Ucab Tzijobelil 5 - Quiché Bible

Ri caxa ri c'o wi ri c'ulwächinic cac'am bic queyok chupam ri Rachoch Dios

¹ Aretak c'u xeq'uis qui banic conojel tak ri chac ri takaninak ri Salomon che qui banic chupam ri rachoch Dios, xebuc'am bic ri Salomon ri e chaconisan ri e re k'an puak xukuje' ri e re sak puak ri e u tasom ri David, ri u tat, che ri Ajawaxel, xebuya' c'u cuc' ri e u k'inomal ri rachoch ri Ajawaxel.

² Xebumulij c'ut ri Salomon ri nimak tak tatayib aj Israel pa Jerusalen, conojel ri c'amal tak qui be ri amak' xukuje' tak ri winak ri e nimak tak qui k'ij pa ri jujun tak ja winak aj israelib, che u k'axexic ulok ri caxa re ri u c'ulwächinic ri Ajawaxel ri c'o pa Sion, ri u Tinimit ri David.

³ Pa ri k'ij c'ut re ri nimak'ij ri nim u banic, pa ri uwuk ic' re ri junab xquimulij quib conojel ri aj israelib ruc' ri ajawinel Salomon.

⁴ Xebopan conojel ri nimak tak tatayib aj Israel, e are' c'ut ri aj levitib xetelen ri caxa

⁵ xquik'axej c'ut junam xrachilaj ri Lic'om Rachoch re rikoj ib ruc' ri Dios xukuje' conojel ri e tastalicalaj tak chaconisabal ri e c'o chupam, ri xec'am bic cumal tak ri e cojol tabal tok'ob xukuje' ri aj levitib.

⁶ Ri ajawinel Salomon xukuje' conojel ri tinimit aj israelib ri qui mulin quib ruc', e c'o chuwäch ri caxa cätajin quequichi'j tabal tak tok'ob chij ama'ib tak wacax ri rumal ri qui q'uiyal man xban ta cuinic che cajilaxic.

⁷ Aretak c'ut xeto'tajic ri e cojol tabal tok'ob xquitelej bic ri caxa re ri u c'ulwächinic ri Ajawaxel xequiya' chupam ri rachoch Dios, c'ä pa ri Sibalaj Tastalicalaj C'olbal, chquixe' ri qui xic' ri aj cajalaj tak to'banelab,

⁸ ri e qui lic'om ri e qui xic' puwi' ri c'olbal ri c'o wi ri caxa, caquichuk ri u wi' ri caxa jacha' xukuje' ri e u balulil.

⁹ Sibalaj c'u e nimak ri qui rabic ri e u balulil chi quebilitaj kas chupam ri Tastalicalaj C'olbal, ri c'o chuwäch ri Sibalaj Tastalicalaj C'olbal, man quebilitaj ta c'u chrij; je c'u e canajinak wa' c'ä pa ri k'ij camic.

¹⁰ Chupam ri caxa xuwi e c'o ri quieb tz'alam abaj ri xebuya' ri Moises chupam pa Horeb, ri tz'alam tak abaj re ri c'ulwächinic ri xuban ri Ajawaxel cuc' ri aj israelib aretak xebel ulok pa Ejipt.

¹¹ Ri e cojol tabal tok'ob xebel ulok chupam ri Tastalicalaj C'olbal. Conojel ri e cojol tabal tok'ob ri e c'o apanok qui tasom quib pune' man e c'o chupam ri qui chac ri jachom tak chquiwäch.

¹² Conojel ri aj levi ri quebixonic, Asap, Heman xukuje' ri Jedutun, e cachil tak ri e qui c'ojol xukuje' ri niq'uiaj cachalaxic chic, qui tac'abam tak quib pa ri elebal k'ij che ri porobal, quicojom tak ri catz'iak ri re lino. E cuc'am ri quetecak tak k'an ch'ich', nimalaj tak arp xukuje' alaj tak arp. E achilatal c'u cumal jun sient juwinak (120) e cojol tabal tok'ob ri quecok'esaj trompet.

¹³ Conojel c'ut xquijunaj quib che cok'isaxic tak ri trompet xa' c'u jun u pa qui kul xquicoj che u ya'ic k'ijilanic xukuje' maltioxinic che ri Ajawaxel, xecok'esaj tak c'ut ri trompet, ri quetecak tak k'an ch'ich' xukuje' ri jule' tak k'ojom chic aretak cätajin cäban ri bixonic: “Chixk'ijilan che ri Ajawaxel, utz c'ut ri are' junalic c'ut ri u lok'ok'ebal c'u'x.” Pa ri jok'otaj ri', ri rachoch ri Ajawaxel xnoj che jun sutz',

¹⁴ rumal c'u rech ri sutz' ri e cojol tabal tok'ob man xecuin taj xecanaj ta che u banic ri k'ijilanic, rumal rech chi ri u juluwem ri Ajawaxel u nojisam ri rachoch.