DAANIEELI 2 - Qullaawa Maxaafa

NABUKADANATSOORITA UMI HAAQEE

¹ Nabukadanatsoori moohihunni layinki diro haaqee haaqii'ri. Tenne haaqee haaqii'rihu gedensaanni goxano gibbusi.

² Kunni daafira haaqeesi tirate kiilaano, bitaamma, gojaammanna masaalaano isiwa dagganno gede hajaji. Insano dagge albasiinni uurrituta,

³ moote, «Mitte haaqee haaqii'roommo; tenne haaqee tiro maatiro afa hoogoommo daafira lowo geeshsha shetoommo» yiinsa.

⁴ Insano, «Moote hegerera hee'ro! Hanni haaqeekki maatiro kulteennanke ninkeno tirose kulleemmohe» yite Sooriyu afiinni dawartusi.

⁵ Mooteno, «Umo assitine maricho haaqii'roommoro affine, haaqeete tirono maatiro kulle"e. Hakkunni ka'a kayinni anga'nenna lekka'ne murranni gedenna mine'ne diinge duuno assinanni gede maloommo.

⁶ Haaqee tironte ledo kula dandiitiniro kayinni, ba'raa'ranna afansha lowo ayirrinyi ledo afidhinanni gede asseemmona rakkine haaqee tironte ledo kulle"e» yiinsa.

⁷ Insano qolte, «Mootenke! Ninke tiro kulleemmohena, haaqeekki maatiro kulinke» yitusi.

⁸ Moote daware, «Ani hedoommore soorreemmokkita affinoonni daafira yanna keeshshiishate assitinanni heedhinoonnita afoommo.

⁹ Haaqee'ya tiro kula hoogginiero kayinni baalunkura mittu gari qorichi iillanno'ne. Ane coyi'rinore soorranno yitine kapho coyi'ratenni yanna seedisi'rate heddinoonni. Kunnira haaqee kultiniero ise tiro qarrissanno'nekkita kunninni anfanni» yiinsa.

¹⁰ Masaalaanono, «Mootenke! Ati afattora hasi'ratto coye kulahera dandaanno mancho tenne gobba aana dianfanni. Mitte moote aye geeshshano jawanna wolqaataamo ikkiro nafa togoo xa'mo kiilaanote, bitaammahonna masaalaanote shiqishe diegennino.

¹¹ Mootenke! Tenne xa'moottonketera kaajjado xa'mora dawaro maganna qolturo ikkinnina wolu qola didandaanno. Maganna qolte kawiicho mannu mereero heedhannota di"ikkitino» yitusi.

¹² Hatte yannara moote lowo geeshsha hanqe Baabilooni heedhanno hayyoole baala shinanni gede hajaji.

¹³ Hayyoole shinara fultino hajajora Daanieelinna miillasino ledo shinanni gede hajajino.

MAGANU DAANIEELIRA HAAQEETE TIRO LEELLISHISI

¹⁴ Tenne hajajo wonshara worroonnihu Ariyooki yinannihu mootete agaraasinera hajajaanchoho. Kunnira, Daanieeli isiwa mare hayyotenni hasaawisanni,

¹⁵ «Moote tenne kaajjado hajajo mayira fushshi?» yee xa'misi. Ariyookino baalanka coye Daanieelira xawise kulisi.

¹⁶ Daanieeli hakkawoyintenni e"e haaqee tirate shiima yanna uyinannisi gede moote huucci'ri.

¹⁷ Hakkunni gedensaanni Daanieeli minisira mare ikkito baala miillasira Hanaaniyara, Mishaeeliranna Azaariyira kulinsa.

¹⁸ Insano wolootu Baabilooni hayyoole ledo shinanninsakki gede, gordu Magani marare maaxamino coye xawisansara huuccidhanno gede qaagiissinsa.

¹⁹ Hakko hashsha maaxamino coyi Daanieelira ajuujatenni leellisi. Kunnira Daanieeli gordu Magano galaxxanni:

²⁰ «Maganu egennaamohonna wolqaataamoho! Kunnira, hegere hegerera galattesi.

²¹ Isi yannanna wogga soorranno; mootoolla moohisanno; qoleno mootimmate aaninni dirrisanno. Egenno egennaammaho, hayyo wodanchitannorira aannohuno isooti.

²² Isi murgo ikke maaxaminohanna, go'lino coye leellishanno. Isiwa wo'manka woyite xawaabbu noo daafira, tunsichoho maaxaminore afanno.

²³ Akaakka'ya Magano ikkoottoha, ate galaxxeemmohe; ayirrisi'reemmohe. Ati egennonna wolqa oottoe; huuccatto'ya macciishshite, mootete haaqeete tiro kuloottoe» yii.

DAANIEELI HAAQEE TIRONTE LEDO MOOTETE KULI

²⁴ Hakkunni gedensaanni Daanieeli Baabilooni hayyoole shaanno gede moote hajajinosihuwa Ariyookiwa mare, «Baabilooni hayyoole shitootina ane mootenniwa shiqishsheennae haaqeete tiro kuleemmosi» yii.

²⁵ Ariyooki hakkawoyintenni Daanieeli haa're moote Nabukadanatsoori albira masse, «Moote'ya! Haaqeekki tiro kulannoheha qafadamino manni Yihudunnihu giddonni mitto mancho afoommo» yii.

²⁶ Mooteno Bilxaasoori yinanniha Daanieeli, «Haaqii'roommo haaqee tironte ledo kulattoera dandaatto?» yee xa'misi.

²⁷ Daanieelino, «Moote'ya! Xa'moottoha go'lino coye hayyoole, bitaammu, kiilaanonna masaalaano kultahera didandiitanno.

²⁸ Ikkollana go'lino coye baala leellishanno Magani gordoho no. Isi kunni ka'ira ikkanno coye baala atera leellishinohe. Goxxe heedhe haaqii'rootto haaqeenna wodanikki giddo noo ajuuja kuneeti:

²⁹ «Moote'ya! Ati goxxe heedhe kunni ka'a ikkanno coye heddanni nootto. Hatte yannara go'lino coye leellishanno Magani kunni ka'a ikkanno coye kulinohe.

³⁰ Kuni go'lino coyi anera leellinoehu ani wolu manninni roore egennaamo ikkoommohura di"ikkino. Ikkollana ati haaqeete tiro afatto gedenna wodanikki giddo kawanna ka'a higganni noo hedo wodancha dandaatto gedeeti.

³¹ «Moote'ya! Lowo geeshsha xabbannotanna bilicci yitanni la"ate waajjishshannota jawa misile albakkiinni uurrite noota ajuujatenni afootto.

³² Misilete umo danchu culkinni, gagasonna anga birrunni, godowanna giwooda camotenni,

³³ mogolla siwiilunni, lekka gama darate siwiilunni gama darate dorunni seekkinoonni.

³⁴ Ati misile la'anni heedheenna lowo kinchi mannu kisikkinni gongo'me dirre, siwiilunninna dorunni seekkinoonni misile lekka gane hiiqqaqqino.

³⁵ Siwiilu, doru, camo, birrunna culku baalu hakkawoyintenni cancaname arri yannara ayiddummete aana hee'ranno kuri gede ikkino. Isono bubbe dagge mittoreno gatissukkinni fiite haadhe hadhino. Misilete aana uwi kinchi kayinni baatto baala wo'manni mimmitu aana duunamanni lowo ilaala ikkino.

³⁶ «Kuneeti haaqee tenneeti; haaqeete tirono xa kuleemmohe:

³⁷ Moote'ya! Ati baalanka roorattohonna mootoollate mooteeti. Gordu Magani gashshootenna wolqa, jawaantenna ayirrinye uyinohe.

³⁸ Baatto baala gashshattoha assinohe; mannaho, saadatenna ceate aana roorre uyinohe. Culku umino ateeti.

³⁹ Atera gedensaanni ate gashshooti geeshsha jawaatinokkihu shiimu gashshooti ka"anno. Hakkunni gedensaanni sayikkihu baatto baala gashshannohu camote lawishshi gashshooti ka"anno.

⁴⁰ Galagaleno baalanka coye hiiqqaqqannohunna butu assannohu siwiilu gede kaajjinohu shoolki gashshooti ka"anno. Siwiilu baalanka coye hiiqqaqqe maniissannonte gede, isino isira albaanni gashshitino mootoolla baala hiiqqaqqe maniissanno.

⁴¹ Lekkanna lekkate qubbe gama darate siwiilunni, gama darate dorunni seekkinoonnita laootto. Kuni hakko gashshooti lamewa beehaminota leellishanno. Doru ledo karsamino siwiila laittonte gede, hakku gashshootino gamu siwiilu gede kaajjinoha ikkanno.

⁴² Lekkate qubbe gamu darati siwiila, gamu darati dora ikkinonte gede, hakku gashshootino gamu darati jawaata, gamu darati wolqiweelo ikkanno.

⁴³ Doru ledo karsamino siwiila laittonte gede, lamunku gashshooti manni mimmitu ledo adhame karsamanno. Ikkirono, siwiilu bushshu ledo mitto ikkannokkinte gede insano mitto ikka didandiitanno.

⁴⁴ Hatte mootoolla yannara gordu Magani horonta diigamannokkihanna wole daga uggitannokki gashshoote uurrisanno. Kuni wole gashshoote baala co'o asse hunanno. Isi kayinni hegarera kaajje hee'ranno.

⁴⁵ Mannu anga kissukkinni ilaalu aaninni gongo'me dirre siwiilunni, camotenni, dorunni, birrunninna culkunni seekkinoonni misile cancani kinchi hakko gashshooteeti. Kunni garinni jawu Magani albillittete ikkara noore baala leellishinohe. Kune haaqeekki halaaleho; tiroseno garaho» yee dawari.

MOOTE DAANIEELIRA AFANSHA UYISI

⁴⁶ Hakkunni gedensaanni moote Nabukadanatsoori gombisame albunni baatto kise Daanieelira ayirrinye uyi. Kakkalonna hixaanu fushshaate shiqinshannisi gedeno hajaji.

⁴⁷ Moote Daanieelira, «Ate Magani maganna baala rooreho; mootoolla baalate mootichaati; go'lino coye baala leellishara dandaannoho. Konne jawa go'lino coyeno leellisha dandoottohu kunniraati» yiisi.

⁴⁸ Hakkunni gedensaanni moote Daanieeli jawa ayirrado darga worisi. Lowo afanshano uyisi; Baabilooni gashshootira gashshaancho assisi; mootete amaalaasine baalate sooreessa assisi.

⁴⁹ Daanieeli kuleenna Sidiraaqi, Misaaqinna Abidinaago Baabilooni awuraajjira gashshaano asse shoominsa. Daanieeli kayinni mootete mininni fafikkinni hee'ri.