Ucab Tzijobelil 26 - Quiché Bible

Ri rajawinic ri Uziy

¹ Ronojel c'ut ri tinimit Juda xumajij ri Uziy, xucoj c'u che rajawinel che u q'uexwäch ri Amasiy ri u tat. Wuklajuj c'ut u junab ri Uziy,

² are' c'u wa' aretak cäminak chic ri u tat, xuban u banic ri tinimit Elat xutzelej c'u pa u k'ab ri Juda.

³ Waklajuj (16) u junab ri Uziy aretak xuchaplej ajawinic, cawinak cablajuj (52) junab xajawin pa Jerusalen. Jecoliy u bi' ri u nan, aj Jerusalen c'ut.

⁴ Ri e u banoj ri Uziy e suc' chquiwäch ri e u bak'wäch ri Ajawaxel, e je e jacha' ri jastak ri xebuban ri Amasiy, ri u tat.

⁵ Xucoj u chuk'ab che u nimaxic ri Dios joropa' k'ij xc'asi' ri Zacariy, ri xyo'w ri tijonic che chi nim chrila' wi ri Dios. Joropa' c'u k'ij ri xniman che ri Ajawaxel, ri are' xupok'colij.

⁶ Ri Uziy xuchaplej u banic c'ax chque ri aj pilisteyib xebut'akij tak ri tapia ri e c'o chrij ri Gat, ri Jabniy xukuje' ri Asdod, xebuyac c'u tak ri tinimit pa ri rulewal ri Asdod, chquixo'l ri aj pilisteyib.

⁷ Ri Dios xuto' pa qui k'ab ri aj pilisteyib, pa qui k'ab ri aj arabib ri e jekel pa Gur-baal xukuje' pa qui k'ab ri aj meunitab.

⁸ Ri aj amonib xetojon pa u k'ab ri Uziy, xopan u tzijol ri u k'ak'al c'ä pa tak ri u c'ulbatil ri Ejipt, rumal rech chi sibalaj xq'uiy ri u cuinem.

⁹ Xukuje' xebuyac tac'atak tak ja pa Jerusalen, puwi' ri Oquibal pa ri Xquina, puwi' ri Oquibal re ri Beya' xukuje' puwi' ri xquina, co c'u qui yaquic xubano.

¹⁰ Xukuje' xebuyac tac'atak tak ja pa ri chaki'j uwo sak, xebuc'ot tak q'ui c'ua' rumal rech chi e q'ui ri rawaj e c'olic, c'o e c'o pa ri lianic jacha' xukuje' ri e c'o puwi' ri juyub. Xukuje' e c'o rachijab ri quechacun pa tak ri juyub xukuje' ri e c'o pa tak ri ticbal tak u uva ri e c'o pa ri rulewal ri c'ache'laj, xukuje' pa ri ticbal tak ichaj, cäkaj c'ut ri ticonijic chuwäch.

¹¹ Ri Uziy kas xak c'u e c'o wi ri rajch'ojab ri quebe che qui banic ch'o'j, quebel c'u bic pa jutak k'at che qui banic ch'o'j jas ri tz'ibatal rumal ri Jehiel ri tz'ibal tzijol ruc' ri ajawinel, xukuje' rumal ri Maasiy, ri qui nimal rajch'ojab ri c'o chuxe' ri u takanic ri Hananiy, jun chque ri u nimal rajch'ojab ri ajawinel.

¹² Ri cajilabal ri nimak qui k'ij pa jujun tak ja winak chnimalaj conojel ri e cowilaj banal tak ch'o'j e quieb mil wakib sient (2,600).

¹³ Ri ajch'ojab ri e c'o chuxe' ri u takanic e oxib sient wukub mil job sient (307,500) ajch'ojab ri xak queyem ri u banic ch'o'j, jun nimalaj chuk'ab wa' ri cacuin che u to'ic ri ajawinel pa tak ri ch'o'j ri quebubano.

¹⁴ Ri Uziy xebusuc'umaj tak chque conojel ri ajch'ojab qui quetecak tak ch'ich', tz'imaj tak ch'ich', to'bal tak jolomaj, to'bal tak uwo c'uxaj, q'uiakbal tak ch'ab, xukuje' tak iquiak'.

¹⁵ Xebuban c'u nawinelalaj tak ch'ich' re ch'ojibal ri xebucoj paquiwi' tak ri tac'atak tak ja xukuje' pa tak ri c'olbal ri naj e elinak wi ri tapia chicaj, kas chila' c'u quebuq'uiak wi bic tak ch'ab xukuje' nimak tak abaj. Naj c'u xopan wi ri u k'ak'al, xuya' c'u jun mayibalalaj to'banic ri Dios che ri xcuin wi xc'oji' u cuinem.

¹⁶ Aretak c'u co tiquil chic pa ri ajawinic, xuchaplej u banic nimal, are c'u xtzakisan wa'. Man xux ta jic chuwäch ri Ajawaxel ri u Dios, xoc c'u chupam ri rachoch ri Ajawaxel che u poroxic c'oc' k'ol puwi' ri porobal ri cäporox wi c'oc' k'ol.

¹⁷ Chrij c'ut ri are' xoc bic ri Azariy, ri cojol tabal tok'ob, achilatal cumal jumuch' (80) cowilaj tak e cojol tabal tok'ob chuwäch ri Ajawaxel,

¹⁸ ri xquitac'aba' quib chuwäch ri ajawinel xquibij c'u che: “Ajawinel Uziy, ri u chi'xic c'oc' k'ol chuwäch ri Ajawaxel man ya'tal ta u banic umal la, xane' cumal ri e cojol tabal tok'ob ri e rija'l ri Aaron, ri e tastal che u banic. Chel la bic chupam ri k'ijilabal, banom c'u la jun jech'balil chuwäch ri Ajawaxel, ri Dios man cunimarisaj ta na k'ij la rumal wa'.”

¹⁹ Ri Uziy, ri c'o jun bukibal re c'oc' k'ol pa u k'ab che u chi'xic c'oc' k'ol xoyowar chque ri e cojol tabal tok'ob. Kas c'u pa ri jok'otaj ri', kas pa ri rachoch ri Ajawaxel chunakaj ri porobal ri caporox wi c'oc' k'ol chquiwäch c'ut ri e cojol tabal tok'ob, xel ulok ch'a'c che ri u metz'al ri u palaj.

²⁰ Aretak ri qui nimal ri e cojol tabal tok'ob ri Azariy xukuje' conojel ri niq'uiaj e cojol tabal tok'ob chic xquiya' qui wäch che, xquilo chi c'o chic ch'a'c che ri qui metz'al ri u palaj, xquesaxtaj c'u bic chi'; kas ri are xukuje' are ta xraj xel ta bic chanim, c'äjisam c'u u wäch rumal ri Ajawaxel.

²¹ Ri ajawinel Uziy xcanaj ajch'a'c c'ä pa ri k'ij ri xcämic, jeri' ri ajawinel xc'asi' jacha' ajch'a'c, xtastaj pa jun ja man xya' ta che chi coc ta chupam ri rachoch ri Ajawaxel, are c'u ri Jotam, ri u c'ojol pa u k'ab xcanaj wi ri ajawinic puwi' ri nim tinimit.

²² Ri u tz'akatil ri u tzijobelil ri Uziy, kas pa ri chapletajic c'ä pa ri q'uistajibal, xutz'ibaj ri Isaiy, k'axal tzij (ri u tat ri Isaiy are' ri Amoz).

²³ Aretak xcäm ri Uziy, xmuk cuc' ri e u mam chupam jun mukbal aj ajawinel, man c'u xsach ta pa qui jolom chi ajch'a'c. Are' c'u xajawin ri Jotam ri u cojol chupam ri u c'olbal.