Ucab Tzijobelil 11 - Quiché Bible

¹ Aretak xopan ri Roboam pa Jerusalen, xebumulij jun sient jumuch' mil (180,000) ajch'ojab ri e cha'talic ri e aj Juda xukuje' ri e aj ramak' ri Benjamin, che u banic ch'o'j cuc' ri aj Israel cuch'äc ta c'u ronojel ri rajawibal.

² Are' c'u ri Ajawaxel xuch'abej ri Semaiy, achi ri c'o ri Dios ruc', xuya' c'u takanic che:

³ “Chabij che ri Roboam, u c'ojol ri Salomon ajawinel c'ut re Juda, xukuje' conojel ri aj israelib ri jekel pa Juda xukuje' re Benjamin,

⁴ chi quinya' takanic chque chi man quech'ojin ta cuc' ri cachalal. Chi cheboj conojel cho tak cachoch, je c'u wa' ri nu chomam u banic.” Aretak xquita' ri cubij ri Ajawaxel chque, xetzelejic, xquik'il quib che u banic ri ch'o'j ruc' ri Jeroboam.

Ri u pok'colijic ri Roboam

⁵ Ri Roboam xjeki' pa Jerusalen xebuyac c'u tinimit pa Juda xebucoj tak tapia chquij.

⁶ Xuban u yaquic ri Belen, Etam, Teco,

⁷ Bet-sur, Soc, Adulam,

⁸ Gat, Mares, Zip,

⁹ Adoraim, Lacs, Azec,

¹⁰ Zor, Ajalon xukuje' ri Hebron, e wa' ri e c'o pa Juda xukuje' pa Benjamin ri e c'o tak tapia chquij.

¹¹ Xebuc'ojoj ri qui tapia tak we tinimit ri xebucoj c'u takanelab chquipam xukuje' ri cätijic, aseit xukuje' u wa'l uva.

¹² Xebujach c'u tak qui quetecak ch'ich' xukuje' qui tz'imaj tak ch'ich' conojel ri tinimit, sibalaj c'u utz qui colomaxic xubano. Je c'u nimalaj qui cowirisaxic wa' xubano. Je c'u ri' xcanaj ri Juda xukuje' ri Benjamin pa u k'ab ri Roboam.

¹³ Ri e cojol tabal tok'ob xukuje' ri aj levitib ri e c'o pa ronojel Israel conojel xebel ulok pa tak ri qui c'olbal che u mulixic quib ruc',

¹⁴ ri aj levitib xequitzak na can tak ri culew re yuk'bal xukuje' ri niq'uiaj tak quechbal chic, che ri qui bic pa Jerusalen xukuje' pa niq'uiaj tak c'olbal chic pa Juda, rumal rech chi ri Jeroboam xukuje' tak ri xecanaj che u q'uexwäch man xquiya' ta chi be chque chi xquitakej ta chic ri qui chac chuwäch ri Ajawaxel.

¹⁵ Ri Jeroboam xebucha' ri kas e u cojol tabal tok'ob rech quepatanij chquipam ri quek'ijilax wi diosib xukuje' ri quek'ijilax wi itzel tak uxlabal xukuje' ri quek'ijilax wi ri alaj ama'ib tak wacax ri e u banom.

¹⁶ Xukuje' c'ut, ri c'o pa canima' ri u tzucuxic ri Ajawaxel, ri u Dios ri Israel, xquitakej u banic quech ri xquiban ri e cojol tabal tok'ob xukuje' ri aj levitib xebe c'u pa Jerusalen che u chi'xic tabal tok'ob che ri Ajawaxel, ri qui Dios ri e qui mam.

¹⁷ Je xquiban wa' che u cowirisaxic ri rajawinic ri Juda xquiya' c'u u chuk'ab ri Roboam, u c'ojol ri Salomon oxib junab xbeytajic, xak xuwi c'u oxib junab xutakej u banic rech ri xuban ri David xukuje' ri Salomon.

¹⁸ Ri Roboam xc'uli' ruc' ri Mahalat, ri u mia'l ri Jerimot, u c'ojol ri David ruc' ri Abihail, u mia'l ri Eliab xukuje' ri' u mam ri Isayi.

¹⁹ Ri e u c'ojol ri Roboam ruc' ri Mahalat e are' tak wa' Jehus, Semariy xukuje' ri Zaham.

²⁰ Xc'uli' chi c'ut ruc' ri Maac, u mia'l ri Absalon, ri e u c'ojol e are' wa' ri Abiam, Atay, Ziz xukuje' ri Selomit.

²¹ Ri Roboam xec'oji' wajxaklajuj (18) rixokil xukuje' oxc'al (60) u man kas ta rixokil, are c'u ulok' na ri Maac chquiwäch conojel ri niq'uiaj chic. Xebalax juwinak wajxakib (28) e u c'ojol xukuje' oxc'al (60) e u mia'l.

²² Ri Roboam xucoj ri Abiam, ral ri Maac, che c'amal qui be ri rachalal, are ta c'u xraj xucoj ta che ajawinel.

²³ Xuban c'u jun utzalaj chomanic che qui jachic ri niq'uiaj u c'ojol chic pa ronojel ri ulew re Juda xukuje' Benjamin xujach qui wäch pa conojel tak ri tinimit ri e c'o tapia chquij, xutz'ebej c'ut ri cajwataj chque xukuje' xebutzucuj c'u q'ui quixokil.