Ucab Tzijobelil 14 - Quiché Bible

Rajawinic ri As pa Juda

¹ Aretak ri Abiam xcämic xmuk chupam ri u Tinimit ri David. Are c'u xajawin ri u c'ojol pa ri u c'olbal, ri As u bi'. Pa ri rajawinic lajuj junab xc'oji' jamaril pa ri ulew.

² Ri e u banoj tak ri As e colom xeril ri Ajawaxel ri u Dios.

³ Xeresaj ri porobal ri quek'ijilax wi tak ri jalan tak diosib, xukuje' ri e k'ijilabal ri quek'ijilax wi ri diosib; xebumuch ri tastalicalaj tak abaj xebupaxij ri e u wächbal tak ri Asera.

⁴ Xutakchi'j c'ut ri Juda chi chutzucuj ri Ajawaxel, ri qui Dios ri e qui mam, xukuje' chi chquitz'akatisaj qui banic ri pixab xukuje' tak ri takomal.

⁵ Xeresaj chquipam tak ri tinimit re Juda ri k'ijilabal xukuje' tak ri porobal ri quek'ijilax wi tak diosib. Xjeki' c'ut ri jamaril joropa' k'ijol xajawinic.

⁶ Xerechbej c'u tak we junab ri' aretak ri nim tinimit c'o pa jamaril man c'o ta c'u jun ch'o'j xpe ta puwi', rumal rech chi xuya' jamaril ri Ajawaxel che, ri As xebuyac tak tinimit pa Juda ri xebucoj tak tapia chquij.

⁷ Xubij c'u chque ri aj Juda: “Chekacowirisaj we tak tinimit ri' chekakasaj pa tak tapia, tac'atak tak ja, oquibal tak xukuje' bolobak tak ch'ich' chque, utz c'ac'o ri ulew pa ka k'ab. Rumal rech chi ka tzucum ri Ajawaxel ri ka Dios, ri are' u yo'm jamaril chke cuc' conojel tak ri e ka c'ulja.” Rumal c'u ri' xecuinic xequiq'uis qui yaquic tak ri yacanic.

⁸ Ri As e u suc'umam oxib sient mil (300,000) rajch'ojab aj Juda, ri e c'o qui quetecak tak ch'ich' xukuje' qui tz'imaj tak ch'ich', xukuje' quieb sient jumuch' mil (280,000) aj Benjamin, ri e c'o qui quetecak tak ch'ich' xukuje' tak qui q'uiakbal ch'ab. Conojel e cowilaj tak ajch'ojab,

⁹ xwalij c'u ulok ri Zera chquij aj etiopiy ri e ruc'am ulok jun miyon (1,000,000) achijab xukuje' oxib sient (300) carwaj que ch'o'j, xopan c'u c'ä pa Mares.

¹⁰ Xbe c'ut ri As che u c'ulaxic, e rachil tak ri rachijab xquicolomaj quib che u banic ri ch'o'j chupam ri beya' re Sepata, chunakaj ri Mares.

¹¹ Ri As xutz'onoj ri u to'banic ri Ajawaxel ri u Dios, je xubij wa': “Ajawaxel, che la man c'o ta u jalbem rib ri u to'ic ri c'o u chuk'ab xukuje' ri tukar. Rumal ri', ¡Chujto' la, Ajawaxel xukuje' ka Dios, ka cuban ya' ka c'u'x chi'j la, pa ri bi' c'u la uj petinak chquij we ajch'ojab ri'! Lal, Ajawaxel, lal ka Dios. ¡C'utu' la chi man c'o ta jachin jun cäcuinic cuk'atij ta wäch la!”

¹² Xuya' c'ut ri Ajawaxel ri ch'äcanic che ri As xukuje' che ri Juda paquiwi' ri aj etiopib, rumal c'u ri' xebanimaj wa'.

¹³ Are c'u ri As xukuje' ri winak ri e c'o ruc' xecokataj c'ä pa Jerar, conojel ri aj etiopib xecämic man c'o ta jun xc'asi' ta can chque, xelajar c'u can chuwäch ri Ajawaxel xukuje' chquiwäch ri rajch'ojab, ri xequimajij tak ri jastak quech ri c'ulel.

¹⁴ Xekaj c'u paquiwi' conojel tak ri tinimit ri e c'o tak chrij ri Jerar, conojel c'ut xenoj che xe'n ib chuwäch ri Ajawaxel. Ri aj Juda xequik'olij conojel, e c'o c'u nimak tak k'inomal chquipam.

¹⁵ Xeboc c'u chupam tak ri e kajebal ri e c'o wi ri awaj, xequic'am bic chij ri man quebajilataj taj xukuje' tak camey. Xetzelej c'u pa Jerusalen.