Ucab Tzijobelil 4 - Quiché Bible

Ri jastak ri quebajwataj pa ri Rachoch Dios

¹ Ri Salomon xukuje' xuban jun porobal re k'an ch'ich' ri julajuj (11) bara' ri u rabic xukuje' julajuj (11) bara' u wäch job bara' ruc' quieb k'abaj c'ut rak'anibal.

² Xukuje' xuban jun nimalaj c'olbal ja' re k'an ch'ich', ri cäya' wi ri ja'. Quetequic c'ut, ri quetanic job bara' ruc' quieb k'abaj ri jun u chi' che ri jun chic. Ri rak'anibem quieb bara' ruc' oxib k'abaj, ri u quetic, waklajuj (16) bara' ruc' quieb k'abaj.

³ Chuxe' xukuje' chrij ri c'olbal ja', pa cacholaj, e c'o tak wächbal ri e jacha' ta ne e qui wächbal ama'ib tak wacax, ri e lajujitak pa jujun quieb tak k'abaj, ri xa' jun ruc'axic quib banom ruc' ri c'olbal ja'.

⁴ Wa' t'uyul paquiwi' cablajuj ama'ib tak wacax e re k'an ch'ich', oxib queca'y pa ri iquiak'ab, oxib pa ri mox k'ab, oxib pa ri elebal k'ij oxib pa ri kajebal k'ij. Ri e cakan ri e c'o chquij e oquinak chupam, t'uyul c'ut ri c'olbal ja' paquiwi'.

⁵ Niq'uiaj k'abaj c'ut ri u pimal ri c'olbal ja'; ri u chi' je ta ne ri u cotz'ijal jun xuxa'n, oxib sient (300) tonel ja' canojisanic.

⁶ Xukuje' xebuban lajuj c'olbal ja' e re k'an ch'ich' che ch'ajbal, job xebucoj pa ri iquiak'ab job xebucoj pa ri mox k'ab, chi' c'u quech'aj wi ri jastak ri quecoj che ri tabal tok'ob ri quechajirisaxic; are c'u ri nim c'olbal ja' are' qui ch'ajbal ri e cojol tabal tok'ob.

⁷ Xukuje' xebuban lajuj (10) tzuc'ulibal k'ak' re k'an puak jas ri qui banic ri yo'm u bixic, xebuya' c'u chupam ri rachoch Dios, job pa ri iquiak'ab job pa ri mox k'ab.

⁸ Xebuban c'u xukuje' lajuj (10) mexa, xebuya' c'u chupam ri rachoch Dios, job pa ri iquiak'ab job pa ri mox k'ab. Xukuje' jun sient nimak tak lak re k'an puak.

⁹ Xuban c'ut ri uwo ja chque ri e cojol tabal tok'ob xukuje' ri uwo ja ri nim u k'ij, e rachil tak ri roquibal, ri xebuch'uk che k'an ch'ich'.

¹⁰ Ri nimalaj ja c'olbal ja' xuya' pa ri riquiak'ab ri rachoch Dios jubik' pa ri mox k'ab.

¹¹ Ri Hiram xukuje' xebuban tak ri t'uy, ri palet tak xukuje' ri nimak tak lak, je u q'uisic ri chac wa' xuban che ri Salomon chupam ri rachoch Dios.

¹² We chac ri' e are tak ri quieb rakan ja, ri tok'ebal u wi' ri rakan ja ri e quetecak ri e c'o paquiwi' ri rakan ja, ri quieb c'at ri e ch'ukuwinak tak qui wi' ri k'obal u wi' ri rakan ja,

¹³ ri quiejeb sient (400) crabaj ri xecoj chque ri quieb c'at, pa cacab tak cholaj chque ri jujun tak c'at, ri xch'ukubex qui wi' ri quieb tok'ebal u wi' ri rakan ja ri e quetecak ri e c'o paquiwi' ri rakan ja; ri lajuj qui tiq'uilibal,

¹⁴ ri lajuj c'olbal ja' ri benak paquiwi',

¹⁵ ri nimalaj c'olbal ja' ri caya' wi ri ja', e rachil ri cablajuj ama'ib tak wacax ri e c'o chuxe',

¹⁶ e c'o chi c'u na ri t'uy ri palet xukuje' tak ri ch'ipibal ti'j. Conojel ri chaconisabal ri xebuban ri ajtij Hiram, che ri Salomon ri quebajwataj chupam ri rachoch ri Ajawaxel, e re k'an ch'ich' pilimarisam.

¹⁷ Xebuban pa k'ak' pa tak molte re sanyeb pa ri ulew ri c'o chuchi' ri Jordan, chuxo'l ri Sucot ruc' ri Saretan.

¹⁸ Ri Salomon sibalaj e q'ui ri chaconisabal re k'an ch'ich' xebubano chi man xoc ta chi il chque chi quepajic.

¹⁹ Ri Salomon xukuje' xutak qui banic tak ri e chaconisabal ri quebajwataj chupam ri rachoch Dios: ri porobal re k'an puak, ri mexa tak ri queya' wi tak ri caxlanwa ri quetas che ri Ajawaxel,

²⁰ ri e tzuc'ulibal k'ak' e re utzalaj k'an puak e cachil tak ri e qui yabal k'ak' ri xec'oji' chuwäch ri Tastalicalaj C'olbal, rech quetzijic jacha' ri takanic ri yo'm;

²¹ ri e qui wächbal tak cotz'i'j, ri e yabal tak k'ak' xukuje' tak ri e chapbal, xukuje' tak wa' e re utzalaj k'an puak;

²² xukuje' tak ri e kopibal tak u wi' chäj, ri nimak tak lak, ri quecoj che paq'uebal xukuje' tak bukibal c'oc' k'ol conojel wa' e re utzalaj k'an puak. Xukuje' e re k'an puak, ri caban wi oquem chupam ri rachoch Dios, ri qui xak tak ri oquibal ri e c'o chupam, ri e rech ri Sibalaj Tastalicalaj C'olbal xukuje' ri kas qui xak tak ri oquibal chupam ri rachoch Dios.