Ucab Ajawinelab 6 - Quiché Bible

Ri mayibal re ri icäj

¹ C'o jun k'ij, xquibij ri e k'axal tzij che ri Elisey: “Chilampe' la, ri c'olbal ri uj jekel wi uc' la sibalaj latz' chke.

² Ya' la chke chi cujbe chuchi' ri nima' Jordan rech quekac'ama' ulok jujun tak che' chkajujunal, rech cakayac jun ka c'olbal ri cujjeki' wi.” “Jix ba',” xcha' ri Elisey.

³ “Bana' la tok'ob, chujachilaj la bic” xcha' jun chque. “Utz ri' quixinwachilaj bic” xcha' ri are'.

⁴ Xbe c'ut ri Elisey cuc' c'ä chuchi' ri Jordan, chila' c'u xquichaplej wi quit'oyic tak ri che'.

⁵ Xc'ulmataj c'ut chi, aretak jun cätajin cukasaj jun che', xjolquen ri ricäj xbe pa ri ja'. Xurak c'u u chi': “¡Ay, wajtij! ¡We icäj ri' xa' nu kajom!”

⁶ “¿Jawije' xkaj wi?” xcha' ri k'axal tzij che. Ri jun chic are' xc'utuw ri c'olbal. Ri Elisey xut'oy ri u k'ab jun che', xunim bic chila' xuban c'ut chi cälew ri icäj xel ulok.

⁷ “Chachapa',” xcha' ri Elisey. Ri jun chic xuyuk ri u k'ab che u chapic ri icäj.

Ri Elisey xukuje' ri e aj Siriy

⁸ Ri rajawinel ri Siriy c'o pa ch'o'j ruc' ri Israel, pa jun chomanic ri xuban cuc' ri qui nimal ri rajch'ojab, xubij jachique tak c'olbal xuchomaj caquiya' wi na quib.

⁹ Xutak c'u u bixic ri Elisey che ri ajawinel re Israel chi chuchajij rib moc'ow pa tak we c'olbal ri', rumal rech chi ri aj siriyab benam que jela'.

¹⁰ Rumal c'u ri' ri ajawinel re Israel xebutak bic ri e rajch'ojab pa ri c'olbal ri u bim ri k'axal tzij, rech man cäch'äctaj taj je c'u ri' q'uimul xto'tajic.

¹¹ Ri ajawinel re Siriy sibalaj ch'ibatajinak rumal wa', xebusiq'uij c'ut ri e qui nimal tak ri e rajch'ojab xubij c'u chque: “¡Chibij chwe jachin ri are jun chke k'axenak ruc' ri ajawinel re Israel!”

¹² Jun chque xutzelej u bixic: “Man c'o ta jun. Are' ri Elisey ri k'axal tzij ri c'o pa Israel, are ri cäbin che ri ajawinel pa Israel ronojel ri cäbij la xukuje' ne ri catzijoj la chupam ri warabal la.”

¹³ Are c'u ri ajawinel re Siriy xuya' takanic. “Chich'obo' jawije' ri c'o wi, rech quebentak bic jujun achijab che u chapic ulok.”

¹⁴ Aretak c'u xbix che chi c'o pa Dotan, xutak bic juk'at aj quiejab che u banic ch'o'j, xukuje' carwaj quech ch'o'j, xukuje' ajch'ojab ri xak quebin che cakan, chak'ab c'ut xebopan pa Dotan xusutij c'ut rij ri tinimit.

¹⁵ Ak'ab c'ut che ri ucab k'ij xwalij ri u pataninel ri Elisey, aretak c'u xel bic pa ri be xtaki' u wäch chque ri ajch'ojab ri qui sutim rij ri tinimit cumal aj quiejab xukuje' carwaj re ch'o'j; xbe c'u che u bixic che ri Elisey: “Ay, wajtij, ¿jas c'u ri quekabana' camic?”

¹⁶ Ri Elisey xutzelej u bixic che: “Maxe'j awib, rumal rech chi are e q'ui na ri e c'o kuc' chquiwäch ri e c'o cuc' e are'.”

¹⁷ Xuban c'u ch'awem ri Elisey ruc' ri Ajawaxel, xubij che: “Quinbochi'n che la, Ajawaxel, chi chejaka' la ri u bak'wäch rech carilo.” Ri Ajawaxel xebujak ri u bak'wäch ri pataninel, we pataninel ri' xrilo chi ri c'ache'laj nojinak chque aj quiejab xukuje' tak carwaj e re k'ak' ri e c'o chrij ri Elisey.

¹⁸ Aretak ri aj Siriy xepe che u banic ch'o'j ruc', ri Elisey xubochi'j ri Ajawaxel: “Quintz'onoj che la chi chemoyirisaj la we winak ri'.” Xemoyirisax c'ut rumal ri Ajawaxel, je jas ri xutz'onoj ri Elisey.

¹⁹ Xubij c'ut ri Elisey chque: “Man are ta wa' ri be, man are ta tinimit wa' ri qui tzucuj. Chiniterenej, quixinc'am c'u na bic ruc' ri achi ri qui tzucuj.” Xebuc'am c'u bic pa Samar.

²⁰ Aretak xebopan chila', ri Elisey xuban we ch'awem ri' ruc' Dios: “Ajawaxel camic chejaka' la ri qui bak'wäch, rech quecuinic queca'yic.” C'äte' c'u xquilo chi e c'o chupam ri Samar.

²¹ Aretak c'u xeilitaj rumal ri ajawinel re Israel, xuc'ot u chi' ri Elisey: “¿La quebencämisaj, nu tat, a quebencämisaj?”

²² Ri Elisey xutzelej u bixic che: “Jayi', man quebacämisaj taj. ¿La xa' pu nak'atisam ib la che qui cämisaxic jachin tak ri quekaj pa k'ab la rumal ri ch'ich' re ch'o'j la xukuje' rumal ri q'uiakbal ch'ab la? Chya' la bic qui wa cuq'uia', chetzelextaj c'u la bic che ri cajaw.”

²³ Xban c'u jun nimalaj nimak'ij chque, xewa' c'ut xukuje' xebuq'uianic. Xejachaxtax c'u bic rumal ri ajawinel, xetzelej c'ut xebe ruc' ri cajaw. Mawi c'u jumul xetzelej ta chic ri aj siriyab pa ri culew ri aj israelib.

Ri Elisey xukuje' ri u sutixic rij ri Samar

²⁴ C'ä chumatam chi c'ut che wa', ri Ben-adad, ajawinel re Siriy, xebumulij conojel ri rajch'ojab xpetic xusutij rij ri Samar che u banic ch'o'j ruc'.

²⁵ Xpe c'u jun nimalaj wi'jal pa Samar, sibalaj c'u lak'aputalic chi ri u jolom jun bur xopan jumuch' rakan sak puak ri rajil, niq'uiaj libra u mes palomax rajil job rakan sak puak.

²⁶ C'o jun k'ij, ri ajawinel re Israel cäbin puwi' ri nim tapia, xurak c'u u chi' jun ixok: “¡Oh ajawinel, chinto' la!”

²⁷ Ri ajawinel xutzelej u bixic: “We ri Ajawaxel man catuto' taj, ¿jas ta che cawaj chi in quinbanowic? ¿La quincuin ta puch quinya' a trico o u wa'l a uva?

²⁸ ¿Jas ri a rikom?” Ri ixok xutzelej u bixic: “We ixok ri' xubij chwe chi chinya' ri wal rech cakatij camic, chwek chi c'ut are' cakatij chic ri rech.

²⁹ Xkatzac c'ut ri wal junam c'ut xkatijo. Chucab k'ij xinbij che chi chujacha' ri ral rech cäkatij junam, u c'olom c'ut.”

³⁰ Aretak xuta' ri ajawinel ri xubij we ixok ri', xujis ri ratz'iak chrij che u c'utic ri royowal. Rumal c'u rech chi puwi' ri nim tapia e c'o wi ri winak xquilo chi u cojom wakwoj atz'iak chrij ri u tz'umal.

³¹ Co xurak u chi' ri ajawinel: “¡Chuya' nimalaj c'äjisabal wächaj ri Dios chwe we kas pa ri k'ij camic man quesax ta ri u jolom ri Elisey, ri u c'ojol ri Sapat!”

³² Ri Elisey c'o pa ri rachoch, t'uyul junam cuc' ri nimak tak tatayib. Are' c'u ri ajawinel, u takom bic jun achi. C'ä majok c'u chopan ri u tako'n ri ajawinel, ri Elisey xubij chque ri nimak tak tatayib: “Chiwila' chi we cämisanel ri' u takom ulok jun achi che resaxic ri nu jolom. Chitatabej c'ut, aretak cul ri u tako'n chi tz'apij ri uchi'ja chuwäch chic'opij iwib chrij rech man coc ta ulok, catataj c'ut ri u pa rakan ri rajaw ri petinak chrij.”

³³ C'ä cätajin c'u cätzijon cuc', aretak xtac'atob ri tako'n chuwäch ri Elisey cubij c'ut: “Are' c'u ri Ajawaxel c'amowinak ulok we quiäkasakil ri' pakawi', ¿Jas ta chic ri quincuinic quinweyej ta chi na pa u k'ab?”