Ucab Samuel 22 - Quiché Bible

Ri e u bix ri David re ch'äcanem

¹ Ri David xubixoj we bix ri' che ri Ajawaxel aretak xto'tajisax rumal ri Ajawaxel man xkaj ta pa u k'ab ri Saul xukuje' pa qui k'ab ri xquiban qui c'ulel che.

² Je xubij wa': “Lal, Ajawaxel ri to'l wech, ri c'o wi ri nu panibal, ri nu toronel,

³ nu Dios, ri nimalaj abaj ri quinuto', nu quetequic ch'ich', ri cuinem ri quinto'tajisanic, ri c'ubal wib ri sibalaj chicaj c'o wi, ri nu panibal ri sibalaj chicaj, c'o wi ri nu Colonel. ¡Xinto'tajisaj la man xintokix ta bic!

⁴ Lal, Ajawaxel ya'tal ri u ya'ic k'ij la: aretak quinsiq'uin che la, quinto'tajisaj la pa qui k'ab ri nu c'ulel.

⁵ Ri cämical xinuputzcuyij pa tak ri u rekbala'; xina' xe'n ib chuwäch ri u tza'm ja' ri cämisanel.

⁶ Ri cämical xinuralij pa tak ri u colobal; ¡xinkaj chquipam tak c'amibal cämisanelalab!

⁷ Pa tak ri welebal ch'u'j xinsiq'uij ri Ajawaxel, xintz'onoj ri to'banic che ri nu Dios, xinutatabej c'ut kas pa ri rachoch; ¡ri e nu rakoj tak chi'aj xebopan pa tak u xiquin!

⁸ Xpe c'u jun nimalaj cabrakan xyicopitaj ri ulew: xeyicopitaj tak ri e u tac'alibal ri caj; xetotax rumal ri royowal ri Ajawaxel.

⁹ Xel ulok sib pa u tza'm, xel ulok jun cämisanelalaj k'ak' pa u chi'; ¡ak'al quenicowic quebel ulok pa u chi'!

¹⁰ Xupac ri ch'ukuwinak ri caj, xkaj c'u ulok. ¡Chquixe' ri rakan e c'o nimak tak sutz'!

¹¹ Xquiejen chrij jun aj cajalaj to'banel ri e c'o u xic', xrapin c'ut: quilitaj paquiwi' ri e u xic' ri quiakik'.

¹² Xuban u cäbal ri lic'om re be che ri tzatzalaj k'ekumalil ri sutininak rij xukuje' tak ri sutz' ri e nojinak che ja'.

¹³ Jun jolk'inic cäcaypanic xel bic chuwäch; xejabin rachak k'ak' quenicowic.

¹⁴ Ri Ajawaxel, ri Sibalaj Aj Chicajil, xubano chi xtataj ri u ch'abal re cakulja ri xel ulok pa ri caj:

¹⁵ Xebuq'uiak ri u ch'ab, ri e u caypa', xubano chi xebanimaj ri nu c'ulel qui tuquelam tak quib.

¹⁶ Xc'utun ri u xe' ri plo; xk'alajin ri u tz'akatil ri uwächulew, rumal ri xibibalalaj u ch'abal ri Ajawaxel, rumal ri u chuk'ab ri ruxlab ri xuq'uiako.

¹⁷ Ri Dios kas chicaj xulic' wi ulok ri u k'ab chwe, ruc' c'ut ri u k'ab xinresaj chupam ri nimalaj plo.

¹⁸ Xinresaj pa qui k'ab ri nu c'ulel ri c'o na qui cuinem ri caquetzelaj nu wäch ri c'o na qui chuk'ab chnuwäch.

¹⁹ Xquitij u banic' c'ax chwe aretak in kajinak pa c'ax, xuya' c'ut ri u to'banic ri Ajawaxel chwe:

²⁰ Xinresaj pa qui k'ab; ¡xinuto'tajisaj rumal rech chi in lok' chuwäch!

²¹ Ri Ajawaxel u yo'm chwe ri rajilal u q'uexelal ri takal che ri ch'ajch'ojalaj nu c'aslemal,

²² Ri in are nu takem ri u be ri Ajawaxel; ¡mawi jumul nu xutum ta can ri nu Dios!

²³ Man e sachinak ta c'ut conojel tak ri u takanic pa nu jolom; ¡mawi c'u jumul nu jech'obisam ta wib chquij tak ri u pixab!

²⁴ In bininak colom chuwäch; nu najtajisam wib che ri etzelal.

²⁵ Ri Ajawaxel u yo'm rajilq'uexelal chwe rumal ri ch'ajch'ojalaj nu c'aslemal chuwäch.

²⁶ Ri lal Ajawaxel, lal jic ruc' ri jic, lal tz'akat ruc' ri tz'akat,

²⁷ lal ch'ajch'oj ruc' ri ch'ajch'oj, c'o no'j la che u k'atixic ri banal etzelal.

²⁸ Lal quebeto'tajisaj la ri e mach'amoj, caya' c'u wäch la chque ri cäquiban nimal quemach'irisaj c'u la.

²⁹ Lal, Ajawaxel, lal nu chäj; lal, nu Dios, catunuj la ri nu k'ekumalil.

³⁰ Ruc' ri to'banic la quinq'uis na tzij puwi' ri c'ulel quebenxalk'atij c'u tak na ri nimak tak qui tapia ri qui tinimit tak.

³¹ Ri u be ri Dios tz'akat; ri u chi'nic ri Ajawaxel takal u jiquibaxic c'uxaj chrij. ¡Ri Dios cuto' qui wi' conojel ri caquicu'ba' qui c'u'x chrij!

³² ¿Jachin ta chic ri Dios, we ta ma ta are' ri Ajawaxel? ¿Jachin ta chic jun dios c'olic ri cacuin ta che u to'ic ka wi'?

³³ Ri Dios are' nu panibal c'o u cuinem, ri cubano chi man cäyok' ta ri nu c'aslemal,

³⁴ ri quebuya' wakan ri quexiq'uinic, jacha' jun masat, ri cabanowic chi co quinc'oji' paquiwi' tak ri chicajil,

³⁵ ri qui nu tijoj che u banic ch'o'j ri quebuya' nu chuk'ab che qui tanixic tak ri q'uiakbal ch'ab re k'an ch'ich'.

³⁶ Lal cäto'w la nu wi' xukuje' quito'tajisaj la; ri utzil la u banom chwe chi utz in elinak.

³⁷ Banom la chi man c'ax taj ri nu be, man c'u e jiljobinak taj ri wakan.

³⁸ Ri qui banom qui c'ulel chwe xebenterenej pa cakan, xinsachisaj c'u qui wäch xuwi c'u xintzelej ulok aretak sachtajinak chic qui wäch.

³⁹ ¡Xinsachisaj qui wäch! ¡Xinban ch'akatak chque! Man xewalij ta chic: ¡xetzakic xebentac'alej!

⁴⁰ Lal xyo'w la nu chuk'ab pa ri ch'o'j; xban la chi ri co xquitac'aba' quib xquimej quib chnuwäch,

⁴¹ chi ri quinquic'ulelaj xebanimaj chnuwäch. Aretak c'u je xbantaj wa' xincuinic xinsachisaj qui wäch ri caquetzelaj nu wäch.

⁴² Xquitz'onoj chi que to'ic, man c'o ta c'u to'banel. Xquisiq'uij ri Ajawaxel, man xutzelej ta c'u u wäch qui tzij.

⁴³ ¡Xebenque'j xebux c'u puc'uc' ulew! ¡Xeben xak'alej jacha' ri t'ac xo'l tak ri ja!

⁴⁴ Xinto'tajisaj la pa ri tijoj chuk'ab cuc' ri nu tinimit ri xech'ach'at chwij, xban la chwe chi xincanaj c'amal qui be ri nimak tak tinimit, xinquipatanij c'u winak ri man weta'm ta qui wäch.

⁴⁵ Aretak quebentako queniman chwe; winak ri man e nu winak taj quinkaj chquiwäch,

⁴⁶ winak ri man e nu winak ta cäquixe'j quib, quebirbitic, quebel ulok chquipam ri e qui panibal.

⁴⁷ ¡Yokok u k'ij ri Ajawaxel! ¡Tewichitalic ri to'l wech! ¡Nimarisax u k'ij ri Ajawaxel, ri quinuto'tajisaj xukuje' cuto' nu wi'!

⁴⁸ Are' Dios wa' ri yowinak rajil c'axelal chwe e u jachom c'u tak ri tinimit pa nu k'ab.

⁴⁹ Ri are' quinuto'tajisaj quinresaj pa qui k'ab ri e nu c'ulel, xukuje' pa qui k'ab ri co xquitac'aba' quib chnuwäch xquiwalijisaj c'u ne quib chwij. ¡Lal, Ajawaxel, quinto'tajisaj la pa qui k'ab ri c'analaj tak achijab!

⁵⁰ Rumal ri' quink'ijilan che la chquixo'l ri nimak tak tinimit quebenbixoj c'u na bix che ri bi' la.

⁵¹ Queya' la nimak tak ch'äcanic che ri ajawinel ri cha'om la; amak'el quel c'u'x la che ri David xukuje' chque ri e rija'lil.”