Ucab Tzijobelil 16 - Quiché Bible

Ri As xujunamaj u tzij ruc' ri Ben-adad

¹ Chupam c'ut ri juwinak waklajuj junab ri rajawinic ri As, ri ajawinel re Israel, ri Baas, xpe che u banic ch'o'j ruc' ri Juda, xuban c'u u banic ri Ram rech ma ta c'o jun cäbec mawi ri cätzelej ta ulok ruc' ri ajawinel re Juda.

² Are' c'u ri As xresaj ulok ri k'an puak xukuje' ri sak puak chupam ri u k'inomal ri rachoch ri Ajawaxel xukuje' ri c'o chupam ri rachoch ri ajawinel, xebutak bic che ri Ben-adad, ajawinel re Siriy, ri u jekebam rib pa Damasc. Xukuje' xutak u bixic we takquil ri' che:

³ “Kabana' jun c'ulwächinic chakaxo'l, jacha' ri xquiban ri e ka tat. Nu takom ulok k'an puak xukuje' sak puak che la. Chyojij la ri c'ulwächinic ri banom la ruc' ri Baas, ajawinel re Israel, we je cäban la wa' quinuya' na canok pa jamaril.”

⁴ Ri Ben-adad utz xuta' ri xbix che rumal ri ajawinel As, xebutak c'u bic ri e qui nimal tak ri e rajch'ojab che u banic ch'o'j cuc' tak ri tinimit ri e c'o pa Israel. Je xquiban wa' che u ch'äquic Ijon, Dan, Abel-maim xukuje' conojel tak ri tinimit re Neptali ri quebajwataj che tanibal jastak.

⁵ Aretak xoc pa u jolom ri Baas, xutanaba' u banic ri Ram, xebuk'il qui banic tak ri chac ri cätajin cubano.

⁶ Are c'u ri ajawinel As xumulij ronojel ri Juda, xebe che qui c'amic ulok tak ri abaj ri che' ri e u cojom ri Baas che u banic cuc' c'u wa' xuban qui banic ri Jeb xukuje' ri Mizpa.

⁷ Pa ri k'ijol ri' xopan ri Hanani k'axal tzij che u solixic ri As, ajawinel re Juda, che c'u u bixic che: “Ri e rajch'ojab ri ajawinel re Siriy e tzakom la, u mac rech chi xcu'ba' c'u'x la chrij ri ajawinel re Siriy man chrij ta c'ut ri Ajawaxel xcu'ba' ta wi c'u'x la.

⁸ Ri aj etiopiyib cachil tak ri aj libiyib, ¿La ma ta e jumulaj ajch'ojab ri sibalaj c'o qui cuinem, e cachil c'u q'uialaj ajquiejab xukuje' tak carwaj que ch'o'j? Xebujach c'ut ri Ajawaxel pa k'ab la rumal rech chi xcu'ba' c'u'x la chrij.

⁹ Ri Ajawaxel cäril ronojel ri cac'ulmataj cho ronojel ri uwächulew, rech cuya' qui chuk'ab ri kas caquicu'ba' qui c'u'x chrij are'. ¡Banom c'u la jun conil! Kas c'u camic cächaptaj bic quepe chi na ch'o'j pa wi' la.”

¹⁰ Sibalaj c'u xpe royowal ri As che ri k'axal tzij, xutak c'u u cojic pa che', xukuje' pa tak ri k'ij ri' nim ri c'ax ri xuban chque jujun aj tinimit.

Ri u cämical ri As

¹¹ Ri u tzijobelil ri As, kas pa ri tiquiritajic c'ä pa ri q'uisbalil, tz'ibatal chupam ri qui wuj tak ri ajawinelab re Juda xukuje' re Israel.

¹² Chupam ri u juwinak belejlajuj junab ri rajawinic, ri As sibalaj xyawaj chque ri rakan; man xutzucuj ta c'ut ri Ajawaxel che u cunaxic ri u yabilal xane' are xebutzucuj ri ajcunab.

¹³ Xcäm pa ri u cawinak jun (41) junab ri rajawinic,

¹⁴ xmuk c'u chupam ri mukubal ri xutak u banic chupam ri u Tinimit ri David. Xya' chupam jun alaj ch'at ri nojinak che c'oc'al xukuje' ronojel qui wäch cunabal ri quec'oc'atic ri sibalaj je'l qui suc'umaxic xbanic. Xnicowisaxtax c'ut jun nimalaj k'ak' che u ya'ic u k'ij.