Ucab Tzijobelil 24 - Quiché Bible

Ri rajawinic ri Joas

¹ Wukub u junab ri Joas aretak xuchaplej ajawinic; cawinak junab c'ut xajawin pa Jerusalen. Sibiy u bi' ri u nan, aj Beerseb.

² Ri e u banoj ri Joas e suc' chuwäch ri Ajawaxel, joropa' junab xbeytaj ri Joiad che cojol tabal tok'ob.

³ Ri Joiad xuc'uluba' cuc' quieb ixokilaxel ri xec'oji' u c'ojol xukuje' u mia'l ri Joas cuc'.

⁴ Oc'owinak chi c'u jun k'ijol, ri Joas xuchomaj ri u suc'umaxic ri rachoch ri Ajawaxel,

⁵ xebumulij c'ut ri e cojol tabal tok'ob xukuje' ri aj levitib xubij c'u chque: “Chixoj pa tak ri tinimit re Juda, chibij chque ri aj israelib chi chiquic'ama' ulok ri qui cuchuj che u suc'umaxic ri rachoch ri Ajawaxel. Chichuk'ubej c'ut u banic.” E are c'u ri aj levitib man xquichuk'ubej taj u banic.

⁶ Are c'u ri ajawinel xusiq'uij ri Joiad, qui nimal ri cojol tabal tok'ob xubij c'u che: “¿Jasche man e oquinak ta la il chi ri aj levitib quequic'am ulok ri qui cuchuj ri aj Juda xukuje' ri aj Jerusalen ri u bim ri Moises, ri pataninel rech ri Ajawaxel, chi cämol chquiwäch ri tinimit aj Israel che ri Lic'om Rachoch Dios re ri c'ulwächinic?”

⁷ Are' c'u ri Ataliy, ri kas are' ri etzelal, xukuje' ri e terenel tak rech, e boquinak chupam ri rachoch ri Dios e qui majin c'ut che qui k'ijilaxic tak ri e diosib conojel ri jastak ri e c'o chupam ri rachoch Dios.

⁸ Are c'u ri ajawinel xutak u banic jun caxa, xquiya' c'u chuchi' ri rachoch ri Ajawaxel, pa ri oquibal.

⁹ Xquesaj c'u u bixic pa ronojel ri Juda xukuje' Jerusalen chi rajawaxic caquic'am ulok che ri Ajawaxel ri cuchuj ri u yo'm u bixic ri Moises ri pataninel rech ri Ajawaxel ri xebutak wi ri aj israelib pa ri chaki'j uwo sak.

¹⁰ Conojel ri c'amal tak be xukuje' conojel ri winak xebopan che u ya'ic ri qui cuchuj chupam ri caxa ruc' ronojel ri qui rayibal, c'ä xquinojisaj na.

¹¹ Ri aj levitib caquic'am bic ri caxa chuwäch ri ajawinel rech cunic'oj; aretak c'u carilo chi q'ui chic ri puak ri c'olic, copan ri tz'ibal u tzijol ri ajawinel xukuje' jun u tako'n ri qui nimal ri e cojol tabal tok'ob caquijamij ri puak ri c'o chupam ri caxa, quequitzelej chi c'u can jumul chupam ri u c'olbal. Je c'u caquiban wa' ronojel k'ij q'ui c'ut ri puak ri caquimolo.

¹² Ri ajawinel rachil ri Joiad caquijach we puak ri' chque, ri c'amal tak u be ri chac ri cäban chupam ri rachoch Dios, rech quequitzucuj tzoc'ol tak abaj xukuje' ajanelab ri xebanow u banic ri rachoch ri Ajawaxel. Xukuje' rajawaxic quequitzucuj ajchaquib ri quechacun ri räx ch'ich' che u banic ri rachoch Dios.

¹³ Ri e c'amal tak qui be ri chac xeboc che u banic ri chac, utz c'u xel ri chac cumal ri xebanow u banic, chi ri rachoch Dios je xcanajic jas ri u banom can nabe utz c'u xquiban can che u banic.

¹⁴ Aretak xq'uis u suc'umaxic, xquic'am bic che ri ajawinel xukuje' che ri Joiad ri puak ri xto'tajic, xequitak c'u qui banic tak chaconisan ri quebajwataj chupam ri rachoch ri Ajawaxel, ri quebajwataj che qui banic tak ri k'ijilanic jacha' xukuje' chque tak ri tabal tok'ob ri quechajirisaxic, paq'uebal tak xukuje' niq'uiaj tak chaconisan chic re k'an puak xukuje' re sak puak. Xquitakej c'u na qui chi'xic tabal tok'ob ri quechajirisaxic joropa' k'ij xc'asi' na ri Joiad.

¹⁵ Xri'job c'ut ri Joiad, aretak c'u sibalaj e q'ui chic ri u junab, xcämic. Aretak xcämic c'o chic jun sient juwinak lajuj (130) ri u junab;

¹⁶ xmuk c'u chupam ri u Tinimit ri David, cuc' tak ri ajawinelab, rumal rech chi sibalaj utz xuban ruc' ri Israel, ruc' ri Dios xukuje' ruc' ri rachoch.

¹⁷ Aretak c'u cäminak chic ri Joiad, xebopan ri c'amal tak be re Juda xquiya' c'u u k'ij ri ajawinel. Xunimaj c'ut ri cojow c'uxaj ri xquiban che,

¹⁸ xquitzak c'u can ri rachoch ri Ajawaxel, ri qui Dios ri e qui mam, xequiya' c'u k'ijilanic chque tak ri e u wächbal ri Asera xukuje' chque jule' tak e diosib chic. Rumal we macaj ri' ri Ajawaxel xoyowar chrij ri Juda xukuje' chrij ri Jerusalen.

¹⁹ Ri Ajawaxel xebutak c'u ne ulok k'axal tak tzij chque rech caquibano chi quetzelej ruc'. Man xquiya' ta c'u qui xiquin ri winak chque ri qui pixbenic tak ri k'axal tak tzij.

²⁰ Are c'u ri Zacariy u c'ojol ri Joiad, cojol tabal tok'ob, xmajix rumal ri ruxlabal ri Dios, xutac'aba' rib puwi' jun tanatic xubij c'u che ri tinimit: “Ri Dios cubij: ‘¿Jasche man quebinimaj taj ri e nu takomal? ¿Jasche ri ix qui tzucuj ri kas i c'okoxic? ¡We c'u in i tzakom canok, xukuje' ri in quixintzak canok!’ ”

²¹ Xquijunamaj c'u qui tzij che u banic c'ax che, xequibuc'uj che abaj rumal ri u takanic ri ajawinel cho ri uwo ja rech ri rachoch ri Ajawaxel.

²² Ri ajawinel Joas xsach pa u jolom ri elebal c'uxaj ri xucoj ri Joiad, ri u tat ri Zacariy che ri ajawinel, xucämisaj c'ut ri Zacariy, ri u c'ojol, ri pa ri jok'otaj ri xcämic je xubij can wa': “¡Are' ba' ri Ajawaxel chilow wa' chutok'ij c'u na wa'!”

²³ Pa ri u tzelejibal ri junab, ri e rajch'ojab aj siriyab xepe che u banic ch'o'j ruc' ri Joas, aretak c'u xecuinic xeboc c'ä pa Juda xukuje' pa Jerusalen, xequicämisaj conojel ri c'amal tak u be ri nim tinimit, xquik'olk'otej ronojel xequitak c'u bic conojel ri jastak che ri ajawinel re Damasc.

²⁴ Man e q'ui taj ri ajch'ojab aj siriyab ri xebopan che u banic ri ch'o'j, xebujach c'ut ri Ajawaxel ri sibalaj q'uialaj ajch'ojab pa qui k'ab, rumal rech chi qui tzakom can ri Ajawaxel, ri qui Dios ri e qui mam. Are c'äjisabal wächaj wa' xurik ri Joas ri takal che.

²⁵ Aretak ri aj siriyab xetzelej chquij, nimalaj yawab xquiya' canok, xquiwalijisaj c'u quib ri e rach k'atal tak tzij chrij che u tojic ri u cämisaxic ri u c'ojol ri Joiad, cojol tabal tok'ob, kas c'u pa ri u ch'at xquicämisaj wi. Xquimuk c'ut chupam ri u Tinimit ri David, man chupam ta c'ut ri qui mukubal tak ri ajawinelab.

²⁶ Ri xquiwalijisaj quib chrij e are' wa' ri Zabad u c'ojol ri Simeat, jun aj amon, ri Jozab u c'ojol ri Simrit, jun aj moab.

²⁷ Ri e qui tzijobelil tak ri e u c'ojol ri Joas, ri e q'ui k'alajisanic ri xequiya' ri e k'axal tak tzij che u c'ulelaxic ri Joas ri u suc'umaxic ri rachoch ri Dios, ronojel tz'ibatal chupam ri u tzijobelil ri qui wujil tak ri ajawinelab. Are c'u xajawin na ri Amasiy, ri u c'ojol pa ri u c'olbal.