Ucab Samuel 21 - Quiché Bible

Rajil c'axel cumal ri aj Gabaon

¹ Pa tak ri u k'ijol ri David xc'oji' jun wi'jal ri xbeytaj oxib junab xutakej rib. Xuta' c'ut ri David che ri Ajawaxel; ri Ajawaxel xutzelej u bixic che: “Ri wi'jal petinak cumal ri cämisanic ri xuban ri Saul e rachil ri rachalaxic, xequicämisaj c'ut ri e aj gabaonib.”

² Ri David xebusiq'uij ri aj gabaonib xtzijon c'u cuc'. (Ri aj gabaonib man aj israelib taj, e jumulaj qui tz'akatil ri amoreyib ri c'a e canajinak canok ri qui banom jun chi'nic ri kas cäban na ri aj israelib chque ri rumal ri achixomal ri xuna' ri Saul chque ri winak aj Israel xukuje' ri aj juda, xutzucuj u sachisaxic qui wäch.)

³ Ri David xuc'ot qui chi' xuta' chque, xubij: “¿Jas ri rajawaxic quinban chiwe? ¿Jas ri quinban che u c'ojoxic ri winakchi' ri xban chiwe, rech qui tewichi'j ri e u winak ri Ajawaxel?”

⁴ Ri aj gabaonib xquitzelej u bixic che: “Man puak taj ri cäyo'w latz' chkaxo'l ruc' ri Saul xukuje' ri rachalaxic, mawi c'u cakaj chi c'o jachin cäcäm pa Israel.” Ri David xubij chque: “Chibij ba' chwe jas ri qui waj quinban chiwe.”

⁵ Ri e are' xquitzelej u bixic: “Che ri achi ri are ta xraj xusachisaj ka wäch xebuban c'u chomanic jas ta ri xuban che u q'uisic tzij pakawi' rech ma ta quilitaj chi ka wäch pa ronojel ri ulew pa Israel,

⁶ cakaj chi quejach wukub rija'lil pa ka k'ab, quekaxequeba' c'u chuwäch ri Ajawaxel pa Gabaa aj Saul,” ri xcha'ic rumal ri Ajawaxel.

⁷ Ri ajawinel xuc'amowaj ri qui jachic chque, pune' c'u xutok'obisaj u wäch ri Mepi-boset, u c'ojol ri Jonatan ri' u mam ri Saul, rumal ri tastalicalaj chi'nic ri kas cäban na, ri u bim ri are' xukuje' ri Jonatan.

⁸ Xebuchap c'ut ri quieb ral ri Rizpa, u mia'l ri Aja e u c'ojol ri Saul ruc', ri quebinax Armoni xukuje' Mepi-boset xukuje' ri e job ral ri Merab, u mia'l ri Saul, ri e u c'ojol ri Adriel, u c'ojol ri Barzilay ri quel pa Mehol,

⁹ xebujach c'u chque ri e c'o pa Gabaon, ri xequitzayiba' pa ri juyub chuwäch ri Ajawaxel. Je xban wa' chque, junam xecäm ri wukub, pa ri nabe tak k'ij ri xchaptaj u k'atic ri sebad.

¹⁰ Are c'u ri Rizpa, ri u mia'l ri Aja, xeratz'iakij wakwoj tak atz'iak rumal ri u bis, xuban c'u jun u panibal puwi' jun abaj. Xcanaj c'u chila', kas pa ri u tictajic ri u k'atic ri sebad c'a xchaptaj na ri jäb, man xuya' ta c'u chque ri c'uch chi xenakajin ta chque ri cäminakib pa k'ij, mawi xuya' chque ri juyubal tak awaj chi xenakajin ta chque ri cäminakib chak'ab.

¹¹ Aretak c'u xbix che ri David ri u banom ri Rizpa, ri man kas ta rixokil ri Saul,

¹² xbec xebuc'ama' ulok ri u bakil ri Saul xukuje' ri u bakil ri Jonatan ri u c'ojol, ri e mukutal pa ri culew ri aj jabes pa Galaad. We winak ri' xequeläk'aj ulok cho ri c'ayibal ri c'o pa Bet-san, ri xequixequeba' wi ri aj pilisteyib aretak xkaj ri Saul pa qui k'ab pa Jilbo.

¹³ Xuya' takanic ri David chi chek'axex ri u bakil tak ri Saul xukuje' ri e rech ri Jonatan, xukuje' chi chebeyac ulok ri qui bakil tak ri xejitz'axic;

¹⁴ xemuk c'ut ri u bakil ri Saul xukuje' ri e rech ri Jonatan jawije' ri mukutal wi ri Sis, ri u tat ri Saul, pa Zel pa ri ramak' ri Benjamin. Ronojel xbanic jacha' ri takanic ri xuya' ri ajawinel. Aretak c'u xbantaj wa', ri Dios xubano jas ri xtz'onox che rutzil ri ulew.

Ri Abisay xuto'tajisaj ri David

¹⁵ Ri aj pilisteyib xquiwalijisaj chi ulok quib che u banic ch'o'j cuc' ri aj Israel. Xel c'u bic ri David xukuje' e rachil ri e qui nimakil tak ri ajch'ojab che u tijic qui chuk'ab cuc', sibalaj c'u xk'itaj ri David,

¹⁶ jun c'u tac'atic achi Isbi-benob u bi' ri are ta xraj xucämisaj ri David. Ri u tz'imaj ch'ich' c'o na oxc'al wakib (66) libra capajanic, xequel jun c'ac' ch'ich' re ch'o'j xe' u pam.

¹⁷ Xbe c'u ri Abisay ri ral ri Sarb che u to'ic ri David, xbe chrij ri aj pilistey xucämisaj c'ut. Xquibij c'ut ri rachijab ri David che chi chuya' u tzij chubij chi man cäbe ta chi cuc' pa ri ch'o'j, rech man cachuptaj ri u chäj ri Israel.

Ch'o'j cuc' tak ri e jutak tac'aj tak achijab

¹⁸ Xban chi c'u jun ch'o'j pa Gob cuc' ri aj pilisteyib. Pa ri ch'o'j ri', ri Sibecay ri aj husatit xucämisaj ri Sap, ri quija'lil ri e tac'atak tak achijab.

¹⁹ Pa jun ch'o'j chi c'ut ri xban cuc' ri aj pilisteyib, xukuje' pa Gob, ri Elanan, u c'ojol ri Jair, ri quel pa Belen, xucämisaj ri Goliat ri quel pa Gat, ri u tz'imaj ch'ich' xak junam u nimal ruc' jun tz'imaj re quemebal.

²⁰ Xban chic jun ch'o'j pa Gat. C'o c'ut jun achi chila' ri sibalaj jutac'aj rakan, ri e c'o juwinak quiejeb u wi tak rakan u k'ab: wakitak che jujun u k'ab, wakitak che jujun rakan. Xukuje' c'u wa' quija'lil tak ri tac'atak tak achijab,

²¹ xutzur c'ut ri Israel, xcämisax c'u rumal ri Jonatan, u c'ojol ri Simey, ratz ri David.

²² We quiejeb tac'atak tak achijab ri' e rija'lil ri Rep, ri quel pa Gat, xekaj c'u pa u k'ab ri David xukuje' pa qui k'ab ri e qui nimakil ri rajch'ojab.