Ucab Samuel 16 - Quiché Bible

Ri David catzijon ruc' ri Sib

¹ C'ä maja' c'u naj coc'ow ri David che ri u wi' ri juyub, aretak ri Sib ri u pataninel ri Mepi-boset, xel ulok che u c'ulaxic. E ruc'am ulok juc'ulaj bur ri cojom queka'bal quekam quieb sient (200) caxlanwa, jun sient caxlanwa re uva e rachilam q'uilim pasa, jun sient (100) qui wäch tak che' ri e re k'ijol xukuje' jun tz'um u wa'l uva.

² Ri ajawinel xuc'ot u chi', xubij che: “¿Jas che xebac'am ulok we jastak ri'?” Ri Sib xutzelej u bixic che: “Ri juc'ulaj bur rech quequiquejej ri achalaxic la; ri caxlanwa xukuje' ri qui wäch tak che' rech quewa' ri ajch'ojab, ri u wa'l uva che cuq'uia' ri quek'itaj pa ri chaki'j uwo sak.”

³ “¿Jawije' c'o wi ri ri' u mam ri awajaw?” xcha' ri ajawinel che. “Canajinak can pa Jerusalen” xcha' ri Sib, “cuchomaj c'ut chi ri aj israelib camic caquitzelej ri ajawibal che ri rech canok ri u mam.”

⁴ “Utz ri'” xcha' ri ajawinel che, “camic awech ronojel ri rech ri Mepi-boset nabe.” “C'o ta ba' banom wi amak'el taj c'o ri tok'ob la che nu to'ic” xcha' ri Sib, xupachba' rib chuwäch ri ajawinel.

⁵ Aretak ri ajawinel David xopan pa Bahurim, jun achi rachalaxic ri Saul xel ulok chila'. U c'ojol ri Jer, ri Simeiy u bi', cätajin cuc'okoj

⁶ xukuje' cätajin cuq'uiak abaj che ri David xukuje' chque ri e chajil tak rech ri David ri e teren chrij; lak'aputal c'u ri ajawinel cumal ri winak xukuje' ri chajil tak rech ri e tereninak,

⁷ ri Simeiy cätajin cuc'okoj je cubij wa: “¡Chatelubic waral, ajmac cämisanel!

⁸ ¡Ri Ajawaxel Dios u c'äjisam a wäch cumal conojel ri nimak tak il ri e a banom chque ri e rachalaxic ri Saul rech at catajawin che u q'uexwäch! ¡Are c'u ri camic ri Ajawaxel u jachom ri ajawibal pa u k'ab ri a c'ojol Absalon, cätajin c'u catoj ri kas awetzelal camic, man c'o ta chi c'u jas a banic xane' at jun cämisanel!”

⁹ Are c'u ri Abisay, ral ri Sarb, xubij che ri ajawinel: “¿We chuwilaj cäminak tz'i' ri' jas ta che cutakej c'okoxic la? ¡Chanim quinwesaj ri u jolom!”

¹⁰ Xutzelej c'ut u bixic ri ajawinel che: “We c'ulmatajic ri' man c'o ta iwech ix che, ral tak ri Sarb. We qui nu c'okoj, are' c'ut ri Ajawaxel takowinak che u banic. ¿Jachin ta c'u lo ri cuchajij ta anima' che u c'otic u chi' jasche je u chomam u banic wa?”

¹¹ Xbextax c'u u wäch ruc' ri Abisay xukuje' cuc' ri e rach k'atal tak tzij, xubij: “We c'u ne kas are' ri nu c'ojol cutzucuj resaxic ri nu c'aslemal, ¡e ta c'u lo jun chque ri e aj ramak' ri Benjamin! ¡Chiya' c'olbal che chi chinuc'okoj na, bim c'u ne la' che rumal ri Ajawaxel chi je cubano!

¹² Craj c'u ne aretak ri Ajawaxel caril ri c'axc'obic ri in c'o wi, quebutak ulok tak tewichibal panuwi' che qui q'uexwäch tak ri c'okonic ri quebentatabej tak camic.”

¹³ Ri David xukuje' ri rachijab xquitakej ri qui be, benak c'u ri Simeiy chutzalanem ri juyub, pa u xcut ri David, cätajin cac'okonic xukuje' quebuq'uiak tak abaj, cuchicoj ulew.

¹⁴ Aretak ri ajawinel xukuje' ri winak ri e achilaninak xebopan chuchi' ri nima' Jordan, sibalaj e cosinak, xebuxlan c'u chila'.

Ri Absalon coc pa Jerusalen

¹⁵ Xoc c'u ne ri Absalon pa Jerusalen achilatal cumal conojel ri aj israelib xukuje' rumal ri Ahitopel.

¹⁶ Are c'u ri Husay ri arquit, utzalaj rachil ri David, xbe che u c'ulaxic ri Absalon, curak u chi', cubij: “¡Nim u k'ij ri ajawinel, nim u k'ij ri i ajawinel!”

¹⁷ Ri Absalon xuban we c'otoj chi'aj ri' che, xubij: “¿La are wa' ri a jiquil che ri awachil ri sibalaj ix utz ruc'? ¿Jasche man xatbe ta ruc'?”

¹⁸ “Man cuya' taj je quinban wa'” xcha' ri Husay, “rajawaxic c'u chwe quinc'ojic xukuje' quincanaj can ruc' ri chatajinak rumal ri Ajawaxel xukuje' cumal conojel ri aj israelib.

¹⁹ Ri u cab jasach, we c'o jachin rajawaxic u patanixic wumal, are' ri u c'ojol ri wachil ri sibalaj kanima' kib ruc'. Je ba ri' chi ri in quinpatanij na la jas ri nu banom che u patanixic ri tat la.”

²⁰ Chumatam chi c'u jubik' ri Absalon xuc'ot u chi' ri Ahitopel, xubij che: “¿Jas ri i no'j ri quiya' ix chi chekabana'?”

²¹ Ri Ahitopel xutzelej u bixic che ri Absalon: “Chatk'oyol cuc' ri man kas ta e rixokil ri a tat, ri xebuya' can che u chajixic ri rachoch. We je caban wa' conojel ri aj Israel caquich'ob c'u na chi at etzelatajinak chuwäch ri a tat, cäc'oji' c'u na chajin anima' cuc' conojel ri e k'axenak awuc'.”

²² Xtanix c'u jun cäbal ri lic'om che ri Absalon puwi' ri ja, chila' c'u xk'oyi' wi ri Absalon cuc' tak ri man kas ta e rixokil ri u tat, chquiwäch conojel ri aj israelib;

²³ pa ri k'ijol ri', ri u tz'onoxic jun no'j che ri Ahitopel xak junam ruc' ri je ta ne che ri Dios catz'onox ta wi ri no'j. Jewa' ri u chuk'ab ri u tzij ri Ahitopel che ri David xukuje' che ri Absalon.