EFESOONI SOKKA 5 - Qullaawa Maxaafa

XAWAABBU GIDDO HEE'RA

¹ Maganu baxanno ooso ikkitinoonnihura, iso labbe.

² Kiristoosi baxinonkenna Maganoho tanni yite su'niitanno kakkalo asse umosi ninke daafira sayise uyinonte gede, ki'neno baxillunni heedhe.

³ Qullaawu mannira hasiisannokkiha ikkinohura foorre woy saalimale ikkito woy busha yortoha ikka agurina, mereero'ne togoohu duduwu nafa horonta hee'roonke.

⁴ Maganoho galata aa agurranna, saalu coyi woy balallete hasaawi woy afimala haariimo heedhoonke. Hattoo coyi ki'nera xaado diafi'rinoho.

⁵ Foorannohu, woy saalsiisanno coye assannohu, woy hafuuraamu (hattoo manchi kaphu magano magansi'ranno), Kiristoosinna Maganu Gashshootira dargu hee'rannosikkita affe.

⁶ Kunninni kainohunni hajajamannokki manni aana Maganu hanqi daanno daafira, ayino kaphu coyinni dogoonke'ne.

⁷ Kunni daafira, hattoo manni ledo xaadu hee'roonke'ne.

⁸ Ki'ne alba tunsichoho heedhinoonni; xa kayinni Mootichunni heedhinoonni. Kunnira, xawaabbu giddo hee'ranno manni gede ikkitine heedhe.

⁹ Xawaabbu addi addi danchumma, keeraanchimmanna halaale baala laalanno.

¹⁰ Mooticha hagiirsiisanno coyi maatiro buuxxine affe.

¹¹ Guma afi'rinokkihu tunsichu loosi ledo namoontinoonte; hatteentenni xawo fushshe.

¹² Hattoo manni maaxe assanno coye xawoho hasaawa nafa saalfachishshanno.

¹³ Baalunku coyi xawaabbunniwa fulanno woyite, halaalaanchu danisi xawe leellanno.

¹⁴ Xawaabbu baalanka coye xawise leellishanno. Kunnira: «Ati goxxe noottohu baqqi yii! Reyotennino kai! Kiristoosi xawisannohena» yinoonni.

¹⁵ Kunnira, hiitto ikkitine hee'ra hasiissanno'nero seekkitine affe. Egennaammu gede ikkinnina gowwootu gede ikkitine heedhinoonte.

¹⁶ Kuni diri bushahona, afidhinoonni yanna baalate giddo dancha looso loosse.

¹⁷ Mootichu hedo maatiro wodanche ikkinnina, gowwoota ikkitinoonte.

¹⁸ Huntanno'nena woyinete xajje aggine dimbitinoonte. Hatteentenni Qullaawu Ayyaani wo'mo'ne.

¹⁹ Faarsotenni, guwishshunninna ayyaanaame geewonni ki'ne ki'neneewa hasaabbe. Mooticha wodani'nenni guwissinanni faarse.

²⁰ Wo'manka woyite baalunku coyira Mootichinke Yesuusi Kiristoosi su'minni Magano Annanke galattesi.

MINAANNANNA MINAAMA

²¹ Kiristoosi ayirrinyira yitine mimmiti'nera hajajantinannire ikke.

²² Minu amuuwa! Mootichu Yesuusira hajajantinanni gede, minaanni'nerano hajajantinannire ikke.

²³ Kiristoosi bisosi ikkitinotera beetekiristaanete umoho. Qoleno Gatisaanchoseeti. Hattonni minaanni minaamara umoho.

²⁴ Beetekiristaane Kiristoosira hajajantannonte gede, mini amuuwino baalunku coyinni minaanninsara hajajamannore ikko.

²⁵ Minaannuwa! Kiristoosi beetekiristaane baxinonna isera umosi sayise uyinonte gede, ki'neno mini amuuwa'ne hakko garinni baxxe.

²⁶ Kiristoosi hatto assinohu beetekiristaane qullaawa assara hasi'reeti. Keereensannohuno qaalisi widoonni qole wayinni hayishsheeti.

²⁷ Xuru woy alba kolishshi'ra, woy hattoohu wolu bushu coyi aanase hee'rikkinni, qullaawanna arrasso nookki gaamaara asse umisiwa shiqishara yeeti.

²⁸ Minaannuwano uminsa manninate baxxanno garinni, mininsa amuuwano baxa hasiissannonsa. Minaamasi baxannohu umosi baxannoho.

²⁹ Kiristoosi beetekiristaanete assannonte gede, mannimmasi itisannotanna towatannota ikkinnina, mannimmasi giwannohu horonta dino.

³⁰ Ninkeno Kiristoosi bisooti.

³¹ «Kunnira, mannu annasinna amasi agure, galtesi ledo mitto ikkanno; lamunku mitto biso ikkitanno» yine borreessinoonni.

³² Kuni lowo geeshsha go'le noo halaaleeti. Hatto yeemmo woyite, Kiristoosirenna beetekiristaanennire coyi'reemmo.

³³ Kuni coyi ki'nerano hasiisannoho: Mittu mittunku galtesi umisi gede asse baxo. Galteno minaannase ayirrisso.