Ucab Tzijobelil 31 - Quiché Bible

Ri aj israelib xeyan ruc' ronojel tz'ebenic

¹ Aretak xq'uis u tza'm ronojel wa', conojel ri aj Israelib ri e c'o chila' xebe chquipam tak ri tinimit ri e c'o pa Juda. Xequic'äjij ri tastalicalaj tak abaj, xebe qui paxij tak ri e u wächbal tak ri Asera xebequit'akij tak ri k'ijilabal ri quek'ijilax wi tak ri diosib, c'ä xquiq'uis na qui c'äjixic conojel tak we jastak ri' pa ronojel ri Juda, pa Benjamin, xukuje' c'u ne pa Eprain xukuje' Manases. Conojel c'ut ri aj israelib xetzelej pa tak ri e qui tinimit, chquijujunal pa tak ri e culew.

² Xujekeba' c'ut ri Ezequiy ri qui cholajixic ri e cojol tabal tok'ob xukuje' tak ri aj levitib jas ri u cholajil tak ri qui chac ri qui rikom, rech junam que chquiwäch, chquijujunal jas ri u cholajil ri qui chac ri quena'w che u banic, quequichi'j c'u tabal tok'ob ri quechajirisaxic xukuje' tabal tak tok'ob quech utzirisan tak ib, chequiya' c'u maltioxinic xukuje' k'ijilanic che ri Ajawaxel, quepatanij c'u chquichi' tak ri e oquibal chupam ri rachoch Dios.

³ C'o chi c'u wi ri cuchuj ri xuya' ri ajawinel ri xresaj pa ri kas e u k'inomal che ri tabal tok'ob ri cächajirisaxic re ak'abibal xukuje' re xk'ekal chque tak ri tabal tok'ob ri quechajirisaxic pa ri k'ij re uxlanem, che ri nimak'ij re ri c'ac' ic' xukuje' chque tak ri nimak'ij ri nimak qui k'ij, jacha' ri tz'ibatal chupam ri u pixab ri Ajawaxel.

⁴ Xukuje' xuya' takanic chque ri winak ri e jekel pa Jerusalen chi chquiya' ri cuchuj ri takal u ya'ic cumal chque ri e cojol tabal tok'ob xukuje' chque ri aj levitib, rech quecuinic caquijach quib ruc' ronojel canima' che u tz'akatisaxic ri u pixab ri Ajawaxel.

⁵ Aretak c'u xjabun ri takanic, ri aj israelib xquiya' ruc' ronojel canima' ri sibalaj utz na che ri trico ri qui walijisam, ri u wa'l uva, ri caseit, ri juyubal räx cab xukuje' ronojel wächinic ri cuya' ri ulew. Xukuje' xquic'am ulok ri u lajujil ronojel ri cäquich'äco, man ruc' ta q'ueq'uenic.

⁶ Xukuje' xquiban ri e jekel pa Israel xukuje' ri e jekel pa niq'uiaj tak tinimit chic ri e c'o pa Juda xquic'am ulok ri u lajujil ri qui wacax ri qui chij, xukuje' ri qui lajujil ri jastak ri e tasom che ri Ajawaxel ri qui Dios. Conojel xequimuluba' pa tak mulaj.

⁷ Pa ri urox ic' xquichaplej u mulubaxic we jastak ri', xquiq'uis c'u pa ri uwuk ic'.

⁸ Aretak c'u ri Ezequiy xukuje' ri e k'atal tak tzij xebe che rilic ri mulitajinak, xquitewichi'j ri Ajawaxel xukuje' ri Israel ri u tinimit.

⁹ Are c'u ri Ezequiy xuc'ot qui chi' ri e cojol tabal tok'ob xukuje' ri aj levitib chque ri jutak mulaj,

¹⁰ are c'u ri qui nimal e cojol tabal tok'ob ri Azariy, rija'lil ri Sadoc, xutzelej u bixic che: “Kas aretak xchaplex u c'amic ulok ri cuchuj pa ri rachoch ri Ajawaxel, c'o sibalaj cakatijo sibalaj c'u ne q'ui ri to'tajinak; conojel we jutak mulaj ri' e are wa' ri e to'tajinak, rumal rech chi ri Ajawaxel u tewichi'm ri u tinimit.”

¹¹ Rumal rech wa', ri Ezequiy xebutak qui banic tanibal pa ri rachoch ri Ajawaxel. Aretak c'u xebantajic,

¹² chila' xec'ol wi ruc' jicomal ri cuchuj ri lajujil ri e qui jachom xukuje' ri jastak ri kas e tasom che ri Ajawaxel. Are' c'u xquicoj ri Conaniy ri aj levi che nabe chajinel che ronojel wa', are c'u ri rachalal ri Simeiy u bi' xquicoj che ucab.

¹³ Ri to'l tak quech ri xecanaj chuxe' ri u takanic ri Conaniy xukuje' ri Simeiy ri rachalal, xec'ut rumal ri ajawinel Ezequiy xukuje' rumal ri Azariy, ri nabe takanel pa ri rachoch Dios, e are' tak wa': Jehiel, Azaziy, Nahat, Asael, Jerimot, Jozabad, Eliel, Ismaquiy, Mahat xukuje' ri Benaiy.

¹⁴ Ri chajil u chi' ri oquibal ri c'o pa ri elebal k'ij, are' ri Core aj levi, u c'ojol ri Imna, are' chajininak tak ri sipanic ri caquic'am ulok ri winak pa quech wi che ri Dios xukuje' ri u jachic ri cuchuj ri quec'am ulok che ri Ajawaxel ri e tasom che ri Dios.

¹⁵ Ri Core jicalaj u to'ic caban pa tak ri e qui tinimit ri e cojol tabal tok'ob, cumal ri Eden, Miniamin, Jexu, Semaiy, Amariy xukuje' ri Secaniy, che qui jachic tak ri jastak chque tak e cachil. Je u jachic cabanic jastak ri qui cholajil tak ri chac ri quequirika'. Xak junam cäban chque ri c'o chic qui junab xukuje' ri c'ä maja' qui junab,

¹⁶ conojel ri quebopan pa ri rachoch Dios che u banic tak ri qui chac ri caquiban jujun tak k'ij ri jachom chquiwäch, jas tak ri k'ij ri caquitaklebej xukuje' tak ri chac ri quena'w che qui banic xuwi ta ne we e tz'ibatal pa ri ajilabal, quecoj c'u pa ajilabal ri c'o chi ox ox qui junab capakic.

¹⁷ Ri e cojol tabal tok'ob e jujun tak ja winak e tz'ibatalic, e are c'u ri aj levitib juwinak qui junab capakic, jas ri u cholajil ri qui chac ri quena'w che qui banic xukuje' aretak caquitaklebej.

¹⁸ Pa ri ajilabal e cojom ri ac'alab ri c'ä e ch'utik na pa ajilabal, ri e ixokilaxelab, ri e alabomab xukuje' ri e alitomab, che u bixic chnimalaj conojel, rumal c'u rech ri patanijic ri jachom pa qui k'ab e tastajinak che u patanixic ri Dios.

¹⁹ Pa conojel tak ri tinimit e c'o jachin tak ri e cojom che qui jachic ri ya'tal u jachic che ronojel achi chquixo'l ri e cojol tabal tok'ob ri e rija'lil ri Aaron, xukuje' chque conojel ri aj levitib ri e tz'ibatalic ri e jekel pa tak ri ulew re yuk'bal quech tak ri e qui tinimit ri e cojol tabal tok'ob.

²⁰ Ri Ezequiy xuban wa' pa ronojel ri Juda. Ri e u banoj e utz, e suc' xukuje' man xak ta c'u e cawäch chuwäch ri Ajawaxel ri u Dios.

²¹ Ronojel ri xuchaplej u banic ri cajwataj che ri rachoch ri Dios je jas ri cubij ri pixab xukuje' tak ri e takomal, che u nimaxic ri Dios ruc' ronojel ranima', rumal ri' utz xelic.