EFESOONI SOKKA 2 - Qullaawa Maxaafa

KIRISTOOSINNI REYOTENNI KAE HEESHSHO AFI'RA

¹ Ki'ne sao'nenninna cubbi'nenni kainohunni alba reyitinoonnireeti.

² Hakka waro tenne gobba bunshe ha'runsitinanni heedhinoonni. Iima bubbete aana heedhanno durriissara roorricha ikkinohura hajajantinanni heedhinoonni. Hakku ayyaani xa Maganoho hajajantannokkire gashshanno.

³ Ninke baalunku hakko manni gede halchonkenna hedonke garinni maalu yorto wonshinanni hee'noommo. Wolu manni gede kalaqaminkenni Maganu hanqi giddo hee'noommo.

⁴ Ikkollana maarote dureessa ikkinohu Maganu lowo geeshsha baxannonke daafira,

⁵ saonkenni kainohunni reyine hee'neenna, Kiristoosi ledo heeshsho uyinonke. Ki'neno gattinoonnihu eltosinniiti.

⁶ Maganu Kiristoosi Yesuusi ledo reyotenni kayise gordu gobbara isi ledo worinonke.

⁷ Hatto assinohuno, dagganno yanna baalate Kiristoosi Yesuusi widoonni qole xawisinonke shaqqillinni uyinonketa dannu nookki eltosi leellishankera yeeti.

⁸ Ki'ne gattinoonnihuno amma'nate widoonni eltosinniiti. Kunino Maganu mulla uyino'ne ba'raa'raati ikkinnina, ki'nenni di"ikkino.

⁹ Loosunni afi'nannita di"ikkitinona, ayino naaxxoonke.

¹⁰ Maganu Kiristoosi Yesuusi widoonni qole xa hee'noommo gedeere asse kalaqinonkehu, balaxe qixxeessinoha dancha looso loonseemmo gedeeti.

KIRISTOOSINNI AFI'NANNI MITTIMMA

¹¹ Ki'ne ilama'nenni alba daga ikkitine heedhinoonniri, Ayihude mannu anga barcimansanni naaxxitanni ki'ne, «Barcimtinoonnikkiri» yitanno'neta qaagge!

¹² Hatte yannara Kiristoosire affinikkinni, Israeelete qansichimma hooggine, hexxote gondoorirano wosi'nitine hexxo nookki gobbara Maganono afidhinikkinni heedhinoonnita qaagge.

¹³ Ki'ne bashsho faffine heedhinoonni. Xa kayinni Kiristoosa Yesuusa amma'nitine mundeesinni gamba yitinoonni.

¹⁴ Badinonkeha gibbote gammala maalisinni diige, Ayihudenna Daga mitto assinohu Kiristoosi keerenkeeti.

¹⁵ Lamenta gosa xaadise umisinni mitto haaro manna assara, Ayihudete Seeranna wogansa moofise keere kalaqino.

¹⁶ Masiqalu aana reyasinni diinooma hunino. Kunni masiqalinni lamenka mitto biso asse Maganu ledo araarsino.

¹⁷ Daye kae, ki'ne faffine heedhinoonniriranna gamba yite noorira keerunniha Dancha Duduwo kulino'ne.

¹⁸ Isi loosinni ninke baalunku mittu Qullaawu Ayyaani widoonni hinge Annunniwa ea dandiinoommo.

¹⁹ Ki'ne Dagano Maganu manni ledo gobbate ayiddeetinna Maganu fiixaati ikkinnina, wosinanna manni gobba manna di"ikkitinoonni.

²⁰ Soqqamaasinetenna himanaanote safo aana xintantinoonni. Qaru dhaawate kinchi Kiristoosa Yesuusaati.

²¹ Minu gudisame isinni xaade Mootichaho Qullaawa Mine ikkate lophanno.

²² Ki'neno Maganu Ayyaanunni galanno mine ikkate isinni minantinanni.