Ucab Tzijobelil 18 - Quiché Bible

Ri Micaiy cuya' u bixic ri u ch'äctajic ri Acab

¹ Ri Josapat xeburik nimak tak k'inomal xukuje' nimarisabal tak k'ij, xux rachalaxic ri Acab.

² Oc'owinak chi c'u quieb oxib junab, ri Josapat xbe pa Samar che u solixic ri Acab, wa' xebupil q'ui chij xukuje' wacax che u nimak'isaxic ri Josapat xukuje' tak ri e rachil, xuchomaj c'u u c'amic u pa u chi' we cäraj cäbe ruc' che u banic ch'o'j ruc' ri Ramot re Galaad.

³ Ri Acab, ajawinel re Israel, xuc'ot na u chi' ri Josapat ajawinel re Juda: “¿La caj la quinachilaj la cujbe che u banic ch'o'j ruc' ri Ramot re Galaad?” Ri Josapat xutzelej u bixic che: “In, xukuje' ri wajch'ojab, uj c'o uc' la xukuje' cuc' ri winak la che u banic ri ch'o'j.

⁴ Tz'onoj c'u na la nabe ri u rayibal ri Ajawaxel.”

⁵ Ri ajawinel re Israel xebumulij tak ri e k'axal tak tzij, ri e quiejeb sient, xuc'ot c'u qui chi': “¿La cujbe che u banic ch'o'j ruc' ri Ramot re Galaad, o man cujbe taj?” Ri e are' xquitzelej u bixic che: “Choj la jech'ojin la ruc', cujach c'u na ri Ajawaxel pa k'ab la.”

⁶ Xc'otow c'u chi'aj ri Josapat: “¿La ma ta c'o chic jun k'axal u tzij ri Ajawaxel waral ri xukuje' cuya' cujch'obon ta wi?”

⁷ Ri ajawinel re Israel xutzelej u bixic che ri Josapat: “C'o chi na jun, ri cuya' cakata' wi ka no'j che ri Ajawaxel. Are' ri Micaiy, u c'ojol ri Imla. Quinwetzelaj c'u u wäch, rumal rech chi mawi ta ne jumul quebubij ta utzalaj tak jastak chwe, xa ne amak'el quebubij itzel tak jastak chwe.” Xubij c'ut Josapat che: “Mäbij la wa'.”

⁸ Are c'u ri ajawinel re israel xusiq'uij jun tako'n, xuya' c'u takanic che: “¡Chanim, chpetaxtax ri Micaiy, u c'ojol ri Imla!”

⁹ Ri ajawinel re Israel jacha' xukuje' ri Josapat, ri ajawinel re Juda, catz'iakim ri qui ch'ojibal e t'uyut'uj paquiwi' ri e qui tem re ajawibal pa ri lilic ri c'o chunakaj ri roquibal ri Samar, conojel c'ut ri e k'axal tzij quetzakic quemoxir chquiwäch je jas ri caquiban ri e k'axal tzij.

¹⁰ Ri Sedequiy, u c'ojol ri Quenaan, e u banom jujun uc'a' re ch'ich', curak c'u u chi': “¡Je wa' u bim ri Ajawaxel: ‘Cuc' tak we uc'a' ri' quebacämisaj na ri aj siriyab c'ä caq'uis na tzij paquiwi'!’ ”

¹¹ Conojel ri e k'axal tzij xak junam ri caquiya' u bixic. Caquibij che ri ajawinel: “Jech'ojin la ruc' ri Ramot re Galaad cäch'äcan c'u na la, ri Ajawaxel cujach na ri tinimit pa k'ab la.”

¹² Ri tako'n ri xbe che u siq'uixic ulok ri Micaiy, xubij wa' che: “Conojel ri e k'axal tzij, chnimalaj conojel, utz ri qui yo'm u bixic che ri ajawinel. Je c'u ri' catinbochi'j chi je chatch'awok jacha' ri e ch'awinak ri e are' chaya' u bixic jun utzalaj jasach.”

¹³ Ri Micaiy xutzelej u bixic che: “¡Quinban na ri chi'nic ri kas cäban na pa ri u bi' ri Ajawaxel chi xuwi ri cubij na ri Dios chwe are ri' quinbij na!”

¹⁴ Xutac'aba' c'u rib chuwäch ri ajawinel, xc'ot c'u u chi' rumal ri ajawinel: “Micaiy, ¿La ya'talic chi cujbe che ch'ojinic ruc' ri Ramot re Galaad o jayi'?” Xubij c'ut ri Micaiy: “Chixech'ojinok, quirik c'u na ri ch'äcanic, cujach c'u na ri Dios pa i k'ab.”

¹⁵ Are' c'u ri ajawinel xutzelej u bixic che: “¿Joropa' ta mul quinbij ta na chawe chuxe' chi'nic ri kas cäban na chi xuwi chak'alajisaj ri kastzij chwe?”

¹⁶ Xubij c'ut ri Micaiy: “E wilom conojel tak ri aj israelib qui jabum tak quib pa tak ri juyub, e jacha' chij ri man c'o ta cajyuk'. U bim c'ut ri Ajawaxel: ‘Wa' man e c'o ta cajyuk'; chquijujunal che tzelej cho tak cachoch pa jamaril.’ ”

¹⁷ Ri ajawinel re Israel xubij che ri Josapat: “¿La ma ta nu bim chawe chi we achi ri' mawi jumul quebubij ta utzalaj tak jastak chwe, xa ne xuwi c'axalaj tak jastak?”

¹⁸ Ri Micaiy xutiko: “Rumal rech wa' we bim la chwe, tatabej alak ri u tzij ri Ajawaxel: Xinwil ri Ajawaxel t'uyul puwi' ri u tem re ajawibal, conojel c'ut ri e c'o chicaj, ri e tac'atoj, ruc', pa ri riquiak'ab xukuje' pa ri u mox k'ab.

¹⁹ Xuban c'ut ri Ajawaxel we c'otoj chi'aj ri' xubij: jachin ri cäbe na che u takchi'xic ri Acab, ajawinel re Israel, rech quech'ojin ruc' ri Ramot re Galaad rech cäch'äctaj chila'. Jujun xquibij jun jasach jujun chi c'ut xquibij chi jun jasach.

²⁰ Jun uxlabal c'ut xopan chuwäch ri Ajawaxel xubij c'ut chi are' cabanow na. Ri Ajawaxel xuc'ot u chi' jas cuban che u banic,

²¹ ri uxlabal xutzelej u bixic chi queruxlabaj banoj tak tzij pa ri canima' conojel ri e k'axal u tzij ri ajawinel. Xubij c'ut ri Ajawaxel che chi, kas cäticar na che u subic, jät c'u che u banic.

²² Eta'm chi c'u la camic chi are' ri Ajawaxel cojowinak jun uxlabal banal tzij chi qui chi' we e k'axal tzij che la, xa' c'u jumul u bim chi cayojyob la.”

²³ Are' c'u ri Sedequiy, u c'ojol ri Quenaan, xkeb chuxcut ri Micaiy xutzokopij jun t'ocom k'ab chupalaj xubij c'ut: “¿Jachique be xoc'ow wi ri ruxlabal ri Ajawaxel chwe che a ch'abexic at?”

²⁴ Ri Micaiy xutzelej u bixic che: “Quetamaj na la pa ri k'ij aretak quec'olow na ib la chi' tak ja.”

²⁵ Xuya' c'u takanic ri ajawinel re Israel: “¡Chichapa' ri Micaiy yututulic chic'ama' bic chuwäch ri Amon, ri k'atal tzij pa ri tinimit, xukuje' chuwäch ri Joas, ri nu c'ojol!

²⁶ Chibij chque chi in quintakanic chi chquinima' chupam ri che' xa' c'u jubik' ri u caxlanwa xukuje' ri ruq'uia' chiya', c'ä quintzelej na ulok e utz wakan nu k'ab.”

²⁷ Xubij chi na ri Micaiy: “We e utz akan k'ab la cätzelej la ulok, ri Ajawaxel man ch'awinak ta wumal in.”

²⁸ Je c'u ri' ri ajawinel re Israel, xukuje' ri Josapat, ri ajawinel re Juda, xquitakej qui be xebe che u banic ch'o'j ruc' ri Ramot re Galaad.

²⁹ Are' c'u ri ajawinel re Israel xubij che ri Josapat: “In quinpoyisaj wib quinoc na pa ri ch'o'j, are c'u ri lal quebecoj na la ri watz'iak.” Xupoyisaj c'u rib ri ajawinel re Israel, quicabichal c'ut xeboc pa ri ch'o'j.

³⁰ Are c'u ri ajawinel re Siriy u yo'm takanic chque ri quetakan paquiwi' tak ri carwaj re ch'o'j chi maquitzucuj u cämisaxic jachin jun we ta mat are' ri ajawinel re Israel.

³¹ Ri quetakan paquiwi' tak ri carwaj aretak xquil ri Josapat, are pa qui c'u'x chi are' ri ajawinel re Israel xquisutij c'u rij che u cämisaxic. Xurak c'u u chi' ri Josapat xutz'onoj to'banic, xto' c'ut rumal ri Ajawaxel. Ri Dios xebupakchi'j,

³² aretak c'u xquilo chi man are' ta ri ajawinel re Israel, xequik'il quib che u banic c'ax che.

³³ C'o c'u jun ajch'o'j ri xak xutzokopij ri u ch'ab pa ri quiakik', xusoc c'ut ri ajawinel re Israel che cämical chuxo'l ri u tikom wi rib ri ratz'iak re ch'o'j. Xuya' c'u takanic che ri c'amal u be ri u carwaj: “Chattzelej chawij chinawesaj bic pa ri ch'o'j, nim ri socotajic ri nu rikom.”

³⁴ Sibalaj c'u xnimataj na ri ch'o'j pa ri k'ij ri', rumal ri' ri ajawinel re Israel xucoj u chuk'ab che u tac'abaxic apan rib chupam ri u carwaj chquiwäch ri aj siriyab c'ä benak k'ij, xcäm c'ut pa ri u benabal k'ij.