AMOOTSI 1 - Qullaawa Maxaafa

¹ Ooziya yinanni moote Yihudaho, Yoaasi beetti Iyorbiaami qole Israeelete moohi waro, Teqoa Katamira ge'reewo allaa'litannori giddonni mittu Amootsi, baatto milli yitara 2 diri gate hee'reenna Kaaliiqi Israeelete manni daafira kulinosi sokka kunninni aante noote.

² Amootsi, «Kaaliiqi Tsiyooni Ilaalira hee're, ittananno doobbiichi gede ikke rooddanno. Qoonqosi Yerusaalametenni beleqqanno; allaalaasine saada hosiisidhannowi moolanno; Qermeloosi Ilaali aana noo hayisso qoortanno» yii.

KAALIIQI ISRAEELETE OLLIIRA ABBANNO QORICHA Sooriya

³ Kaaliiqi, «Demaasiqote Katami manna, marro marro hige loosino cubbi daafira, huluullo nookkiha qorichisheemmo. Insa Geleaadi manna umoho waa gantukkinni meeddino.

⁴ Moote Azaheeli mootimma minira giira qaseemmo. Moote Benihadaadi seekki'rino qiisho baala giireemmo.

⁵ Demaasiqote Katami huxxi cufanna baala hiiqqaqqeemmo. Aweeni Lagichira hee'ranno manna shorreemmo. Gashshaanchonsano Beeti-Edeninni huneemmo. Sooriyu mannino Qiiri yinanni gobba qafadame ha'ranno» yii.

FILISXEEME

⁶ Kaaliiqi, «Gaaza manna marro marro hige loosino cubbi daafira, mararro nookki kaajjillinni qorichishummokkinni diagureemmo. Insa gobbate manna qafadduhu gedensaanni Edoomi mannira sayisse uyitino.

⁷ Kunnira, Gaaza Katami huxxira giira qaseemmo; qiishonsano giirreemmo.

⁸ Ashidoodi giddo hee'ranno mannano shorreemmo. Asiqeloona Katami gashshaanchono huneemmo; Eqirooni Katamira heedhannoreno qorichisheemmo. Gattino Filisxeemootino reyitanno» yii.

XIROOSI

⁹ Kaaliiqi, «Xiroosi manni marro marro hige loosino cubbi daafira, mararro nookki kaajjillinni qorichishummokkinni diagureemmo. E'inoha rodiimmate gondooro diigge qafaddino manna Edoomira sayisse uyitino.

¹⁰ Kunnira Xiroosi Katami huxxira giira qaseemmo; qiishonsano giireemmo» yii.

EDOOMI

¹¹ Kaaliiqi, «Edoomi manna marro marro hige loosino cubbi daafira, mararro nookki kaajjillinni qorichishummokkinni diagureemmo. Insa roduuwansa Israeeloota moyichu gede ugaaxxe amaddino. Amadduhu gedensaannino dimarartinonsa. Insara gawalo nookki hanqo hanqitino; hanqinsano diqiidannoho.

¹² Kunnira Temaani Katamira giira qaseemmo; Bootsiraani qiishono giireemmo» yii.

AMOONI

¹³ Kaaliiqi, «Amooni manni marro marro hige loosino cubbi daafira, mararro nookki kaajjillinni qorichishummokkinni diagureemmo. Insa gashshootensa halashshi'rate yite Geleaadi hee'rannoha godowinni noo meento godowa dartino.

¹⁴ Kunnira Raaba Katami huxxira giira qaseemmo; qiishonsano giireemmo. Kunni gedensaanni olu barra raarenna cancu bati'ranno. Oluno hombobolattete gede rahanno.

¹⁵ Mootensanna gashshaanonsa qafadantanno» yii.