Ucab Tzijobelil 17 - Quiché Bible

Ri rajawinic ri Josapat

¹ Che ri u q'uexwäch ri As are' xajawin ri Josapat ri u c'ojol, ri co xutac'aba' rib che u c'amic u be ri Israel.

² Xebucoj ajch'ojab pa conojel tak ri tinimit ri e c'o pa Juda ri e kasan pa tak tapia, xukuje' tak chajinelab pa ronojel ri rulewal ri Juda xukuje' chquipam tak ri tinimit re Eprain ri e u tokim ri As, ri u tat.

³ Ri Ajawaxel xc'oji' ruc' ri Josapat, rumal rech chi je xubano jacha' ri xuban ri David, ri u mam. Man xebupatanij taj ri jalan tak u wächbal ri Baal,

⁴ xane' are' xupatanij ri u Dios ri u mam, xebutz'akatisaj tak qui banic tak ri e u takomal man xutakej ta u banic rech ri cäquiban ri winak aj Israel.

⁵ Rumal ri', ri Ajawaxel co xutiq'uiba' ri ajawinic chuxe' ri u takanic. Ronojel ri Juda quelquiya' tak sipanic che, sibalaj c'u xk'inomaric xukuje' sibalaj xnimar u k'ij.

⁶ Xuchajij anima' che qui takexic ri be ri e juch'um rumal ri Ajawaxel, xutakej chi c'ut quesaxic tak ri k'ijilabal ri quek'ijilax wi tak ri diosib ri e c'o pa Juda xukuje' tak ri e u wächbal tak ri Asera.

⁷ Pa ri urox junab ri rajawinic xebutak bic ri e rach k'atal tak tzij ri Ben-ail, Abdiy, Zacariy, Natanael xukuje' ri Micaiy, che u ya'ic tijonic chquipam tak ri tinimit ri e c'o pa Juda,

⁸ xecachilaj c'u tak bic ri aj levitib Semaiy, Netaniy, Zebadiy, Asael, Semiramot, Jonatan, Adoniy, Tobiy xukuje' ri Tobadoniy. E achilatal cumal ri Elisam xukuje' ri Joram e cojol tabal tok'ob.

⁹ Xebutak bic rech, ruc' ri wuj re ri u pixab ri Ajawaxel, che qui tijoj ri winak re Juda. Xequibinibej c'u conojel tak ri tinimit ri e c'o pa Juda xequitijoj c'ut ri winak.

¹⁰ Conojel c'u tak ri e cajawibal tak ri ulew ri e c'o che u c'ulja ri Juda sibalaj qui xe'n quib chuwäch ri Ajawaxel rumal c'u ri' man caquichajij ta anima' che u banic ch'o'j ruc' ri Josapat.

¹¹ Xa c'u ne e c'o jujun aj pilisteyib, que qui c'am ulok tak sipanic xukuje' sak puak jacha' tojbal che ri Josapat, are c'u ri aj arabib xequic'am ulok wukub mil wukub sient ama'ib tak chij xukuje' tak q'uisic' ri junam cajilabal.

¹² Nojimal c'ut, xc'oji' sibalaj u chuk'ab ri Josapat. Xebuyac tak tapia pa Juda xukuje' tak tinimit che qui c'olajixic tak ri jastak,

¹³ xec'oji' c'u e q'ui rachoch chquipam tak ri tinimit ri e c'o pa Juda. Xukuje' xec'oji' cowilaj tak rajch'ojab pa Jerusalen,

¹⁴ ri cajilabal, ri quepe che ri u wi' tak qui jolom, e are wa': Ri e aj Juda, ri takanel paquiwi' ri e c'amal qui be ri jujun tak mil ajch'ojab, c'o ri Adnas paquiwi' oxib sient mil (300,000) ajch'ojab.

¹⁵ Ri c'o chic chuxcut wa' are' ri c'amal be Johanan ri c'o paquiwi' quieb sient jumuch' mil (280,000) ajch'ojab,

¹⁶ ri c'o chic chuxcut wa' are' c'o ri Amasiy, u c'ojol ri Zicr, ri xuchi'j rib pa rech wi che u patanixic ri Ajawaxel, e ruc'am quieb sient mil (200,000) cowilaj tak ajch'ojab.

¹⁷ Che ri Benjamin c'o ri Eliad, jun cowilaj banal ch'o'j, c'o paquiwi' quieb sient mil (200,000) achijab ri e cuc'am tak qui q'uiakbal tak qui ch'ab xukuje' qui quetecak tak ch'ich',

¹⁸ ri c'o chic chuxcut wa' are' ri Jozabad c'o paquiwi' jun sient jumuch' mil (180,000) achijab ri xak e suc'umatal che u banic ch'o'j.

¹⁹ E c'o c'u tak wa' che u patanixic ri ajawinel, man c'u queboc ta pa ajilabal ri e u cojom ri ajawinel che qui chajixic tak ri tinimit ri e c'o pa Juda ri e kasan pa tak tapia.