Ucab Ajawinelab 8 - Quiché Bible

Ri ixok aj Sunem quetzelex tak ri jastak rech

¹ Ri Elisey xtzijon ruc' ri ixok ri u c'astajisam ri ral, xubij c'u che chi oj ri are' xukuje' ri e rachalaxic chbejekel pa jun c'olbal chic, rumal rech chi ri Ajawaxel u yo'm u bixic chi cäpe jun nimalaj wi'jal pa ri ulew, ri cäbeytaj wukub junab.

² Ri ixok xusuc'umaj rib je xubano jas ri no'j ri xya' che rumal ri k'axal tzij: xebuc'am bic ri rachalaxic xk'ax pa ri culew ri aj pilisteyib, wukub junab c'ut xcanaj can chi la'.

³ Aretak c'u xoc'ow we k'ijol ri' ri ixok xpe che rilic ri ajawinel che u bixic che chi chetzelex ri rachoch xukuje' tak ri rulew.

⁴ Ri ajawinel cätajin cätzijon ruc' ri Jiez, ri u pataninel ri Elisey ri k'axal tzij, u bim c'u che chi chebutzijoj conojel tak ri mayibal ri xebuban ri Elisey.

⁵ Pa ri jok'otaj c'ut aretak ri Jiez cätajin cutzijoj che ri ajawinel jas ri xuban ri Elisey che u c'astajisaxic ri ral jun ixok, xopan c'ut we ixok ri' che u bixic che ri ajawinel chi chetzelex ri rachoch xukuje' tak ri rulew. Xubij c'u ri Jiez che ri ajawinel: “O ajawinel, are ixok wa', xukuje' are' ral wa' ri xuc'astajisaj ri Elisey.”

⁶ Ri ajawinel xebuban c'otoj tak chi'aj che ri ixok, xutzijoj c'ut ri ixok ri u c'aslemal che ri ajawinel. Xuya' c'u na takanic ri ajawinel che jun rach k'atal tzij ri e utz ruc' chi chubana' chi chetzelex che ri ixok ri e rechbal xukuje' ronojel ri u wäch ri ulew ri u yo'm kas aretak xel bic pa ri ulew c'ä pa ri jok'otaj ri' ri uj c'o camic.

Ri Hazael, ajawinel re Siriy

⁷ Xbe c'u na ri Elisey pa Damasc. Pa ri k'ijol ri' cayawaj ri Ben-adad ajawinel re Siriy, xtzijox che chi opaninak ri k'axal tzij.

⁸ Xubij c'ut ri ajawinel che ri Hazael: “Chac'ama' bic jun sipanic jät che rilic ri k'axal tzij. Chabij che chi chich'obon che nu q'uexwäch ruc' ri Ajawaxel rech quinwetamaj we man quincäm rumal we yabilal ri'.”

⁹ Xbe c'ut ri Hazael che rilic ri k'axal tzij, xebuc'am c'u bic sipanic aj Damasc ri sibalaj nimak na qui k'ij, ri xebekax bic cumal cawinak (40) camey. Aretak xopan chuwäch, xubij che: “Ri Ben-adad, ajawinel re Siriy ri cuya' k'ij la jacha' jun tataxel, xinutak ulok che u ta'ic che la we man cäcäm rumal we u yabilal ri'.”

¹⁰ Ri Elisey xutzelej u bixic che: “Jät jabij che chi man cacäm taj rumal we u yabilal ri', u bim c'u ne ri Ajawaxel chwe chi kas cäcäm wi na.”

¹¹ Ri Elisey sibalaj co xuca'yej ri Hazael, ri xbanowic chi man utz ta xrilo. Man xuna' ta c'ut ri k'axal tzij xpe rok'ej,

¹² ri Hazael xc'ot u chi': “¿Jasche cok' la nu tat?” Ri Elisey xutzelej u bixic che: “Rumal rech chi weta'm chi cabana' c'ax chque ri aj israelib, cat'ika c'u na k'ak' chque tak ri e cowilaj tak to'bal quib, ch'ich' re ch'o'j cacämisabej na quech ri e u c'ojolab, quebacämisala' na tak ri e qui chutik xukuje' quebajakala' tak na ri qui pam tak ri ixokib ri e yawab tak winak.”

¹³ Ri Hazael xutzelej u bixic che: “¡Ri in man c'o ta nu banic, xa' in jun meba' tz'i'! ¿Jas ta che quebenban we jastak ri'?” Ri Elisey xutzelej u bixic che: “Ri Ajawaxel u k'alajisam chnuwäch chi ri at catux na ajawinel re Siriy.”

¹⁴ Ri Hazael xuya' can ri Elisey xtzelej chuwäch ri rajaw, ri xc'ot u chi' rumal: “¿Jas ri u bim ri Elisey chawe?” Ri Hazael xutzelej u bixic: “U bim chwe chi man cäcäm ta na la rumal ri yabilal la.”

¹⁵ Chucab c'u k'ij ri Hazael xuc'am jun atz'iak, xuwi c'u xmutaj rumal, xuya' chupalaj ri ajawinel, xcäm c'ut ri ajawinel. Aretak c'u xoc'ow wa', xajawin ri Hazael pa ri u c'olbal.

Rajawinic ri Joram pa Juda

¹⁶ Pa ri uro' junab ri rajawinic ri Joram pa Israel, u c'ojol ri Acab, ri Joram, u c'ojol ri Josapat, xuchaplej ajawinic pa Juda.

¹⁷ Juwinak cablajuj u junab aretak xuchaplej ajawinic, wajxakib junab c'ut xajawin pa Jerusalen.

¹⁸ Xutakej c'ut qui banic ri xequiban tak ri ajawinelab re Israel xukuje' ri xequiban ri e rija'lil ri Acab, ri rixokil rija'lil ri Acab; jeri' ri e u banoj e itzel chuwäch ri Ajawaxel.

¹⁹ Man xraj ta c'ut ri Ajawaxel xuq'uista tzij puwi' ri Juda, xa' che u tok'obisaxic u wäch ri David ri pataninel rech, ri xuchi'j che chi amak'el cac'oji' jun chäj tzijilic chuwäch.

²⁰ Pa ri rajawinic ri Joram, ri Edom xresaj rib chuxe' ri u takanic ri Juda xucoj c'ut ri kas rajawinel.

²¹ Xbe c'ut ri Joram pa Zair xebuc'am bic conojel tak ri e u carwaj re ch'o'j, chak'ab c'ut xewalijic xukuje' ri e qui nimakil tak ri ajch'ojab aj carwaj que ch'o'j xech'ojin cuc' ri aj edomib ri sutim quij cumal, xebanimaj c'u chquiwäch.

²² Xcuin c'ut ri Edom xresaj rib chuxe' ri u takanic ri Juda c'ä camic. Xukuje' pa ri k'ijol ri' xutor rib ri tinimit Libna.

²³ Ri u q'uisbalil ri u tzijobelil ri Joram xukuje' ronojel ri xubano, tz'ibatal chupam ri wuj rech ri qui tzijobelil tak ri ajawinelab re Juda.

²⁴ Aretak xcäm ri Joram, xmuk cuc' tak ri e u mam chupam ri u Tinimit ri David. Are' chi c'u xajawin ri u c'ojol pa ri u c'olbal ri Ocoziy u bi'.

Rajawinic ri Ocoziy pa Juda

²⁵ Pa ri ucablajuj junab ri rajawinic ri Joram, u c'ojol ri Acab, pa Israel, ri Ocoziy, u c'ojol ri Joram, ajawinel re Juda, xuchaplej ajawinic.

²⁶ Juwinak quieb u junab aretak xuchaplej ajawinic, jun junab c'ut xajawin pa Jerusalen. Ataliy u bi' ri u nan, rachalaxic ri Omri, ajawinel re Israel.

²⁷ Ri Ocoziy are' xutakej u banic ri xuban ri Acab xukuje' tak ri e ralc'ual ri xebajawinic, rumal c'u rech chi junam u wäch cuc' ri e aj Acab, ri e u banoj man e utz ta xeril ri Ajawaxel.

²⁸ Ri Ocoziy xujunaj rib ruc' ri Joram, u c'ojol ri Acab, che u banic ch'o'j pa Ramot re Galaad che u banic ch'o'j ruc' ri Hazael, ajawinel re Siriy. Are c'u ri aj siriyab xquisoc ri Joram,

²⁹ xtzelej c'u wa' pa Jezreel che qui cunaxic tak ri socotajic ri xquiban ri aj siriyab che pa Ramot aretak cätajin quech'ojin ruc' ri Hazael, ajawinel re Siriy. Rumal c'u rech chi yawab ri Joram, ri Ocoziy xbe pa Jezreel che u solixic.