Ucab Tzijobelil 19 - Quiché Bible

Ri Jehu k'axal tzij cuyaj ri Josapat

¹ Ri Josapat ajawinel re Juda, e utz rakan u k'ab xtzelej chupam ri rachoch ri c'o pa Jerusalen.

² Are c'u ri Jehu, ri k'axal tzij, u c'ojol ri Hanani, xel ulok che u c'ulaxic xuc'ot c'u u chi': “¿Jasche cato' la ri lawalo cäban c'u la utz cuc' ri e u c'ulel ri Ajawaxel? rumal c'u rech wa', ri Ajawaxel oyowarinak uc' la.

³ E c'o c'u ne niq'uiaj jastak chic ri cäto'w wi' la e yojim c'u la ri e qui wächbal tak ri Asera ri e c'o can pa ri ulew yo'm c'u tzij la che u tzucuxic ri Dios.”

Ri Josapat quebucoj k'atal tak tzij

⁴ Ri Josapat jekel pa Jerusalen, u nak'atisam c'u rib cusolij ri u tinimit, kas pa Beerseb c'ä pa tak ri juyub re Eprain, rech cuban chque chi quetzelej ruc' ri Ajawaxel, ri qui Dios ri e qui mam.

⁵ Xebucoj c'u ne k'atal tak tzij pa conojel tak ri tinimit ri e c'o pa Juda ri e kasan pa tak tapia, chquijujunal.

⁶ Xubij c'u chque ri k'atal tak tzij: “Kas chixoc il che rilic ri qui bano, man quebik'ata' ta c'u tzij pa ri qui bi' ri achijab, xa ne pa ri u bi' ri Ajawaxel, ri cac'oji' na iwuc' aretak qui ban ri k'atan tzij.

⁷ Je ba' ri' nim chiwila' wi ri Ajawaxel kas chi xoc il che ri qui bano, rumal rech chi ri Ajawaxel ri ka Dios man xak ta cucoch'o chi cäban ta ri man suq'uil taj, ri jalan wächaj mawi ri u pa k'abaj.”

⁸ Xukuje' xebucoj ri Josapat pa Jerusalen jujun aj levitib, e cojol tabal tok'ob xukuje' ri c'amal tak qui be ri jujun tak ja aj Israel, rech quebux k'atal tak tzij pa ri jastak aj cojonic xukuje' tak ri ch'o'j ri cäpe chquixo'l ri winak ri e c'o pa Jerusalen.

⁹ Xebuya' c'u tak we pixbenic ri' chque: “Ri ix rajawaxic chi nim quiwil wi ri Ajawaxel, chi ix jic chi ix tz'akatisanelab.

¹⁰ Pa apachique ch'o'j chquixo'l ri i winakil, ri winak ri quepe pa jalan tak tinimit, ri caquic'am ulok cämisanic chiwäch rech qui wilo we c'o nim eklenic o jayi', o che qui cojic ri jalan tak pixab, takomal, cholajil xukuje' k'atan tzij, chebipixbej chi memacun chuwäch ri Ajawaxel, rech man coyowar taj ri are' chiwij xukuje' chquij are. Je chibana' wa', man quixux ta c'u na ajchak'maquib.

¹¹ Ri qui nimal ri e cojol tabal tok'ob ri Amariy are caban ri cubij pa conojel ri jastak re ri Ajawaxel, are c'u ri Zebadiy, ri u c'ojol ri Ismael ri xukuje' c'amal u be ri ramak' ri Juda, are' cak'atow na tzij paquiwi' ri jastak re ri ajawinel; ri aj levitib e are' to'l tak iwech. ¡Chichajij ba anima', chixoc c'u che u banic ri chac! ¡Chc'ol ba' ri Ajawaxel ruc' ri utz cachacunic!”