Ucab Samuel 5 - Quiché Bible

Ri David ajawinel pa Israel xukuje' pa Juda

¹ Xebopan c'u na conojel ri aj ramak' ri Israel pa Hebron che u tzijobexic ri David, xquibij c'u che: “Ri uj junam ka quiq'uel uc' la,

² kas c'u tzij pune' are ka ajawinel ri Saul, lal c'ut ri kas xc'amow la u be ri Israel pa tak ri ch'o'j. U chi'm chi c'ut ri Ajawaxel che la chi lal cac'amow na la u be xukuje' cak'at na la tzij puwi' ri Israel.”

³ Je c'u wa' ri xbanic, conojel ri nimak tak tatayib ri e c'o pa Israel xebe che u ch'abexic ri ajawinel David pa Hebron, xuban c'u jun c'ulwächinic cuc', xquicoj c'u ri Ajawaxel che k'alajisanel. Xquijamij c'u aseit puwi' ri David rech cacanaj che ajawinel puwi' ri Israel.

⁴ Juwinak lajuj (30) u junab ri David aretak xuchaplej ajawinic, xajawin c'u cawinak (40) junab:

⁵ Pa Hebron xajawin wukub (7) junab ruc' niq'uiaj puwi' ri Juda, aretak c'o chic pa Jerusalen xajawin juwinak oxlajuj (33) junab puwi' ronojel ri Israel xukuje' puwi' ri Juda.

Ri David quebuch'äc ri c'ulel ri e c'o pa Sion

⁶ Ri ajawinel David xukuje' ri rachijab xebe che u suq'uil ri Jerusalen che qui ch'äquic ri aj jebuseyib are winak wa' ri e c'o chila'. Are c'u pa qui c'u'x ri aj jebuseyib chi man cacuin ta ri David coc pa ri tinimit, xquibij che: “Ri at man catcuin taj catoc na waral, xuwi ri moyab xukuje' ri ch'ocojib quecuin che a k'atixic.”

⁷ Xcuin c'ut ri David xoc pa ri nimalaj u cowirisabal ri Sion, are c'u wa' ri cäbix u tinimit ri David che camic.

⁸ U bim c'ut ri David pa tak ri k'ijol ri': “Apachin ta ne ri craj cuban c'ax chque ri jebuseyib chunima' bic rib chupam ri u be ja' chebucämisala' c'ut ri moyab xukuje' ri ch'ocojib, ri quinwetzelaj qui wäch ruc' ronojel ri wanima'.” Chila' c'u cäpe wi ri tzij ri cabixic: “Mawi ri moyab mawi ri ch'ocojib quecuinic queboc ta chupam ri rachoch ri Ajawaxel.”

⁹ Xjeki' c'ut ri David chupam ri cowilaj tinimit, xubinaj c'u rumal u tinimit ri David; xebuyac c'u nimak tak tapia chrij, xchaptaj u bic ruc' ri xmuk wi ri siwan xopan c'ä ruc' ri rachoch ri ajawinel.

Ri Hiram xebutak u bic tako'n ruc' ri David

¹⁰ Ri u cuinem ri David cätajin canimaric, are c'u ri Ajawaxel, ri Dios ri c'o ronojel u cuinem, c'o ruc'.

¹¹ Rumal c'u ri' ri Hiram ri ajawinel ri c'o pa Tir, xebutak ulok ri u tako'n ruc' ri David, e cuc'am c'u ulok ajanelab xukuje' tzoc'ol tak abaj, ri e cuc'am tak ulok che' re chacalte' xquiyac c'ut ri rachoch ri David ri cäc'oji' wi.

¹² Xuch'ob c'ut ri David chi ri Ajawaxel u jiquibam chi are' cäcanaj che ajawinel puwi' ri Israel, u nimarisam c'ut ri rajawinic che u ya'ic u k'ij ri u tinimit ri Israel.

Ri e niq'uiaj chic ralc'ual ri David

¹³ Aretak ya'tajinak chi can ri Hebron rumal ri David k'axenak chic pa Jerusalen, xebuc'am chi niq'uiaj rixokil xukuje' ri man e kas ta e rixokil, ri xequiya' niq'uiaj tak u c'ojol chic xukuje' tak u mia'l.

¹⁴ Ri e ralc'ual ri xebalax pa Jerusalen e are' tak qui bi' wa': Samu, Sobab, Natan, Salomon,

¹⁵ Ibar, Elisu, Nepeg, Japiy,

¹⁶ Elisam, Eliad xukuje' Elipelet.

Ri David quebuch'äc ri e aj pilisteyib

¹⁷ Aretak xquetamaj ri pilisteyib chi jamatajinak chic aseit puwi' ri David rech cäcanaj can che ajawinel puwi' ri Israel, conojel xeyacätaj ulok xepe che u tzucuxic; xoc c'u pa u jolom ri David xkaj bic chupam ri cowilaj to'bal ib.

¹⁸ Ri aj pilisteyib xequiya' quib pa ri beya' ri c'o pa Repaim.

¹⁹ Rumal ri', ri David xuta' u no'j che ri Ajawaxel, xubij c'u che: “¿La quincuin che qui ch'äquic ri e aj pilisteyib we quinbe chquij? ¿La cäya' la chwe chi quinch'äcan paquiwi'?” Xutzelej u bixic ri Ajawaxel che, xubij: “Je', chatch'ojin cuc', quinya' c'u na ri ch'äcanic chawe paquiwi'.”

²⁰ Ri David xopan pa Baal-perazim, chila' c'u xch'äcan wi paquiwi'. Rumal ri' xubij: “Jacha' cuban jun u tza'm ja', ri Ajawaxel u jakom jun be chnuwäch pa qui niq'uiajil ri qui banom qui c'ulel chwe.” Baal-perazim xuchix c'ut we c'olbal ri' rumal.

²¹ Ri aj pilisteyib xequitzak c'u ne can tak ri e qui diosib, ri David xukuje' ri rachijab xequisic' bic.

²² Are c'u ri aj pilisteyib xetzelej chi jumul xequiya' chi quib pa ri beya' ri c'o pa Repaim,

²³ xuta' chi c'u u no'j ri David che ri Ajawaxel, ri Ajawaxel xutzelej u bixic che: “Matpaki' bic chquiwäch che u banic ch'o'j cuc', xane' chasutij quij, chquij chatel wi ulok che u banic ch'o'j cuc', aretak catopanic jawije' e c'o wi ri e c'oc'alaj tak che'.

²⁴ Aretak c'u quebata' u pa akanaj paquiwi' tak ri che', chachapa' ch'ojininic cuc', ri cubij wa' chi in benak chawäch che qui cämisaxic ri e aj pilisteyib.”

²⁵ Ri David je xubano jas ri xubij ri Ajawaxel che, xuchap c'u qui cämisaxic ri e aj pilisteyib kas pa Gabaon xetanal c'ä pa Jezer.