Ucab Tzijobelil 15 - Quiché Bible

Ri As cucolomaj ri k'ijilanic

¹ Ri Azariy, u c'ojol ri Obed, nojinak che ri ruxlabal ri Dios,

² xel bic che u c'ulaxic ri As che u bixic che: “¡Chintabej la, As, xukuje' conojel ri aj Juda xukuje' ri aj Benjamin! Ri Ajawaxel c'o uc' alak, we c'o alak ruc'. We c'u cäya' can alak, cärik na alak; we c'u catzakan alak, xukuje' ri are' cäya' can alak rumal.

³ Ri Israel q'ui k'ijol canajinak man c'o ta ri kas Dios ruc', man c'o ta cojol tabal tok'ob catijonic man c'o ta tijonic re k'ijilanic cäya' ta che.

⁴ Aretak c'u e c'o pa u niq'uiajil ri qui c'axc'olil, tzelejinak c'ut ri tinimit ruc' ri Ajawaxel, ri u Dios ri Israel, u tzucum c'ut, ri are' u yo'm rib pa rikic.

⁵ Pa tak c'ut ri k'ijol ri' man c'o ta can jamaril che jachin jun, xane' xuwi elem tak ch'ujilal c'o chquixo'l ri winak pa ri jalan tak ulew.

⁶ Ri nimak tak tinimit xukuje' ri tinimit tak caquisachisala' tak qui wäch chquibil tak quib, are' c'u ri Ajawaxel cäsachow ri qui no'j che qui rikic ronojel qui wäch tak c'axc'olil.

⁷ Are c'u ri ix chixux cowilaj tak achijab mixchucchubic, quirik c'u na tojbal quech ri chac ri quebibano.”

⁸ Aretak ri As xuta' ri xubij ri k'axal tzij, xc'oji' u chuk'ab xusachisaj c'u qui wäch ri e xawebalalaj tak diosib ri e c'o pa ronojel ri rulewal ri Juda xukuje' Benjamin xukuje' chquipam tak ri tinimit ri e u ch'äcom pa tak ri c'ache'laj re Eprain, xucolomaj c'ut ri porobal ri rech ri Ajawaxel Dios ri c'o chuwäch ri u rakan ja ri rachoch ri Ajawaxel.

⁹ Xebumulij c'u conojel ri aj Juda xukuje' ri aj Benjamin, xecachilaj ri man e qui winakil taj ri e c'o cuc' ri e petinak pa Eprain, pa Manases xukuje' pa Simeon, e q'ui c'ut ri aj Israel ri e k'axenak ruc' ri As, aretak xquilo chi ri Ajawaxel ri qui Dios c'o ruc'.

¹⁰ Xquimulij quib pa Jerusalen pa ri urox ic' re ri olajuj junab ri rajawinic ri As,

¹¹ ri tabal tok'ob ri xquichi'j che ri Ajawaxel pa ri k'ij ri', wukub sient (700) wacax xukuje' wukub mil (7000) chij, ri xequitokij ulok chque ri e qui c'ulel.

¹² Xquiya' c'u qui tzij xuwi che u tzucuxic ri Ajawaxel ruc' ronojel canima'; ri qui Dios ri e qui mam.

¹³ Xquichi'j c'ut chi apachin ta ne ri man cutzucuj taj ri Ajawaxel, ri u Dios ri Israel, we e c'o chic u junab o c'amaja' quetz'akat u junab, achi o ixok, cac'okox na che cämical.

¹⁴ Xiquiban na ri chi'nic ri kas cäban na chuwäch ri Ajawaxel ruc' cowilaj rakoj chi'aj xukuje' cuc' rakoj tak chi'aj re quicotemal cuc' c'u cok'ebal tak trompet xukuje' tak cuc'a' chij.

¹⁵ Ronojel ri Juda sibalaj xquicot rumal ri chi'nic ri kas cäban na ri chokinak wi, ri qui banom ruc' c'u ronojel canima' ri chi'nic ri kas cäban na xecha', xukuje' ruc' ronojel ri qui rayibal qui tzucum ri Ajawaxel, u c'utum c'u rib ri are' chquiwäch u yo'm c'ut ri jamaril chque cuc' conojel tak ri qui c'ulja.

¹⁶ Ri ajawinel As xukuje' xresaj ri u k'ij ri ajawinel ixok' nanaxel che ri Maac, ri rati't, rumal rech chi xutak u banic jun u wächbal ri Asera. Ri As xusachisaj u wäch we wächbal ri'; xuban ch'akatak che xuporoj c'u chuchi' ri alaj nima' Sedron.

¹⁷ Pune' c'u man xebesax taj pa Israel ri k'ijilabal ri quek'ijilax wi ri diosib, ri As xcanaj jic amak'el,

¹⁸ xucoj c'u chupam ri rachoch ri Dios ronojel ri k'an puak xukuje' ri sak puak ri tasom rumal ri u tat che ri Ajawaxel xukuje' ri u tasom ri are'.

¹⁹ Man c'o ta chi c'u ch'o'j xbanic c'ä pa ri juwinak olajuj (35) junab ri rajawinic ri As.