiristoosi keerinna baxillu ammanate ledo ki'ne roduuwu ledo hee'ro.

²⁴ Agurtukkinni Mootichanke Yesuusa Kiristoosa baxxannori baalu ledo elto heedho. Hamii'ni!