Ucab Samuel 1 - Quiché Bible

Ri David caretamaj ri u cämical ri Saul

¹ Aretak cäminak chic ri Saul, Ri David xtzelej pa Siclag aretak e ch'äctajinak chic ri aj amalesib, xcanaj c'u can quieb k'ij chila'.

² Churox c'u k'ij xopan jun achi ri elinak ulok pa ri kajebal chquixo'l ri rajch'ojab ri Saul. E jisjobinak ri ratz'iak chrij ri u q'uiakom ulew pa u jolom che u c'utic chi c'axc'obinak ri ranima'. Aretak xopan chuwäch ri David, xumej rib c'ä cho ri ulew che u c'utic chi nim caril wi ri David.

³ Ri David xuc'ot u chi' xubij che: “¿Jawije' a petic?” “In cuininak xinwesaj ulok wib pa ri kajebal chquixo'l ri ajch'ojab aj israelib” xcha' we achi ri'.

⁴ “¿Jas c'ut ri c'ulmatajinak? ¡Chabana' tok'ob, chabij chwe!” xcha' ri David che. “Xebanimaj bic ri ajch'ojab chuwäch ri ch'o'j, e q'ui c'ut xecäm chque” xcha' we achi ri'. “¡Xukuje' xcäm ri Saul xukuje' ri Jonatan ri u c'ojol!”

⁵ “¿Jas c'u xaban che retamaxic chi xcäm ri Saul xukuje' ri Jonatan ri u c'ojol?” Xcha' ri David che ri ala ri xc'amow ulok ri tzijol.

⁶ We achi ri' xutzelej u bixic: “Xak c'u xurika' in c'o apan pa ri juyub Jilbo, xtaki' c'u nu wäch che ri Saul u q'uiakom rib puwi' ri u tz'imaj ch'ich' e petinak chi c'u ri carwaj re ch'o'j xukuje' ri ajch'ojab ri e petinak chunakaj.

⁷ Xca'y c'u chrij, aretak c'u xinrilo xinusiq'uij. Xinkeb ruc' xinjach c'u wib pa u k'ab.

⁸ Xuta' c'u chwe jachin ri in xinbij che chi in aj amalec.

⁹ Xutz'onoj c'u chwe chi chinkeb ruc', chinq'uisa' c'u u cämisaxic, camic chi c'u cubano c'ä c'asal c'ut.

¹⁰ Xinkeb c'u chuxcut xincämisaj, xinch'ob c'ut chi man cäcuintaj cäc'asi'c nim c'ut ri c'ax ri xuriko. Xinwesaj c'ut ri u corona che ri u jolom xukuje' ri wikbal u k'ab, rech quinc'am ulok che la, wajaw.”

¹¹ Ri David xukuje' ri e achilaninak xequijisila' ri catz'iak che u c'utic chi c'axc'obinak ri canima',

¹² xebok' c'ut xquibisoj ri u cämical ri Saul, xukuje' ri Jonatan ri u c'ojol, xukuje' rumal ri tzakmajic ri xquic'ulmaj ri aj israelib ri e rajch'ojab ri Ajawaxel Dios, man xquitij ta c'u wa c'a xkaj na ri k'ij.

¹³ Ri David xuc'ot c'u na u chi' ri ala ri xeyo'w ri tzijol che: “¿Ri at, jawije' catpe wi?” “Ri in man in aj waral taj, in aj amalec.” Xcha' ri ala.

¹⁴ “¿Jas c'u che xachajij anima' xawalijisaj ri a k'ab che u cämisaxic ri ajawinel ri cha'om rumal ri Ajawaxel?” Xcha' ri David,

¹⁵ xusiq'uij c'ut jun chque ri rachijab, xuya' takanic che: “¡Chacämisaj!” Ri are' utz u soquic ri aj amalec xubano, xcäm c'ut,

¹⁶ xubij c'u ri David che: “Chawij cäkaj wi ri kas a cämic, at xatk'alajisan ri a mac aretak xabij chi xacämisaj ri ajawinel ri cha'om rumal ri Ajawaxel.”

Ri u bisoxic ri Saul xukuje' ri Jonatan

¹⁷ Ri David xubixoj we bisobal ri' rumal ri u cämical ri Saul xukuje' ri Jonatan.

¹⁸ Xuya' c'u takanic chi che tijox ri winak aj Juda che u bixoxic. We bisobal ri' cäriktaj chupam Ri u Wuj ri Suc':

¹⁹ “¡Oh, Israel, xsocotaj ri a juluwem paquiwi' tak ri e a juyub! ¡E ch'äctajinak ri cowilaj tak ajch'ojab!

²⁰ Miya' u bixic pa Gat mawi mitzijoj pa tak ri be pa Ascalon, rech man quequicot taj ri ixokib aj pilisteyib, rech man quech'opintaj we ixokib ri' ri e k'ijilal diosib.

²¹ ¡Makaj chi ri jäb piwi' ix mawi ri räxk'ab, juyub tak aj Jilbo, e juyub tak wa' re cämical! Chila' xetac'alex wi ri qui quetecak tak ch'ich' ri nimak qui k'ij. Chila' xusach wi ri u chuplinic ri u quetequic ch'ich' ri Saul.

²² Mawi jumul ri Saul xukuje' ri Jonatan xetzelej ta ulok ri ma ta xequimu' ulok ri qui ch'ich' re ch'o'j xukuje' tak ri qui ch'ab chupam ri qui quiq'uel xukuje' ri qui xepoyil ri cowilaj tak ajch'ojab.

²³ Ri Saul xukuje' ri Jonatan, ri sibalaj quebajwaxic, mawi aretak e c'aslic mawi aretak e cäminak chic xquitas ta quib. ¡Ri e c'o na ri qui rapinic chquiwäch ri cot! ¡Ri c'o na ri qui chuk'ab chquiwäch ri coj!

²⁴ ¡Mia'laxelab tak aj Israel, chiwok'ej ri Saul, ri xebucoj quiäk tak atz'iak chiwij xukuje' coc'alaj lino, ri quixuwik cuc' tak ch'epebal re k'an puak!

²⁵ ¡Jas ri xquiban ri cowilaj tak ajch'ojab xech'äcataj pa ri ch'o'j! ¡Ri Jonatan xcämisax paquiwi' tak ri juyub!

²⁶ ¡In c'axc'obinak rumal awech, Jonatan, wachalal! ¡Sibalaj qui' xux ri a c'aslemal chwe, nimalaj qui'al chwe! Ri nu lok'ok'exic awumal xoc'ow na chuwäch ri qui lok'ok'exic ri ixokib.

²⁷ ¡Jas ri xquiban ri cowilaj tak ajch'ojab xech'äcataj pa ri ch'o'j! ¡Ri e ch'ojibal xeyojyobisaxic!”