Ucab Samuel 19 - Quiché Bible

^1-2 Aretak ri winak xquetamaj chi ri ajawinel cok'ic xukuje' cubisoj ri u cämic ri u c'ojol Absalon, xeyok u bixic che ri Joab. Jeri', ri k'ij re ch'äcanic xq'uextaj pa bis.

³ Rumal c'u rech wa' ri ajch'ojab man xquic'ut ta quib xeboc pa ri tinimit: ruc' q'uixbal xenakajin ri ajch'ojab, je ta ne ri xa' ta' xebanimaj ulok pa ri ch'o'j.

⁴ Are c'u ri ajawinel u takem u ch'ukic ri u palaj, co curakakej u chi': “¡Absalon, nu c'ojol! ¡Absalon, nu c'ojol!”

⁵ Xbe c'ut ri Joab chupam ri rachoch ri ajawinel, xubij c'u che: “Ri lal e yo'm la ri e pataninel tak ech la chupam q'uixbal, ri xto'tajisax ri c'aslemal la cumal camic xukuje' ri e c'ojol la, ri e mia'l la, ri e ixokil la, xukuje' tak ri man kas ta e ixokil la.

⁶ Ri lal c'utum la camic chi man nim ta quebil wi la ri e qui nimal tak ri ajch'ojab xukuje' ri ajch'ojab, calok'ok'ej c'u la ri quetzelam wäch la, quetzelaj c'u la qui wäch ri calok'okex la cumal. Camic nu ch'obom, chi are utz na chi are ta c'asal ri Absalon, pune' ta c'u konojel uj xujcämtaj,

⁷ chel ba' la bic chanim, chcu'bisaj c'u la qui c'u'x ri e torol tak ech la, we c'u man je cäban la chi'nic ri kas cäban na, quincha' pa u bi' ri Ajawaxel xukuje' pa ri bi' la chi pa we ak'ab camic man c'o ta jun ri cäcanaj ta chi can che ternexic la. We u q'ueyowal ri' che la are sibalaj c'ax na chquiwäch conojel ri etzelal ri e c'ulmam la kas pa ri c'ojolal la c'ä camic.”

⁸ Xwalij c'u bic ri ajawinel xet'uyul chuchi' ri tinimit. Aretak c'u xquetamaj conojel ri winak ri e c'o ruc' chi t'uyul ri ajawinel chuchi' ri tinimit, conojel xebopan ruc'. E are' tak c'ut ri aj Israel, conojel e animajininak xebe cho tak cachoch.

Ri David catzelej pa Jerusalen

⁹ Pa conojel tak ri amak' Israel ri winak quech'a'ch'a'tic caquibij c'ut: “Ri ajawinel David xcuinic xujuto'tajisaj pa qui k'ab ri ka c'ulel, ri aj pilisteyib; xa c'u rumal rech ri Absalon, xanimaj na bic xuya' can ri ulew.

¹⁰ Are c'u ri Absalon, ri xkacu'ba' ka c'u'x chrij chi are cux kajawinel, xcäm pa ri ch'o'j. ¿Jas c'u ri keye'm, chi, man cäkatzelej ta ulok ri ajawinel David?”

¹¹ Ri cätajin caquichomaj conojel ri aj Israel xopan u bixic c'ä ruc' ri David. Xutak c'u u bixic ri are' chque ri e cojol tabal tok'ob ri Sadoc xukuje' ri Abiatar, xubij bic chque: “Chixtzijon ix cuc' ri nimak tak tatayib ri e c'o pa Juda, chita' chque jasche i beytajisam chi quintzelej pa ri wachoch.

¹² Chibij chque chi man c'o ta jasche e are' ri quebux ta q'uisbal che nu tzelexic e wachalal c'ut uj junam amak'.”

¹³ Xukuje' xuya' chic we takanic ri', chi chbix che ri Amas: “At, junam nu quiq'uel awuc', jeri' kas camic cachaptaj bic at ri catux na quinimal ri wajch'ojab, che u q'uexwäch ri Joab. We c'u man quintz'akatisaj jas ri quinbij chawe, chuya' cowilaj c'äjisabal nu wäch ri Ajawaxel.”

¹⁴ Je xuban wa' che qui ch'äquic ri achijab ri e c'o pa Juda, conojel c'ut we achijab ri', jacha' e xa jun winak, xquitak u bixic che ri ajawinel chi tzelej ulok xukuje' conojel ri e to'l tak rech.

¹⁵ Xutakej c'ut u tzelejic ri ajawinel, xopan c'u chuchi' ri Jordan. Ri achijab ri quebel pa Juda, xebopan pa Jilgal che u c'ulaxic xukuje' che u to'ic che u k'axexic pa ri nima' Jordan.

¹⁶ Xukuje' ri Simeiy, ri u c'ojol ri Jer, ri aj ramak' ri Benjamin, aj bahurim, xuchuk'ubej u kajic bic junam cuc' ri achijab ri quebel pa Juda che u c'ulaxic ri David.

¹⁷ Achilatal cumal jun mil achijab aj Benjamin. Xukuje', are' jun ri Sib, ri xpatanin can pa ri rachoch ri Saul, achilatal cumal ri olajuj u c'ojol xukuje' cumal ri juwinak pataninel tak rech, c'o chi apan chuchi' ri Jordan c'a majok chopan ri ajawinel.

¹⁸ Xek'ax c'u chupam ri k'axebal che qui k'axexic ri e rachalaxic ri ajawinel, xukuje' che u banic jachique ri cäkaj chuwäch. Are c'u ri Simeiy u c'ojol ri Jer xumej rib chuwäch ri ajawinel aretak k'axenak chic chupam ri Jordan,

¹⁹ xubij c'u che: “Quinbochi'n che la chi maban la chi quintoj ri nu mac pa k'ab la, mawi manataj ri etzelal ri xuban we pataninel ech la ri', pa ri k'ij aretak xel la ulok pa Jerusalen. Mäcanaj ri c'ax pa ri anima' la chwij,

²⁰ quink'alajisaj c'u wib chi c'o nu mac chque c'u conojel ri e rachalaxic ri Jose camic in uxinak ri nabe in elinak ulok che c'ulaxic la.”

²¹ Xubij c'ut ri Abisay, ri ral ri Sarb, “¿La mat takal che ri Simeiy chi cacämisaxic, rumal rech chi xuc'okoj ri ajawinel ri cha'om rumal ri Ajawaxel?”

²² Xutzelej c'ut u bixic ri David: “¡Man c'o ta iwe ix che wa', ral tak ri Sarb! ¿Jasche quik'atej nu wäch? Camic kas weta'm chi in ajawinel pa Israel, jeri' man c'o ta jun pa Israel cäcäm na chupam we k'ij ri'.”

²³ Xuch'abej c'ut ri Simeiy, xuban ri chi'nic ri kas cäban na che chi man cäcäm ta na.

²⁴ Xukuje' xel ulok ri Mepi-boset, ri u c'ojol ri Saul che u c'ulaxic. Kas pa ri k'ij ri xel u bic ri ajawinel, c'a xtzelej c'u na ulok utz u wäch, man e u ch'ajom ta ri quieb rakan, mawi u socam ri rismachi', mawi u ch'ajom ri ratz'iak.

²⁵ Aretak c'u xopan pa Jerusalen che u c'ulaxic ri ajawinel, xubij wa' che: “Mepi-boset, ¿jasche man xatpe wuc'?”

²⁶ Ri are' xutzelej u bixic: “Xinusub ri nu pataninel. Rumal c'u rech chi in ch'oco'j, xintako chi chutasa' rij jun bur ri xinquiejej ta ulok che nu petic uc' la.

²⁷ Xubana' c'u tzij chwij chwäch la. Are c'u ri lal xak lal junam ruc' jun aj chicajalaj u tako'n ri Dios cuban c'u na jachique ri utz carilo.

²⁸ Pune' c'u conojel ri e rachalaxic ri nu tat ya'tal ri qui cämisaxic chwäch la, we pataninel ech la ri' xula'x che ri wa'im pa ri webal la. ¿Jas ta chic ri quinwaj quintz'onoj ta chi che la?”

²⁹ Ri ajawinel xutzelej u bixic che: “Man c'o ta chi jas rajawaxic u bixic. Xya'taj ri takanic wumal chi ri at ri Sib quebijach ri ulew chiwäch.”

³⁰ Are' c'u ri Mepi-boset xutzelej u bixic che: “Chcanaj ronojel ruc'. Ri nim u banic chi ri lal lal tzelejinak ulok pa ri achoch la utz wäch la man c'o ta xc'ulmaj la.”

³¹ Are c'u ri Barzilay, ri quel pa Galaad, xel ulok pa Rojelim xpe che rachilaxic ri ajawinel che u k'axexic ri Jordan che u ch'abexic canok.

³² Sibalaj c'u nim winak chic, c'o chic jumuch' u junab (80), conojel ri k'ij ri xc'oji' ri ajawinel pa Mahanaim xuya' ronojel ri xajwataj che ri ajawinel, rumal chi sibalaj c'u k'inom.

³³ Xubij c'ut ri ajawinel che ri Barzilay: “Jo' jät wuc' pa Jerusalen, catinwilij c'u na chila'.”

³⁴ Ri Barzilay xutzelej u bixic che: “Xa e quieb oxib junab chic in c'aslic che ri quinbe ta c'u uc' la pa Jerusalen.

³⁵ C'o chi c'ut jumuch' (80) nu junab; man quinna' ta chi c'ut ri u qui'al ri quinwe'j mawi ri quinwuq'uiaj, man quincuin ta chic quinbij we utz o man utz ta u na'il ri quintijo; xukuje' man quincuin ta chic quintatabej ri qui bix ri alabomab xukuje' ri alitomab. ¿Jas ta che quinux jun latz' che la?

³⁶ Xak xuwi c'u xinpe che achilaxic la che k'axexic la chupam ri Jordan, ¿Jas ta c'u che cächi'j la we tojbal ri' chwe?

³⁷ Are c'u ne quintz'onoj jun tok'ob che la chi chya' la chwe chi quintzelej pa ri nu tinimit rech quinecäm chila' quinmuk c'u na pa ri qui mukbal ri e nu nan nu tat. C'o chi c'u jun pataninel che la: ri nu c'ojol Quimam. Oj ri are' uc' la, bana' c'u la che jachique ri utz quil la.”

³⁸ Ri ajawinel xutzelej u bixic che: “Chpet ba' ri Quimam wuc', quinban c'u na che jachique ri cachomaj chi takal che. Ronojel c'ut ri catz'onoj chwe, quinya' na chawe.”

³⁹ Conojel ri winak xquiramij pa ri Jordan. Aretak c'u ramatajinak rumal ri ajawinel, xutz'umaj ri Barzilay che u jachic bic. Xtzelej c'u ri Barzilay pa ri c'olbal ri jekel wi.

⁴⁰ Ri ajawinel xutakej ri be ri cabe pa Jilgal, achilatal rumal ri Quimam xukuje' cumal conojel ri winak ri e petinak pa Juda, xukuje' c'u pa niq'uiaj chque ri winak ri e petinak pa Israel.

⁴¹ Conojel c'ut ri aj israelib xebopan che rilic ri ajawinel, xquibij c'u che: “¿Jas ta c'u che chi e are' ri kachalal aj Juda cäquiban quech che la, e are' c'u e lak'apuninak ri ajawinel xukuje' ri e achalaxic la, xukuje' conojel ri ajch'ojab la, pa ri u k'axexic ri Jordan?”

⁴² Conojel ri aj Juda xquitzelej u bixic chque ri aj Israel: “Rumal rech chi ri uj c'o cujux che ri ajawinel. ¿Man c'o ta c'u jasche cäpe iwoyowal? ¿La xa pa u cätajin cujutzuk ri ajawinel? O ¿la c'o ta jas u yo'm chke?”

⁴³ Ri e petinak pa Israel xquitzelej u bixic: “Ri uj, lajuj mul c'o na ke che ri ajawinel chiwäch ix. Xak c'u u wi' chic. Jacha' chi uj amak', uj ri nabeal tak achalaxelab chiwäch. Je c'u ri', ¿jas c'u che qui wetzelaj ka wäch? ¿La ma ta uj ri nabe xkacoj ka chuk'ab chi catzelej ulok ri kajawinel?” Are c'u sibalaj co xech'aw na ri quepe pa Juda chquiwäch ri aj Israel.