Ucab Ajawinelab 4 - Quiché Bible

Ri mayibal ri xc'ulmataj ruc' aseit

¹ C'o jun ixok, ri xrixokelaj can jun chque ri k'axal tzij, xetzujun chuwäch ri Elisey, xubij che: “Ri wachajil cäminak, ri lal eta'm la chi nim xril wi ri Ajawaxel. Opaninak c'ut ri ya'l jalomal are c'u cäraj quebuc'am bic ri quieb wal che u lok'om pataninel.”

² Ri Elisey xuc'ot u chi': “¿Jas ta ri quincuinic quinban ta che a to'ic? Chabij chwe jas ri c'o awuc' chupam ri awachoch.” Ri ixok xutzelej u bixic che: “We pataninel ech la ri' man c'o ta jas c'o chupam ri rachoch, xak xuwi jun alaj xaru' aseit.”

³ Xubij c'ut ri Elisey che: “Jät ba' camic jebakaja' jujun tak xaru' cuc' tak ri a c'ulja', ¡conojel ri xaru' ri catcuin che quikajic!

⁴ Chanima' c'u awib chupam ri awachoch quebawachilaj ri awal, chatz'apij ri uchi'ja chebanojisaj c'ut conojel ri xaru' ruc' ri aseit xak c'u jun quebaya' wi ri quenojic.”

⁵ Ri ixok xutas rib chrij ri Elisey xutz'apij c'u rib e rachil ri ral. Xuchaplej c'u qui nojisaxic tak ri xaru' ri quequik'axej tak ri ral che.

⁶ Aretak c'u e nojinak chi conojel ri xaru', xuya' takanic che jun chque ri ral: “Chac'ama' chi ulok jun xaru'.” Ri ral xutzelej u bixic che: “Man e c'o ta chic xaru'.” Pa ri jok'otaj ri' xk'ilk'ob ri aseit.

⁷ Xbe c'u ri ixok che u bixic che ri k'axal tzij, xubij c'u wa' che: “Jät ba' che u c'ayixic ri aseit, chatojo' c'ut ri a c'as. Ruc' ri cäto'tajic cuya' catzuk awib cuc' ri awal.”

Ri Elisey xukuje' ri ixok re Sunem

⁸ C'o jun k'ij xoc'ow ri Elisey pa Sunem, c'o jun ixok ri sibalaj nim u k'ij c'o chila' ri xrula'j ruc' nimalaj chuk'ab rech coc pa ja che u tijic u wa. Joropa' c'u mul coc'ow ri Elisey chila', cäcanaj che u tijic u wa.

⁹ Xubij c'ut ri ixok che ri rachajil: “Chawilampe', in weta'm chi we achi ri' joropa' mul coc'owic cujusolij, are' jun tastalicalaj k'axal u tzij ri Dios.

¹⁰ Kayaca' jun alaj ja puwi' ri ja. Cakacoj jun ch'at, jun mexa, jun tem, xukuje' jun chäj ri cuya' sakil chupam. Jeri', aretak cul che ka solixic, cuya' cäcanaj can chila'.”

¹¹ C'o jumul xopan pa ri ja ri' rech cäwar chupam,

¹² xubij che ri Jiez, ri u pataninel: “Chasiq'uij ri chuchu' aj Sunem.” Ri pataninel xusiq'uij, aretak c'u xopan ri chuchu' chuwäch, ri Elisey xuya' takanic che ri u pataninel:

¹³ “Chabij che we chuchu' ri' ri sibalaj uj u lok', chi we c'o jun jasach ri cujcuinic cakaban che u to'ic; we cäraj chi cujch'aw puwi' ruc' ri ajawinel o ruc' ri qui nimal ajch'ojab.” “In utz nu banom chquixo'l ri e nu winakil,” xcha' ri chuchu'.

¹⁴ “¿Jas ta c'ut ri cakato' wi?” “Man weta'm taj,” xcha' ri Jiez. “Man e c'o ta ral, nim winak chi c'ut ri rachajil.”

¹⁵ “Chasiq'uij,” xcha' ri Elisey. Ri pataninel xbe che u siq'uixic ulok, xetac'al c'ut ri chuchu' chuchi' ri ja.

¹⁶ Xubij c'ut ri Elisey che: “Che ri junab ri cäpetic, je tak k'ijol wa', ak'alum chic jun awal.” Ri ixok xutzelej u bixic: “Jayi', tat, jun achi ri pataninel rech ri Dios musub ri pataninel rech.”

¹⁷ Je c'ut jacha' ri xuya' u bixic ri Elisey che, ri ixok xcanaj yawab winak chupam c'ut ri jun junab chic xralaj jun ral ala.

¹⁸ Xq'uiy c'ut ri alaj ala. C'o c'ut jun k'ij xel bic che rilic ri u tat, ri c'o cuc' ri banal tak k'atoj,

¹⁹ xuchaplej u rakic u chi' che ri u tat: “¡C'ax, nu jolom! ¡C'ax ri nu jolom!” Xubij c'ut ri u tat che jun pataninel: “Chac'ama' bic ruc' ri u nan.”

²⁰ Ri pataninel xuc'amo xuc'am bic jawije' c'o wi ri u nan, xut'uyuba' c'u paquiwi' ri quieb u ch'ec c'ä xurik na ri tiq'uil k'ij. Xcäm c'ut ri alaj ala.

²¹ Xupakaba' c'ut ri ac'al chupam ri u warabal ri k'axal tzij, xuk'oyoba' c'u can puwi' ri u ch'at xel c'u ulok, xutz'apij can ri uchi'ja chrij.

²² Xusiq'uij c'ut ri rachajil xubij c'u che: “Chataka' ulok jun pataninel ruc' jun ati't bur chwe, rech quinbe che rilic ri k'axal tzij. Quintzelextax c'u ulok.”

²³ “¿Jasche catbe che rilic camic?” xcha' ri rachajil che. “Man c'ac' ic' taj mawi uxlanibal k'ij.” “Matoc il,” xcha' ri ixok.

²⁴ Xtakan c'u che u tasic rij jun ati't bur, xubij c'u che ri u pataninel: “Jo', chujbinok. C'ä quinbij na chawe, mabano chi quinbeytajic.”

²⁵ Je xuban wa' che u takexic ri u be xopan c'u puwi' ri juyub Carmel, ri c'o wi ri k'axal tzij. Aretak xril ri Elisey chi petinak chinaj, xubij che ri Jiez, ri u pataninel: “Chawila', are' ri chuchu' aj Sunem.

²⁶ Chatzaka' anim che u c'ulaxic chata' c'u che jacha' c'olic, jacha' c'u c'o ri rachajil xukuje' ri ral.” Xbe ri pataninel, ri chuchu' xubij che chi utz c'olic.

²⁷ Xbextax c'ut pa ri juyub jawije' ri c'o wi ri Elisey, xebuk'aluj c'ut ri quieb u ch'ec, xkeb ri Jiez che u tasic, xubij c'ut ri Elisey che: “Chaya' canok, sibalaj c'u nim ri u bis, c'ämaja' c'u c'o jas u bim ri Ajawaxel chwe jas ri u c'ulmam.”

²⁸ Xubij c'ut ri chuchu' che: “Tat, ¿La xa' pu xinta' che la chi cac'oji' jun wal? ¿La ma ta xintz'onoj che la chi man quinsub ta la?”

²⁹ Xubij c'ut ri Elisey che ri Jiez: “Chasuc'umaj awib chac'ama bic ri nu ch'amiy jät c'u chila'. We c'o jachin cac'ulaj pa ri be, maya' rutzil u wäch; we c'u ne c'o jachin cuya' rutzil a wäch c'o matzelej u bixic che. Chaya' c'ut ri nu ch'amiy puwi' ri u palaj ri alaj ala.”

³⁰ Are c'u ri u nan ri alaj ala xubij che ri Elisey: “Quinban na ri chi'nic ri kas cäban na, quincha' pa u bi' ri Ajawaxel xukuje' umal la, chi man quinel ta bic waral we man cujbe junam.” Xbe c'u na ri Elisey junam ruc' ri chuchu'.

³¹ Nabejinak c'u ne ri Jiez chquiwäch u yo'm c'u ne ri ch'imiy puwi' ri u palaj ri ala, man c'o ta c'u jubik etal re c'aslemal cuya'; rumal c'u ri' ri Jiez xbe che u c'ulaxic ri Elisey xubij c'u che: “Ri alaj ala man caslab taj.”

³² Aretak xoc ri Elisey chupam ri ja, ri alaj ala cäminak, tutz'ubam puwi' ri ch'at.

³³ Xoc c'u bic, xutz'apij c'ut ri u chi' ja xuban ch'awem ruc' ri Ajawaxel. Xak u tuquiel rachil ri alaj ala quicabichal e c'o chupam ri ja.

³⁴ Xpaki' c'u puwi' ri ch'at xujupuba' c'u rib puwi' ri alaj ala, xuya' ri u chi', ri e u bak'wäch xukuje' tak ri u k'ab cuc' ri e rech ri alaj ala xunaq'uej c'ut ri u cuerp ruc' ri rech. Xuchaplej c'ut u mik'ic ri u cuerp ri alaj ala.

³⁵ Xwalij c'ut ri Elisey xwacat pa ri ja; xpaki' chi c'u jumul puwi' ri ch'at xujupulej chi c'u jumul ri u cuerp ri alaj ala. Xat'ixnab c'ut wukub mul ri alaj ala, xebujak c'ut ri u bak'wäch.

³⁶ Ri Elisey xusiq'uij ri Jiez xubij c'u che: “Chasiq'uij ri chuchu' aj Sunem.” Ri Jiez je xubano, aretak c'u xopan ri chuchu' jawije' ri c'o wi ri Elisey, wa' xubij che: “C'o ri awal ri'.”

³⁷ Ri chuchu' xkebic xuq'uiak rib chuwäch ri Elisey; xuc'am c'ut ri ral xel ulok pa ri ja.

Ri mayibal che ri riquil

³⁸ Xuwi c'u xbantaj wa', xtzelej ri Elisey pa Jilgal. Pa ri k'ijol ri' c'o nimalaj wi'jal pa ri ulew ri', c'o c'u jun k'ij e t'uyut'uj ri e k'axal tak tzij chuwäch ri Elisey, xubij c'u wa' che ri u pataninel: “Chacojo ri nimalaj t'uy puwi' ri k'ak', chabana' c'u jun riquil chque ri e k'axal tak tzij.”

³⁹ Jun chque xelbic xbe pa ri juyub che u molic jubik' ichaj, xurik jun alaj juyubal che' ri e c'o tak u wäch ri xebuch'upu, e jacha' juyubal tak mucun, ri xebumulij bic chupam ri u k'u'. Aretak xopanic xuchapa' qui pusic xuya' ruc' ri riquil, man reta'm ta c'ut jasäch.

⁴⁰ Xcoj c'ut we riquil ri' chquiwäch ri e k'axal tak tzij, aretak c'u xquichap u tijic ri riquil, xquirak qui chi': “¡K'axal tzij we riquil c'o k'inob re cämisanic chupam!” Man xquitij ta chi c'ut.

⁴¹ Xuya' c'u takanic ri Elisey: “Chic'ama' ulok jubik' c'äj chwe.” Xuya' c'ut ri c'äj chupam ri t'uy, xuya' takanic. “¡Camic chi cojo' c'u wa' chquiwäch ri winak!” Xewa' c'u ri winak, man c'o ta chi c'ut etzelal chupam ri t'uy.

⁴² Xopan c'ut jun achi aj Baal-salis xebuya' juwinak caxlanwa re sebad che ri Elisey ri c'ä te' relic ulok pa jorno, xukuje' ruc'am ulok jubik' trico iq'uel chupam jun c'olbal. Xubij c'ut ri Elisey che ri u pataninel: “Chaya' chque ri winak rech quewa'ic.”

⁴³ Ri pataninel xutzelej u bixic: “¿Jas quinban che u ya'ic wa' che qui tzukic jun sient winak?” Ri Elisey xutzelej u bixic: “Chaya' chque ri winak rech quewa'ic, u bim c'ut ri Ajawaxel chi quewa' na c'o c'u cäto'taj na.”

⁴⁴ Je c'u ri', ri pataninel xucoj chquiwäch, xewi' c'ut c'o c'u xto'tajic, jacha' ri u bim ri Ajawaxel Dios.