Ucab Tzijobelil 33 - Quiché Bible

Ri rajawinic ri Manases

¹ Cablajuj (12) u junab ri Manases aretak xuchaplej ajawinic, cawinak olajuj (55) junab c'ut xajawin pa Jerusalen.

² E are tak c'ut ri e u banoj e lawalo chuwäch ri Ajawaxel, e are xebuchacuj tak re ri e junam tak quetzelal ri nimak tak tinimit ri xeburokij bic ri Ajawaxel chquiwäch tak ri aj israelib:

³ Xebuban chi qui banic ri k'ijilabal ri quek'ijilax wi tak diosib ri xebut'akij can ri Ezequiy, ri u tat; xebuwalijisaj tak porobal chque tak ri qui wächbal ri Baal, xukuje' xebuban tak e u wächbal ri Asera; xak c'u u wi' chic xebuk'ijilaj xukuje' xebuya' k'ijilanic chque conojel tak ri ch'imil ri e c'o pa ri caj,

⁴ xebuyac c'u tak porobal chupam ri rachoch ri Ajawaxel, ri u bim wi ri Ajawaxel chi are u jekelibal ri u bi' amak'el pa Jerusalen.

⁵ Xebuyac chi niq'uiaj porobal chuwäch ri quieb uwo ja rech ri rachoch ri Ajawaxel, che qui k'ijilaxic tak ri ch'imil ri e c'o chicaj.

⁶ Xebuporoj c'u ne tak ri e u c'ojol che tabal tok'ob pa ri beya' re Ben-hinom, xuchacuj rech ri qui ch'abexic tak ri itzel tak uxlabal ri u banic ch'obonic xukuje' ri subunic, xujekeba' ri aj itzel uxlabal xukuje' ri itzinic. Sibalaj e itzel tak ri e u banoj chuwäch ri Ajawaxel, ri xuq'uis retzelaxic rib chuwäch.

⁷ Xukuje' xutac'aba' ri dios (jun u cawäch ri Dios) ri xuban chupam ri rachoch ri Dios, ri u bim wi ri Dios che ri David xukuje' che ri Salomon ri u c'ojol: “We rachoch Dios ri' pa Jerusalen, ri nu cha'om chquixo'l tak ri amak' re Israel, are wa' ri cux na u jekelibal ri nu bi' amak'el.

⁸ Man quebenwesaj ta chi bic ri aj israelib chupam ri ulew ri xebenjekeba' wi ri e qui mam we quequitz'akatisaj xukuje' quequiban ronojel ri e nu takom che qui banic, xukuje' conojel tak ri tijonic, pixab xukuje' tak ri tz'ibatalic ri e nu yo'm chque rumal ri Moises.”

⁹ Are c'u ri Manases xubano chi ri Juda xukuje' ri aj Jerusalen xetaken pa ri itzel be c'o c'u na ri qui wi' ri etzelal ri xequibano chquiwäch tak ri xquiban ri nimak tak tinimit ri xsachisax qui wäch, chquiwäch ri aj israelib rumal ri Ajawaxel.

¹⁰ Ri Ajawaxel xutzijobej ri Manases xukuje' ri u tinimit, man c'u xquiya' ta qui xiquin che ri xubij chque.

¹¹ Rumal ri', ri Ajawaxel xebuc'am ulok ri e qui nimal tak ri rajch'ojab ri ajawinel re Asiriy, ri xquichap ri Manases cuc' tak xecabal, xquiyut c'u cuc' tak tikom k'an ch'ich' xquic'am c'u bic pa Babilon.

¹² Aretak xuna' ri rib chi c'o pa ri nimalaj c'ax xutz'onoj elebal c'u'x che ri Ajawaxel, xumach'irisaj c'u rib ruc' ronojel ranima' chuwäch ri qui Dios ri e nabe tak u mam.

¹³ Aretak c'u xuban ch'awem ruc' Dios, xoc il ri Dios che xebutatabej tak ri e u bochi'nic xuban c'ut chi xtzelej pa Jerusalen che u takexic ri ajawinic. C'äte c'u ri' xuch'ob ri Manases chi ri Ajawaxel are Dios.

¹⁴ Oc'owinak chi c'u wa', ri Manases xuyac che ri u Tinimit ri David, pa ri u kajebal k'ij che ri Jihon, jun tapia chrij ri coc'ow chupam ri alaj nima' copan c'u chuchi' ri Coquibal ri Cär, cucotij c'ut pa Opel. Xuban c'u che chi sibalaj naj xelchicaj. Xukuje' xebucoj qui nimal tak ajch'ojab pa conojel tak ri tinimit re Juda ri e c'o tak tapia chquij.

¹⁵ Xeberesaj c'ut pa ri rachoch ri Ajawaxel ri diosib ri man etamatal ta qui wäch xukuje' ri e diosib ri xubano, jacha' xukuje' conojel tak ri porobal ri quek'ijilax wi diosib, ri xebuyac pa ri u juyub ri rachoch Dios xukuje' pa Jerusalen, xebuq'uiak c'u bic chrij ri tinimit.

¹⁶ Xuban c'u na u banic ri porobal ri rech ri Ajawaxel, xebuchi'j tabal tak tok'ob re utzirisan ib xukuje' re maltioxinic, xuya' c'u takanic che ri Juda chi chuya' k'ijilanic che ri Ajawaxel, ri u Dios ri Israel.

¹⁷ Are' c'u ri tinimit u takem qui chi'xic tabal tak tok'ob paquiwi' tak ri porobal ri quek'ijilax wi diosib, pune' c'u che ri Ajawaxel ri u Dios cuchi'j wi.

¹⁸ Ri u tz'akatil ri u tzijobelil ri Manases, xukuje' ri u ch'awem ruc' Dios, xukuje' tak ri k'alajisanic ri xequiya' tak ri e k'axal tzij che pa ri u bi' ri Ajawaxel, ri u Dios ri Israel, e tz'ibatal pa ri qui tzijobelil tak ri ajawinelab re Israel.

¹⁹ Ri u ch'awem ruc' Dios xukuje' ri tzelebal u wäch ri xuc'amo, ronojel ri u tzijoxic ri u mac xukuje' ri u jech'balil xukuje' tak ri c'olbal ri xebuyac wi tak ri porobal ri quek'ijilax wi diosib, xukuje' ri xebuya' wi tak ri e u wächbal ri Asera xukuje' tak ri diosib, c'ä majok chumach'irisaj rib chuwäch ri Dios, e tz'ibatal pa ri qui tzijobelil ri e k'axal u tzij.

²⁰ Aretak xcämic, xmuk pa ri ticbal cotz'i'j re ri rachoch. Are c'u xajawin na ri u c'ojol pa ri u c'olbal ri Amon u bi'.

Ri rajawinic ri Amon

²¹ Juwinak quieb (22) u junab ri Amon aretak xuchaplej ajawinic, quieb junab c'ut xajawin pa Jerusalen.

²² Man e utz ta c'ut ri e u banoj ri xebuban chuwäch ri Ajawaxel, e jacha' ri xebuban ri Manases ri u tat. Xebuchi'j tabal tok'ob xukuje' xebuya' k'ijilanic chque conojel tak ri e diosib ri xebuban can ri Manases ri u tat.

²³ Man c'u xumach'irisaj ta rib chuwäch ri Ajawaxel, jacha' ri xuban ri Manases ri u tat, xane' xebumulij q'ui macaj puwi'.

²⁴ Xquiwalijisaj c'u quib ri e quinimal tak ri rajch'ojab chrij, xquicämisaj c'ut chupam ri rachoch.

²⁵ Are c'u ri winak re ri tinimit xequicämisaj ri xquiwalijisaj quib chrij ri ajawinel Amon, are' c'u xquicoj ri u c'ojol pa ri u c'olbal ri Josiy u bi'.