Ucab Tzijobelil 20 - Quiché Bible

Ch'äcanic puwi' ri Moab xukuje' ri Amon

¹ Oc'owinak chi c'ut jun k'ijol, ri aj moabib xukuje' ri aj amonib, xquijunaj qui tzij cuc' ri aj meunitab, che u banic ch'o'j ruc' ri Josapat;

² xebopan c'u jujun che u bixic che: “¡Pa Edom, ch'käp che ri Cäminak Cho, e petinak tinimit ajch'ojab che u banic ch'o'j uc' la! ¡E c'o chic pa Hazezon-tamar!” (Ri are' En-gad.)

³ Ri Josapat xuxe'j rib xuchomaj c'ut u tzucuxic ri Ajawaxel. Xresaj c'u u bixic chi man cäban ta wa'im pa ronojel Juda,

⁴ ri winak ri e c'o pa Juda xquimulij quib che u tz'onoxic to'banic che ri Ajawaxel. Xebopan c'u winak que conojel tak ri tinimit ri e c'o pa Juda.

⁵ Ri Josapat xutac'aba' rib pa u niq'uiajil ri tinimit re Juda ri u mulin rib pa Jerusalen, chuwäch ri c'ac' uwo ja rech ri rachoch ri Ajawaxel,

⁶ xtz'onon c'ut: “Ajawaxel, qui Dios ri e ka mam, ¡lal ri' ri Dios re chicaj, lal ri cättakan la paquiwi' conojel ri nimak tak tinimit! ¡Pa k'ab la e c'o wi ri chuk'ab xukuje' ri cuinem: man c'o ta jun cacuin ta che u k'atixic wäch la!

⁷ Ka Dios, lal xerokij la bic chuwäch ri tinimit la, Israel, ri winak ri e jekel cho we ulew ri' xa' c'u jumul xjach la pa qui k'ab ri e rija'lil ri Abraham, ri achil la.

⁸ Aretak c'u e jekel chic waral, xquiyac jun rachoch Dios che la, xquibij c'ut:

⁹ ‘We cäpe jun u q'ueyowal pakawi' jacha' jun c'äjisabal wächaj, we ne ch'o'j, cämisanel yabil o wi'jal, quelkaya' na kib chuwäch we achoch la ri', lal c'u c'o chupam we achoch la ri', chupam c'ut ri ka rikoj c'ax cakatz'onoj c'ut ri to'banic la, ri lal c'ut cujtatabej na la cujto'tajisaj c'u na la.’

¹⁰ Camic c'ut, e c'o ri aj amonib waral, ri aj moabib xukuje' ri e aj c'ache'laj re Seir, chquipam c'u tak we culew ri' man xaj ta la chi xeboc ta ri aj israelib chupam ri ebelinak ulok pa Ejipt. Xane' xquitasquib chquij man xquisachisaj ta c'u qui wäch.

¹¹ Che c'u tojbal rech wa', camic are cäcaj quech'ojin kuc' che ka rokixic bic chrij ri ulew la, ri ulew ri xya' la chke jacha' che kechbal.

¹² Ka Dios ¿La ma ta cäc'äjisaj la qui wäch? Ri uj man cubana' ta ri ka chuk'ab che u k'atixic qui wäch we q'uialaj ajch'ojab ri' ri cacaj quech'ojin kuc'. ¡Man cakach'ob taj jas cakabano; rumal c'u ri' ka yo'm ka wäch chi'j la!”

¹³ Ronojel ri Juda tac'al chuwäch ri Ajawaxel, e are' juch'ob ri quixokil ri e qui c'ojol, xukuje' ne ri ac'alab ri c'ä e chutik na.

¹⁴ Aretak c'u u mulin rib ronojel ri tinimit, ri Jahaziel, u c'ojol ri Zacariy xukuje' ri' u mam ri Benaiy. Ri Benaiy u c'ojol ri Jeiel xukuje' ri' u mam c'ut ri Mataniy, jun aj levi rija'lil ri Asap, xmajix rumal ri ruxlabal ri Ajawaxel

¹⁵ xubij c'ut: “Kas chixtatabenok, aj Juda xukuje' ri ix c'o pa Jerusalen, xukuje' ri at, ajawinel Josapat. Ri Ajawaxel cubij chiwe: ‘Mixbirbobic mawi mixe'j iwib chquiwäch we q'uialaj ajch'ojab ri', wa' we ch'o'j ri' man iwech taj ix xane' rech ri Dios.

¹⁶ Chixkaj bic chwek che u banic ch'o'j cuc'. Cätajin quepaki' ulok pa ri pakapic ri c'o pa Zis, quebirik c'u na chuchi' ri nima' ri c'o chuwäch ri chaki'j uwo sak ri c'o pa Jeruel.

¹⁷ Man ix taj ri quixech'äcow ri ch'o'j. Chixc'ol pa ri i c'olbal, xak jun chixc'ol wi quiwil c'u na ri cuban na ri Ajawaxel che i to'tajisaxic. ¡Aj Jerusalen xukuje' conojel ri e aj Juda, mixbirbobic mawi mixe'j iwib; chixoj chwek che u banic ch'o'j cuc', c'o c'ut ri Ajawaxel iwuc'!’ ”

¹⁸ Are c'u ri Josapat xxuquic xupachba' rib c'ä na ri u palaj cho ri ulew, e are' c'ut ri aj Juda xukuje' ri aj Jerusalen xquimej quib chuwäch ri Ajawaxel che u ya'ic k'ijilanic che.

¹⁹ Ri aj levitib ri e rija'lil ri Coat xukuje' ri e rija'lil ri Core co xquirak qui chi' che u k'ijilaxic ri Ajawaxel, ri u Dios ri Israel.

²⁰ Sibalaj c'u ak'ab xewalij chucab k'ij che u takexic qui be pa ri chaki'j uwo sak re Teco. Pa ri jok'otaj ri quebel bic, ri Josapat xutac'aba' rib che u bixic chque: “Chinitatabej, aj Jerusalen xukuje' ri e aj Juda: chi cuba' i c'u'x chrij ri Ajawaxel, ri i Dios, man c'o ta c'u qui c'ulmaj na; chi cuba' i c'u'x chquij tak ri e k'axal tzij ronojel c'ut utz quel na chiwäch.”

²¹ Chomaninak chi c'ut ruc' ri tinimit, xebuc'ut c'ut jujun aj bixab, ri e quicojom chic tastalicalaj tak catz'iak chenabej c'ut chquiwäch ri achijab ri e benak che u banic ch'o'j caquiya' c'u na k'ijilanic che ri Ajawaxel ruc' ri bix: “Chiya' maltioxinic che ri Ajawaxel, rumal rech chi junalic ri u lok'ok'ebal c'uxaj.”

²² Pa ri jok'otaj c'ut aretak xquichaplej quibixoxic bix ruc' quicotemal, bix re k'ijilanic, ri Ajawaxel xubano chi xwalij jun yojcorem chquixo'l ri aj amonib, ri aj moabib xukuje' chquixo'l ri e petinak pa ri c'ache'laj re Seir, ri e petinak che u banic ch'o'j ruc' ri Juda, xech'äcataj c'ut.

²³ Are c'ut ri aj amonib xukuje' ri aj moabib xech'ojin cuc' ri e petinak pa ri c'ache'laj Seir xquiq'uis c'ut tzij paquiwi', aretak c'u e qui cämisam chic conojel, xequicämisala' tak quib e are'.

²⁴ Aretak ri achijab re Juda xebopan pa ri c'olbal jawije' ri caquil wi apan ri chaki'j uwo sak, xequica'yej c'u apan ri ajch'ojab ri e c'ulel, xuwi cäminakib xequilo ri e liq'uin tak cho ri ulew. ¡Mawi ta ne jun xcuinic xanimajic!

²⁵ Xbe c'ut ri Josapat xukuje' ri winak ri e c'o ruc' xebe che u molic ri xquiya' can ri c'ulel, e q'ui ri wacax, ch'ojibal, atz'iak xukuje' jastak ri pakal cajil, ronojel xquiban quech che. Sibalaj e q'ui ri jastak ri e c'olic, man c'u xecuin ta che qui c'amic bic. Rumal c'u rech ri qui q'uiyal, xebeytaj oxib k'ij che qui molic tak ri jastak.

²⁶ Chucaj k'ij xquimulij quib pa ri beya' re Berac, chila' c'u xetewichi'n wi che ri Ajawaxel. Rumal ri' xquicoj Berac che u bi' we c'olbal ri', c'ä c'o c'ut we bi'aj ri chrij camic.

²⁷ Conojel c'ut ri achijab aj Juda xukuje' ri aj Jerusalen c'amom qui be rumal ri Josapat xetzelej pa Jerusalen ruc' nimalaj quicotemal, are c'u xbanow ri Ajawaxel chque chi xejajat paquiwi' ri qui c'ulel.

²⁸ Aretak xebopan pa Jerusalen, xeboc chupam ri rachoch ri Ajawaxel cuc' nimalaj arp, ri guita'r ri sibalaj q'ui u c'amal, xukuje' trompet.

²⁹ Aretak xetamatajic chi ri Ajawaxel are' ri xucoj u chuk'ab cuc' ri u c'ulel ri Israel, conojel ri nimak tak tinimit xenoj che xe'n ib chuwäch ri Dios.

³⁰ Je c'u ri' ri rajawinic ri Josapat xtaken pa jamaril, are c'u ri Ajawaxel Dios xyo'w ri jamaril che cuc' ri winak pa tak ri ulew ri e c'o che u c'ulja.

Ri u q'uisbalil ri rajawinic ri Josapat

³¹ Xajawin c'ut ri Josapat puwi' ri Juda. Juwinak olajuj (35) u junab aretak xuchaplej ajawinic, juwinak job (25) junab c'ut xajawin pa Jerusalen. Azub, u bi' ri u nan, u mia'l c'ut ri Sili.

³² Ri Josapat colom xbinic jacha' ri As, ri u tat. Ri e u banoj e suc' chuwäch ri Ajawaxel.

³³ Man e esam ta c'u ne ri k'ijilabal ri quek'ijilax wi ri diosib, ri winak c'amaja' qui jachom quib che u takexic ri qui Dios ri e qui mam.

³⁴ Ri u tz'akat ri u tzijobelil, kas pa ri chapletajic c'ä pa ri q'uisbalil, tz'ibatal chupam ri u tzijobelil ri Jehu, u c'ojol ri Hanani, c'o c'u chupam ri qui wuj tak ri ajawinel re Israel.

³⁵ Chumatam chic, ri Josapat, ajawinel re Juda, xujunaj rib ruc' ri Ocoziy, ajawinel re Israel, ri ruc'am jun itzelalaj c'aslemal.

³⁶ Xuban k'uch ruc' che qui banic tak jucub ri quebe ta pa Tarsis, xequiwoc c'ut pa Ezion-jeber.

³⁷ Are c'u ri Eliezer ri aj Mares, u c'ojol ri Dodab, xuya' u bixic ri cuc'ulmaj na ri Josapat: “Ri Ajawaxel cubana' ch'akatak che ri banom la, rumal rech chi xjunaj ib la ruc' ri Ocoziy.” Kas, c'u ne tzij, ri e jucub xequiban ch'akatak man xecuin ta chic xebe pa Tarsis.