Ucab Samuel 23 - Quiché Bible

Q'uisbal tak u tzij ri David

¹ E are' tak wa' ri q'uisbal tak u tzij ri David: “Ri David, ri u c'ojol ri Isayi, ri achi ri nimarisam u k'ij rumal ri Dios, ri ajawinel ri cha'om rumal ri u Dios ri Jacob, ri qui'laj bixol tak bix pa Israel, xuya' c'u u bixic:

² Ri Ruxlabal ri Ajawaxel cäch'aw wumal in; ri u tzij c'o puwi' ri wak'.

³ Ri u Dios ri Israel ch'awinak; ri to'l rech ri Israel u bim chwe: ‘Ri cuk'at tzij paquiwi' ri winak ruc' suq'uilal, ri cuk'at tzij chupam ri xe'n ib chuwäch ri Dios.

⁴ Cux na jacha' ri sak ri cäpe chuxe' ri caj, aretak cäpe u sakaric. Jacha' ri u sakil ri k'ij pa jun u sakaribal aretak man e c'o ta sutz', ri cubano chi caq'uiy ri k'ayes aretak coc'ow ri jäb.’

⁵ Rumal ri' ri wija'lil co c'o ruc' ri Dios, ri are' xuban jun junalic c'ulwächinic wuc', ri sibalaj colom xukuje' co c'olic. Ri are' cuya' ri tz'akatalaj ch'äcanic chwe cuban c'ut chi quetz'akat conojel ri e nu rayinic.

⁶ Conojel c'ut ri banal tak etzelal quejunamataj cuc' ri q'uix ri e q'uiakom apanok, ri man c'o ta jun cächapow ruc' ri u k'ab.

⁷ Che qui chapic, cac'am jun ch'ich' o jun tz'imaj ch'ich', caq'uiakbex que pa ri k'ak' rech kas c'u quechajiric.”

Ri e cowilaj tak rajch'ojab ri David

⁸ E are tak qui bi' wa' ri e cowilaj tak rajch'ojab ri David: Is-boset, ri aj hacmon, qui nimal ri oxib ri nimak na qui chuk'ab, ri c'o jumul xebucämisaj wajxakib sient (800) achijab ruc' ri u tz'imaj ch'ich'.

⁹ Ri jun chic ri cätakenic are' ri Eleazar, u c'ojol ri Dod, ri quel pa ahohit, ri are' jun chque ri sibalaj c'o na qui chuk'ab. Xc'oji' ruc' ri David pa Pas-damim, aretak ri aj pilisteyib xquimulij quib chila' che u banic ri ch'o'j, xetzelej c'u ri aj israelib chquij.

¹⁰ Are' c'u ri are' xutakej can qui cämisaxic ri aj pilisteyib c'ä xk'itaj na ri u k'ab xnaq'ui c'u can ri u k'ab che ri ch'ich' re ch'o'j. Pa ri k'ij ri' ri Ajawaxel xurik jun nimalaj ch'äcanic. Ri e ajch'ojab xquitakej ri Eleazar che rechbexic ri tokim che ri c'ulel.

¹¹ Ri xtaken chrij ri Elea are' ri Sam, u c'ojol ri Aje, ri aj ararit. Aretak xquimulij quib ri aj pilisteyib pa Lehi, jawije' ri c'o wi jun ulew ri ticom quinak' chuwäch, ri ajch'ojab aj israelib xebanimaj chquiwäch.

¹² Are c'u ri Sam xutac'aba' rib pa u niq'uiajil ri ulew xuto' c'u qui wi', xutakej c'u qui ch'äquic ri aj pilisteyib. Jeri' ri Ajawaxel xurik jun nimalaj ch'äcanic chi'.

¹³ C'o jun k'ij, pa ri k'ijol re ri k'atoj, oxib chque ri juwinak lajuj (30) cowilaj tak achijab xebe che u rikic ri David ri c'o pa ri pec ri c'o pa Adulam. Ri e cajch'ojab ri aj pilisteyib e kajinak pa ri beya' ri c'o pa Repaim.

¹⁴ Ri David c'o pa ri cowilaj c'ubal rib, e c'o c'ut juk'at ajch'ojab aj pilisteyib pa Belen.

¹⁵ Ri David xuya' u bixic we rayibal ri': “¡C'o ta banom wi c'o ta jachin cäyo'w u kumuxic ri ja' chwe ri c'o pa ri c'ua' ri c'o chunakaj ri u chi' ri roquibal ri Belen!”

¹⁶ Xebe c'ut ri oxib cowilaj tak achijab xeboc'ow chquixo'l ri cajch'ojab ri pilisteyib ri e kajinak chila' xquesaj c'ut ri' ja' chupam ri c'ua' ri c'o pa ri roquibal ri Belen, xquic'am c'u bic che ri David. Man xraj ta c'ut ri are' xukumuj, xane' xujamij chuwäch ri Ajawaxel jacha' jun sipanic che,

¹⁷ xubij c'ut: “¡Muya' c'olbal ri Ajawaxel chi quinwuq'uiaj! ¡Xak junam ri' ruc' ri ruq'uiaxic ri qui quiq'uel we oxib achijab ri', ri xquijach ri qui c'aslemal pa cämical che u c'amic ulok we ja' ri'!” Man xraj ta c'ut xukumuj. We banoj ri' e are' xebanow ri oxib cowilaj tak achijab.

¹⁸ Ri Abisay, u chak' ri Joab ral ri Sarb, qui nimal ri juwinak lajuj (30) cowilaj tak achijab. C'o jumul xbe chquij oxib sient (300) achijab xucoj ri u tz'imaj ch'ich' chque xebucämisaj c'ut. Rumal c'u rech wa' xnimarisax u k'ij chquixo'l ri juwinak lajuj (30),

¹⁹ are c'u xnimarisax na u k'ij chquiwäch conojel, are c'u xux qui nimal. Man xjunamataj ta c'u cuc' ri oxib ri e nabe.

²⁰ Ri Benaiy, u c'ojol ri Joiad, ri quel pa ri tinimit Cabseel, jun cowilaj achi wa' ri xebuban q'ui qui wäch tak mayibal. Are' xecämisan ri quieb u c'ojol ri Ariel ri quel pa Moab. C'o jun k'ij ri cätajin cakaj sak tew xkaj pa jun jul, xucämisaj c'ut jun coj ri c'o chupam.

²¹ Xukuje' xucämisaj jun achi aj ejipt ri sibalaj jutac'aj, ri ruc'am jun tz'imaj ch'ich': xbe ri Benaiy chrij ruc' jun che', xutokij ri tz'imaj ch'ich' pa u k'ab, xucämisaj c'ut ruc' ri kas u tz'imaj ch'ich'.

²² We banoj ri' ri xuban ri Benaiy, u c'ojol ri Joiad, xuban che chi xnimar u k'ij chquixo'l ri juwinak lajuj (30) cowilaj tak achijab;

²³ xnimarisax c'u u k'ij chquiwäch wa', man xjunamataj ta c'u cuc' ri oxib ri e nabe. Xucoj c'u rumal ri David che quinimal ri e chajil rech.

²⁴ Chquixo'l ri juwinak lajuj cowilaj tak achijab e c'o: ri Asael u chak' ri Joab; ri Elanan u c'ojol ri Dod, aj Belen;

²⁵ ri Sam ri quel pa Harod; ri Elic, xukuje' aj Harod;

²⁶ ri Heles, ri aj paltit; ri Ira, u c'ojol ri Iques, ri quel pa Teco;

²⁷ ri Abiezer ri quel pa Anatot; ri Sibecay, ri quel pa Hus;

²⁸ ri Salmon, ri aj ahohit; ri Maharay, ri quel pa Netop;

²⁹ ri Heled, u c'ojol ri Baan, ri xukuje' aj Netop; ri Itay, u c'ojol ri Ribay, ri quel pa Gabaa, ri c'o pa ri ramak' ri Benjamin;

³⁰ ri Benaiy, ri quel pa Piraton; ri Hiday ri quel chuchi' ri alaj nima' ri c'o pa Gaas;

³¹ ri Abi-albon, ri aj arbat; ri Azmabet, ri quel pa Bahurim;

³² ri Eliaba, ri aj saalbonit; ri e u c'ojol ri Jasen; ri Jonatan;

³³ ri Sam, ri aj ararit; ri Ahiam, u c'ojol ri Sarar, xukuje' aj ararit;

³⁴ ri Elipelet, u c'ojol Ahasbay, u c'ojol ri Maac; ri Eliam, u c'ojol ri Ahitopel, ri quel pa Jil;

³⁵ ri Hezray, ri quel pa Carmel; ri Paaray, ri aj arbit;

³⁶ ri Igal, u c'ojol ri Natan ri quel pa Soba; ri Bani, ri quel pa Gad;

³⁷ ri Selec, ri quel pa Amon; ri Naharay, ri quel pa Beerot, chajil rech ri Joab, ral ri Sarb;

³⁸ ri Ira, ri quel pa Jatir; ri Gareb xukuje' aj Jatir;

³⁹ xukuje' ri Uriy, aj hitit. E juwinak wuklajuj (37) chi conojel.