Ucab Tzijobelil 6 - Quiché Bible

Ri Salomon cujach ri Rachoch Dios

¹ Xubij c'u ri Salomon: “Lal, Ajawaxel, bim la chi lal jekel pa k'ekumalil.

² Are c'u ri in nu yacom jun ja che la rech cäjeki' la chupam, jun c'olbal ri cäjeki' wi na la amak'el.”

³ Xutzalc'atij rib ri ajawinel, xbe c'u u wäch cuc' conojel ri tinimit aj israelib, ri e tac'atoj, xebutewichi'j c'ut.

⁴ Je xubij wa': “Tewichital ri Ajawaxel, ri u Dios ri Israel, chi xutz'akatisaj ri xuchi'j che ri David, ri nu tat, aretak xubij che:

⁵ ‘Kas pa ri k'ij ri xinwesaj ulok ri nu tinimit pa Ejipt, man nu cha'om ta jun tinimit chquixo'l conojel ri ramak' ri Israel rech chupam cayac ta wi na jun rachoch Dios ri cäjeki' wi na ri nu bi', mawi nu cha'om jun achi rech are cux c'amal u be ri nu tinimit Israel,

⁶ xincha' c'ut ri Jerusalen rech cäjeki' ri nu bi' chi', xincha' c'u ri David rech cux k'atal tzij puwi' ri nu tinimit Israel.’

⁷ Ri David, ri nu tat, xurayij u yaquic jun rachoch Dios che u ya'ic u k'ij ri Ajawaxel, ri u Dios ri Israel.

⁸ Xubij c'ut ri Ajawaxel che: ‘Utz ri cabano chi cawaj cayac jun wachoch;

⁹ man at ta c'ut ri catyacow ta na, xane' are' ri a c'ojol ri calax na. Are' ri cayacow na ri wachoch.’

¹⁰ Je ba' ri', ri Ajawaxel u tz'akatisam ri xuchi'j. Je jas ri xubij, in ri in canajinak che u q'uexwäch ri David, ri nu tat, in t'uyul c'ut puwi' ri tem re ajawibal re Israel nu yacom c'ut jun rachoch ri Ajawaxel, ri u Dios ri Israel.

¹¹ Nu cojom c'ut ri caxa chupam jawije' ri c'o wi ri c'ulwächinic ri xuban ri Ajawaxel cuc' ri aj israelib.”

¹² Xuya' c'u na rib ri Salomon chuwäch ri porobal aj Ajawaxel, chquiwäch conojel ri tinimit aj israelib, xebulic' c'ut ri u k'ab.

¹³ Pakalinak puwi' jun ak'anibal re k'an ch'ich' re quieb bara' ruc' oxib k'abaj u rabic, xak c'u junam ri u wäch, jun c'u bara' ruc' oxib k'abaj rak'anibem, ri xuwoco xuya' c'u pa u niq'uiajil ri uwo ja. Xxuqui c'ut chquiwäch conojel ri tinimit aj israelib, xebulic' c'ut ri u k'ab chicaj, co xch'awic,

¹⁴ xubij: “Ajawaxel, u Dios ri Israel: mawi cho ri caj mawi cho ri uwächulew c'o ta jun Dios jacha' ri lal, ri cutz'akatisaj ri u c'ulwächinic, cuc'ut ta c'ut ri rutzil chque ri quepatanin ruc' ronojel canima';

¹⁵ chi u tz'akatisam ri xuchi'j che ri David, ri nu tat, xujunataj c'u rib ri chac ruc' ri tzij pa we k'ij ri'.

¹⁶ Rumal c'u ri', Ajawaxel, u Dios ri Israel, tz'akatisaj ba' la xukuje' ri xchi'j la che ri pataninel ech la ri David, ri nu tat: chi mawi jubik' ri ma ta co jun rija'lil ri rumal ri tok'ob la, capaki' na puwi' ri tem re ajawibal re Israel, xuwi ta ne we ri e u c'ojol caquichajij ri qui c'aslemal caquitz'akatisaj c'ut ri pixab la jacha' ri u tz'akatisaxic ri xuban ri are'.

¹⁷ Je c'u ri' Ajawaxel, u Dios ri Israel, bana' la chi chtz'akat ri xchi'j la che ri nu tat, ri pataninel ech la ri David.

¹⁸ ¿La kas ta c'ulo tzij chi ri Dios cäcuinic cäjeki' cuc' ri achijab puwi' ri uwächulew? We ri caj, pa ronojel ri u nimalil man cäcuin ta che k'i'ic la, ¿la are ta c'u lo cäcuin we achoch la ri' che k'iic la ri nu yacom?

¹⁹ Pune' c'u jewa', Ajawaxel xukuje' nu Dios, choc la il che ri nu bochi'nic xukuje' ri nu tok'olenic; chtatabej la ri nu rakoj chi'aj xukuje' ri ch'awem ri cuban apan we pataninel ech la ri' che la.

²⁰ Chc'ol ba ri bakwäch la puwi' ri achoch la chi pa k'ij, chi chak'ab, c'olbal ri bim wi la chi cac'oji' wi na la. Tatabej la ri ch'awem uc' la ri waral cuban wi apanok we pataninel ech la ri' che la.

²¹ Chatatabej la ri nu bochi'nic xukuje' ri rech ri tinimit la Israel aretak chkaban ch'awem uc' la. Chatatabej la ulok pa ri caj jawije' ri jekel wi la, ya' c'u la ri sachbal ka mac.

²² Aretak jun winak cuban c'ax che jun rajil u tz'akat, catak c'ut che u banic ri chi'nic ri kas cäban na chuwäch ri porobal aj Ajawaxel ri c'o chupam we achoch la,

²³ tatabej la ulok kas chicaj, takana la; bana' la suq'uilal chque ri pataninel tak ech la. Ya' la ri takal che ri ajchak'mac, bana' la chi cäkaj ri c'äjisabal wächaj puwi' qui mac ri e itzel tak u banoj, bana' c'u la suq'uilal che ri man c'o ta u mac, je jas ri takal che.

²⁴ Aretak ri c'ulel cäch'äcan puwi' ri Israel ri tinimit la u mac rech chi macuninak chwäch la, we c'u cuq'uextaj u c'u'x cuk'ijilaj c'ut ri bi' la, pa tak c'ut ri u ch'awem cäbochi'n chupam we rachoch Dios ri',

²⁵ tatabej c'u ulok la kas pa ri caj, sacha' la ri u mac, bana' la che chi cätzelej pa ri ulew ri yo'm la chque xukuje' chque tak ri e qui mam.

²⁶ Aretak c'o jun sak'ij man cäjabin ta c'ut u mac' rech chi macuninak ri tinimit chwäch la, cubana' c'u ch'awem chusuq'uil we c'olbal ri', cak'ijilan c'u che ri bi' la, cuq'uex c'u u c'u'x che ri u mac, rumal rech ri c'äjisabal u wäch,

²⁷ chatatabej la ulok kas pa ri caj chesacha c'u la ri qui mac ri pataninel tak ech la, ri e aj tinimit la Israel, c'utu' la ri utzalaj be chquiwäch ri rajawaxic u takexic cumal. Taka' c'u ulok la ri jäb puwi' we ulew ri' ri xya' la che rechbal ri tinimit la.

²⁸ Aretak cäpe wi'jal pa ri ulew o cämisanel yabil, o quechaki'jar tak ri tico'n rumal ri k'ak', o quepe tak ul re ch'ajach, sac' o xjut; aretak ri c'ulel cusutij quij tak ri ka tinimit cäch'ojin c'u cuc' o cäpe apachique quiäk sakil o yabilal,

^29-30 tatabej ba' la apachique ch'awem o bochi'nic ri cuban apachique winak, o rumal ronojel ri tinimit la Israel, aretak c'u cäril ri u quiäk sakil xukuje' ri k'oxomal culic' c'u ri u k'ab pa ch'awem uc' la che u suq'uil we rachoch Dios ri'. Tatabej la ulok kas chicaj kas pa ri c'olbal ri lal jekel wi, ya' c'u la ri sachbal macaj chque ri c'o uc' la; ya' la chque jas takal chque chquijujunal jas ri takal chque ri e qui banoj, xuwi c'u ri lal eta'm la ri chomanic xukuje' ri ranima' ri winak.

³¹ Je c'u ri' caquiya' na k'ij la xukuje' queniman na che la joropa' k'ij quejeki' cho ri ulew ri xya' la chque ri e ka mam.

³² Pune' c'u ne jun ri man winakil ta la, jun ri man u tz'akatil taj ri tinimit la, ri naj ulew elinak wi ulok u mac rech chi xuta' u tzijol ri nimalaj u banic ri bi' la xukuje' chi jabuninak u tzijol ri cuinem la, cuban c'u ch'awem uc' la che u suq'uil we achoch la ri',

³³ chatatabej la ulok kas chicaj, kas pa ri c'olbal ri lal jekel wi, chya' c'u la che ronojel ri cutz'onoj che la, rech quetamax wäch la cumal conojel ri winak ri e c'o cho ri uwächulew chiquiya' c'u k'ij la jas ri cuban ri tinimit la Israel, chuch'obo' c'ut chi cänatax ri bi' la chupam we achoch la ri' ri nu yacom che la.

³⁴ Aretak chel bic ri tinimit la che u tijic u chuk'ab cuc' ri e u c'ulel, apawije' ta ne ri cätak ta wi la bic, we cuban ch'awem uc' la chusuq'uil we tinimit ri' ri xcha' la xukuje' che ri achoch la ri nu yacom che la,

³⁵ chtatabej la ulok kas chicaj ri u ch'awem uc' la xukuje' ri u bochi'nic, chäto' c'u la u wi'.

³⁶ Aretak c'u che macun chwäch la, mawi c'u ne jun c'olic ri ma ta cämacunic, cayactaj c'u oyowal la cuc' quejach c'u la pa u k'ab ri c'ulel rech quebe quiyutu quebe qui c'am c'u bic pa jun ulew chic, we naj o nakaj,

³⁷ we c'u pa ri ulew jawije' ri e c'amom wi la bic caquiq'uex qui c'u'x quetzelej uc' la caquitz'onoj c'u tok'ob che la caquich'ob c'ut chi e macuninak qui banom c'ut ri lawaloyil,

³⁸ we quetzelej ulok uc' la ruc' ronojel ri canima' xukuje' ruc' ronojel ri qui c'aslibal pa ri ulew ri e c'amom wi bic rech queboc che pataninelab lok'om, caquiban c'u ch'awem uc' la che u suq'uil we ulew ri' ri xya' la chque ri e qui mam, xukuje' che ri tinimit ri xcha' la, xukuje' che ri achoch la ri nu yacom che la,

³⁹ tatabej la, ri e qui ch'awem xukuje' tak ri e qui bochi'nic kas pa ri caj, kas pa ri c'olbal jawije' ri jekel wi la, chäto' la u wi' sacha' la qui tza'm ri e u banom ri macaj ri tinimit la chwäch la.

⁴⁰ Choc ba la il nu Dios, chtatabej la ri ch'awem ri queban chupam we c'olbal ri'.”

⁴¹ “Walij la, Dios xukuje' Ajawaxel, petala' ruc' ri cuinelalaj caxa la, saj la chupam ri c'olbal jawije' ri cuxlan wi na la. Chi ri e cojol tabal tok'ob chwäch la, Dios xukuje' Ajawaxel, chcatz'iakij quib ruc' ri colobal ib, ri e jic chwäch la chequicotok chupam ri telechinic la.

⁴² Maxutuj la canok, Dios xukuje' Ajawaxel, ri ajawinel ri cha'om la. Masach pa jolom la ri u lok'al ri David ri pataninel ech la.”