Ucab Tzijobelil 32 - Quiché Bible

Ri Senaquerib xroquibej ri Juda

¹ Chquiwi' chi c'ut we banoj ri' xukuje' tak ri jiquil ri xebuban ri Ezequiy, xopan ri Senaquerib, ajawinel re Asiriy, xroquibej ri Juda xebusutij c'u quij tak ri tinimit ri e c'o tak tapia chquij, c'o c'ut pa u c'u'x chi quebuch'äco.

² Aretak xril ri Ezequiy chi ri Senaquerib man c'o ta quieb tzij ruc' opaninak che u ch'äquic ri Jerusalen,

³ xchoman cuc' ri quetakan paquiwi' tak ri tinimit xukuje' ri e qui nimal tak ri ajch'ojab xubij c'u chque chi takal qui mukic tak ri e qui q'uiyibal tak ja' ri e c'o chrij ri tinimit, xquiya' c'u qui tzij che u banic wa'.

⁴ Xquimulij c'u quib tinimit winak xequimuk c'ut conojel ri e qui q'uiyibal tak ja', xukuje' ri u be ja' ri cabin chuxe' ri ulew, rech aretak ta chebopan tak ri ajawinelab aj asiriyab man nim taj ri ja' quequirika'.

⁵ Man c'u ruc' ta queblan c'uxaj xuchaplej u suc'umaxic ri nim tapia ri tzakinak, xukuje' xebuyac tac'atak tak ja puwi', xukuje' chi jun nimalaj tapia chrij. Xuban c'u u t'iquic ri julujic ri c'o pa ri u Tinimit ri David, xebuban e jumulaj tz'imaj tak ch'ich' xukuje' quetecak tak ch'ich'.

⁶ Xebucoj c'u qui nimal tak ajch'ojab paquiwi' ri winak, xebumulij c'u pa ri lianic ri c'o chrij ri u chi' ri tinimit xuya' c'u chajin animaaj chque, je xubij wa' chque:

⁷ “¡Chixux co xukuje' chc'ol i chuk'ab! Mixe'j iwib mawi mape iwanima' chuwäch ri ajawinel re Asiriy xukuje' chquiwäch ri q'uialaj rajch'ojab ri e achilaninak, are c'u e q'ui na ri e c'o kuc' uj chuwäch ri e c'o ruc' are'.

⁸ Ri Senaquerib are' u cuban u c'u'x chquij ri qui chuk'ab ri achijab, c'o c'ut ri Ajawaxel ri ka Dios kuc' rech cujuto' che qui banic tak ri ka ch'o'j.” Aretak xtataj ri xubij ri ajawinel Ezequiy, ri tinimit xuna' chajin anima'.

⁹ Are c'u ri Senaquerib ajawinel re Asiriy cätajin cach'ojin ruc' ri Lacs e rachil conojel ri e rajch'ojab, xebutak bic jujun qui nimal ri e rajch'ojab pa Jerusalen, rech queyok u bixic che ri Ezequiy, ajawinel re Juda, xukuje' chque conojel ri aj Jerusalen ri e c'o pa Jerusalen, we takquil ri':

¹⁰ “Ri Senaquerib, ajawinel re Asiriy, cutak u bixic chiwe: ‘¿Jasche sibalaj co qui na iwib, chi quixcanaj pa Jerusalen sutim c'u ne rij?

¹¹ We ri Ezequiy cubij chiwe chi ri Ajawaxel ri u Dios quixuto' na pa nu k'ab, xa cätajin quixusubu cätajin c'u quixuya' pa ri cämical re wi'jal xukuje' chaki'j chi'.

¹² ¿La ma ta pa u ri Ezequiy xuchupisaj qui wäch ri c'olbal re k'ijilanic xukuje' tak ri porobal re we Dios ri', xuya' c'u takanic chi ri winak re Juda xukuje' re Jerusalen chi chquiya' k'ijilanic xukuje' qui chi'j c'oc' k'ol xa puwi' jun porobal?

¹³ ¿La ma ta iweta'm ri nu banom xukuje' ri qui banom ri e nu mam cuc' conojel tak ri tinimit que ri jule' tak ulew chic? ¿La xecuin puch ri e qui diosib we nimak tak tinimit ri' xequito' ta pa nu k'ab?

¹⁴ ¿Jachin chque conojel ri qui diosib we nimak tak tinimit ri' ri xsachisax qui wäch cumal ri e nu mam ri xcuin ta che u to'ic ri rulew pa nu k'ab? ¿Jas c'u che qui chomaj chi cacuin ri i Dios che i to'ic?

¹⁵ Rumal c'u ri' miya' iwib pa subic mawi mixch'äctaj rumal ri Ezequiy; micojo ri cubij chiwe, we c'u man c'o jun dios chque ri qui diosib we nimak tak tinimit ri' xticar ta che u to'ic ri u tinimit pa nu k'ab xukuje' pa qui k'ab ri e nu mam, ¡mawi ta c'u ne cäcuin ta ri i Dios ix che i to'ic pa nu k'ab!’ ”

¹⁶ Wa', c'o chi c'u na, ri xquibij xukuje' ri e qui nimakil ri rajch'ojab ri ajawinel re Asiriy che u yok'ic ri Dios, ri Ajawaxel, xukuje' che u yok'ic ri Ezequiy ri pataninel rech.

¹⁷ Ri Senaquerib xukuje' xebutz'ibaj wuj ri cuyac wi royowal ri Ajawaxel, ri Dios re Israel, ri je u yok'ic wa' xubano: “Je' jacha' ri e qui diosib tak ri tinimit re jule' tak ulew chic man xecuin taj xequito' ta pa nu k'ab, mawi c'u ne ri u Dios ri Ezequiy cacuinta che u to'ic ri u tinimit pa nu k'ab.”

¹⁸ Ri e qui nimal tak ri rajch'ojab ri Senaquerib, xequitzijobej ri winak aj Jerusalen ri e c'o puwi' ri tapia, sibalaj co xquirakakej qui chi' pa Hebrey rech cäquixe'j quib xukuje' che u cojic qui xib, rech jeri' quecuin che u ch'äquic ri tinimit.

¹⁹ Xeyok'on che ri u Dios ri Jerusalen jacha' ri xquiban chque ri qui diosib ri jule' nimak tak tinimit chic re ri uwächulew, ri e diosib ri xa e banom cumal winak.

²⁰ Je c'u u q'ueyowal wa' c'olic, ri ajawinel Ezequiy rachil ri Isaiy, u c'ojol ri Amoz, xquiban ch'awem ruc' Dios xquitz'onoj to'banic chicaj.

²¹ Are c'u ri Ajawaxel xutak jun tako'n aj caj ri xebucämisaj conojel ri ajch'ojab, xukuje' tak ri e qui nimakil ri ajch'ojab, ri quetakan paquiwi' ri rajch'ojab ri ajawinel re Asiriy, ri xtzelej na pa ri rulewal nojinak che q'uixbal. Aretak c'u xoc chupam ri rachoch ri u dios, kas chila' xcämisax wi cumal ri kas e u c'ojol.

²² Jewa' ri xuban ri Ajawaxel che u to'ic ri Ezequiy xukuje' ri e aj Jerusalen pa u k'ab ri Senaquerib, ajawinel re Asiriy xukuje' che qui to'ic pa qui k'ab conojel ri niq'uiaj chic, xuya' c'u jamaril chque cuc' conojel ri qui c'ulja.

²³ E q'ui c'ut ri winak ri xequic'am bic sipanic pa Jerusalen che ri Ajawaxel, xukuje' tak sipanic ri pakal cajil che ri Ezequiy, ajawinel re Juda. Kas c'u pa ri k'ij ri' xnimar u k'ij chquiwäch ri niq'uiaj nimak tak tinimit chic.

Ri u yabilal xukuje' ri u cunatajic ri Ezequiy

²⁴ ¡Pa ri k'ijol ri', ri Ezequiy xkasax rumal jun c'axalaj yabil; xuban c'u ch'awem ruc' ri Ajawaxel, ri xtzelex u wäch ri u ch'awem rumal, rumal jun mayibalalaj etal!

²⁵ Pune' c'u xban utzil che, ri Ezequiy man nim ta xril wi, xane' xuban nimal, rumal c'u rech wa' ri Ajawaxel xoyowar ruc' xukuje' ruc' ri Juda xukuje' ri Jerusalen.

²⁶ Pune' c'u ne xuban nimal, ri Ezequiy xumach'irisaj rib chuwäch ri Dios, xukuje' junam xquiban ri winak aj Jerusalen, ri Ajawaxel man c'u xukasaj taj ri royowal paquiwi' pa tak ri u k'ijol ri Ezequiy.

Xk'inomar ri Ezequiy

²⁷ Ri Ezequiy xquicot cuc' nimak tak k'inomal xukuje' nimarisabal tak k'ij, q'ui sak puak, xukuje' k'an puak xumulij, abaj ri pakapoj cajil, c'oc'al, quetecak tak ch'ich' xukuje' ronojel qui wäch jastak ri pakapoj cajil.

²⁸ Xebuban tak tanibal ri xebuc'ol wi wa trico sebad, ri u wa'l uva xukuje' ri aseit, qui warabal wacax xukuje' qui warabal tak chij.

²⁹ Xebuban c'u na tak tinimit, sibalaj xepok' ri e u wacax xukuje' ri e u chij xk'inomarisax c'ut rumal ri Dios.

³⁰ Ri Ezequiy are' ri xk'atin ri u be ri ja' ajsic che ri q'uiyibal ja' re Jihon, xuban c'u ulok u be xkaj ulok iquim, pa u xcut ri kajebal k'ij che ri u Tinimit ri David. Je c'u ri' ri Ezequiy utz xel pa ronojel ri xutakej u banic.

Ri Ezequiy xebuc'ulaj ri ula' ri e petinak pa Babilon

³¹ E are' tak c'ut ri e k'atal tak tzij re Babilon xequitak ulok jujun achijab che u solixic xukuje' che retamaxic ri mayibal ri c'ulmatajinak pa ri ulew. Ri Dios xuya' can u tuquiel ri Ezequiy, che u c'ambejexic rumal rech c'u kas caretamaj ri chomanic ri c'o chupam ri ranima'.

Ri u cämical ri Ezequiy

³² Ri u tz'akatil ri u tzijobelil ri Ezequiy xukuje' ri tastalicalaj tak chac ri xebubano, e tz'ibatal chupam ri u c'utwächinic ri k'axal tzij ri Isaiy, u c'ojol ri Amoz, xukuje' chupam ri wuj quech tak ri rajawinelab ri Juda xukuje' ri Israel.

³³ Aretak xcäm ri Ezequiy, xmuk puwi' ri xemuk wi ri e rachalaxic ri David. Ronojel ri Juda xukuje' ri aj Jerusalen sibalaj xquiya' u k'ij; are' c'u xajawin ri u c'ojol pa ri u c'olbal ri Manases u bi'.