AMOOTSI 7 - Qullaawa Maxaafa

KANCHAFARU DAA LEELLISHSHANNO AJUUJA

¹ Mootichu Kaaliiqi tenne ajuuja leellishinoe. Kuneeti Maganu, mootete gide murrihu gedensaanni fultino gobba-bae giddo kanchafaru qalamanno gede assino.

² Kanchafaru baattote aana fulinoricho baala sholoole itanna afe, «Mooticha Kaaliiqa'ya! Eeggatena mannikki sao aguri. Mannikki Israeele shiima ikkitino daafira hiitto ikkite gata dandiitanno?» yee huucci'roommo.

³ Kaaliiqino marare hedinota agure, «Kuni laitto coyi di"ikkanno» yiinoe.

GIIRA DAGGANNOTA LEELLISHSHANNO AJUUJA

⁴ Mootichu Kaaliiqi leellishinoeti wole ajuuja aante noote: Kuneeti Kaaliiqi mannasi giiratenni qorichishara qixxaawanna afoommo. Giirano baattote woroonni nooha lowo baara mooshshite baattono ittu.

⁵ Hatte yannara ani, «Mooticha Kaaliiqa'ya! Eeggatena ballo tenne giira uurrisi. Mannikki Israeele shiima ikkitino daafira hiitto ikkite gata dandiitanno?» yee huucci'roommo.

⁶ Kaaliiqino marare hedinota agure, «Kuni coyino di"ikkanno» yiinoe.

TUMBETE AJUUJA

⁷ Mootichu wole ajuujano leellishinoe. Kuneeti Mootichu tumbetenni dhaambe huxxinoonni huxxi mule uurre nooha afoommo. Isi anga tumbe amade no.

⁸ Qoleno, «Amootsi! Maricho la'anni nootto?» yee xa'minoe. Anino, «Tumbe la"anni noommo» yoommo. Kaaliiqino, «Manni'ya Israeele taashshine huxxinoonnikki huxxi gede ikke shokkinota tenne tumbenni leellisheemmo. Kunni ka'a insa qorichisha diagureemmo.

⁹ «Yisihaaqi sirchi magansi'ranno gaari diigamanno; Israeelennihu qullaawu darginsa onanno; Iyorbiaami maateno bagadu gudanno» yii.

AMOOTSINNA AMESIYAASI

¹⁰ Beeteli kakkalo shiqishannohu Amesiyaasi Israeelete mootera Iyorbiaamira, «Kuneeti Amootsi Israeelete manni giddo hee're atera gano gananni no; isi coyi'ranno coyi gobba hunannoho.

¹¹ Qoleno, ‹Iyorbiaami jaddote reyo reyanno; Israeelete mannino, ilamino gobbanni qafadame ha'ranno› yaanni no» yitanno sokka soyi.

¹² Amesiyaasi Amootsi, «Ati ajuujaanchu! Xaate kunni ka'a ikkinohe! Hasi'rittoro galagalte gobbakki Yihuda hadhe himana hakko coyi'ri; insa itissohena.

¹³ Beeteli kayinni moote magansi'ranno darganna Qullaawa Mine ikkinohura layinkita kawiicho himana coyidhooti» yiisi.

¹⁴ Amootsino, «Ani saada allaaleemmohonna odahete laalo xinqi'reemmoho ikkinnina himanaancho woy himanaanote widiha di"ikkoommo.

¹⁵ Ikkollana ge'reewo allaaleemmowiinni haa're, ‹Hadhe, manni'yara Israeelete himana kuli› yee hajajinoehu Kaaliiqaati.

¹⁶ Xaano Kaaliiqi yaanno coye macciishshi. « ‹Ati, Israeelete mannira himana coyidhooti; Yisihaaqi sircho ikkitinorira Israeelete mannira qaale kultooti› yite hooloottoe.

¹⁷ «Kunnira Kaaliiqi ate Amesiyaasi, ‹Galtekki katamaho foortannota ikkitanno; oosokkino olu giddo reyitanno. baattokkino allaggu siiwotenni bikke beeqqanno; atino Magano affinokki gosa giddo reyatto. Israeelete mannino addinta qafadame, gobbansanni fule wolewa ha'ranno› yiinohe» yee dawari.