Ucab Tzijobelil 3 - Quiché Bible

Ri Salomon cuyac ri rachoch Dios

¹ Ri Salomon xuchaplej ri yacanic che ri rachoch ri Ajawaxel pa Jerusalen, pa ri juyub Moriy, ri xuc'ut wi rib ri Ajawaxel chuwäch ri David, ri u tat, pa ri c'olbal ri xusuc'umaj ri David che, ri u bixic, jawije' ri cuyak' wi trico ri Ornan ri aj jebusey.

² Xchapletaj ri yacanic pa ri ucab rajilabal ri ucab ic' re ri ucaj junab re ri rajawinic.

³ Ri tiq'uilibal ri xebucoj ri Salomon che u yaquic ri rachoch Dios e are tak retabalil wa': juwinak oxlajuj (33) bara' u rabic julajuj bara' c'u u wäch.

⁴ Ri rakan ja ri c'o chuwäch ri rachoch Dios julajuj (11) bara' u rabic, junam ruc' ri u wäch ri rachoch Dios, ri rak'anibal chicaj xukuje' julajuj (11) bara'. Ri Salomon xuch'uk ri u pam ri rakan ja ruc' utzalaj k'an puak,

⁵ xukuje' xuch'uk ri u pam ri rachoch Dios cuc' tz'alam re tz'inchäj, ri xch'uk ruc' coc'alaj k'an puak, xequiban tak tut xukuje' tikom tak ch'ich' cho tak ri tapia,

⁶ xebunac' c'u je'lic tak abaj cho tak ri tapia che u wikic. Ri k'an puak ri xc'ojic are ri sibalaj utz na.

⁷ Xuch'uk ronojel ri u pam ri rachoch Dios ruc' k'an puak: ri tem tak, ri apal tak, ri tapia tak xukuje' ri oquibal tak; xebucoj aj cajalaj tak to'banelab ri e c'o qui xic' cho tak ri tapia.

⁸ Xuban xukuje' ri Sibalaj Tastalicalaj C'olbal. Julajuj (11) bara' u rabic junam ruc' ri u wäch ri rachoch Dios, ri xukuje' julajuj (11) bara' u wäch. Xuch'uk c'ut ri u pam ruc' coc'alaj k'an puak quiejeb sient cawinak (440) quintal c'ut xquicoj che wa'.

⁹ Ri clawux quepajan jotak libra ruc' cajcaj onz chquijujunal. Xukuje' xuch'uk qui pam ri nimak tak ja ri e c'o pa ri cawik ruc' k'an puak.

¹⁰ Xutak qui banic quieb aj cajalaj tak to'banelab ri e c'o qui xic' pa ri Sibalaj Tastalicalaj C'olbal, ri xukuje' xch'uk quij ruc' k'an puak.

¹¹ Ri tz'akatalaj qui yukic ri qui xic' ri aj cajalaj tak to'banelab e julajuj (11) bara'; jun chque quetan quieb bara' ruc' oxib k'abaj, cuchapala' ri u tapia ri ja, ri jun chic xak junam u yukic, cuchapala' ri u tzam ri u xic' ri jun chic to'banel.

¹² Xak c'u junam, jun u xic' we jun aj cajalaj to'banel ri' ri c'o u xic', cuchapala' ri u tapia ri ja, ri jun chi c'ut, xak junam u yukic, cunak ri u tzam ri u xic' ri to'banel ri c'o u xic' ri c'o nabe.

¹³ We e aj cajalaj tak to'banelab ri' ri e c'o qui xic', ri quebetan julajuj bara' ri qui xic' qui cabichal, e tac'atoj, benak qui wäch che ri qui nimal ja.

¹⁴ Xuban xukuje' ch'ukubal re quem morato, azul xukuje' ri re lino, xebutz'ot aj cajalaj tak to'banelab ri e c'o qui xic' chquiwäch.

Ri quieb rakan ja

¹⁵ Ri Salomon xebuban quieb rakan ja ri xa' co'l man belejlajuj (19) bara' ruc' quieb k'abaj qui taq'ui'c che ri u wäch ri rachoch Dios. Ri e qui tok'ebal ri u wi' ri rakan ja quebetan quieb (2) bara' ruc' oxib k'abaj.

¹⁶ Xukuje' xebuban tikom ch'ich' ri je ta ne quepe chachal, xebutzayiba' chque tak ri rakan ja; xebuban c'u qui wächbal jun sient crabaj, ri xebucoj chque tak ri tikom ch'ich'.

¹⁷ Xebucoj ri rakan ja cho ri u wäch ri rachoch Dios, jun chuwiquiak'ab jun chic chumox k'ab. Ri rakan ja ri c'o pa ri iquiak'ab Jaquin, xucoj che u bi', are c'u ri c'o pa ri mox k'ab Boaz xucoj che u bi'.