Ucab Ajawinelab 25 - Quiché Bible

Ri u tzakic ri Jerusalen

¹ Chupam ri lajuj rajilabal ri lajuj ic' re ri ubelejeb junab ri rajawinic ri Sedequiy, ri ajawinel Nabucodonosor xopan che u banic ch'o'j ruc' ri Jerusalen e rachil conojel ri rajch'ojab, xusutij c'u rij. Xaya' rib chuwäch, xebuwalijisaj c'u tak ak'anisabal chrij che u banic ch'o'j ruc'.

² Ri tinimit xsutix rij c'ä pa ri julajuj (11) junab re ri rajawinic ri Sedequiy.

³ Pa ri belejeb rajilabal ri ucaj ic' re we junab ri' xnimataj ri wi'jal chupam ri tinimit, man c'o ta chi c'u jas caquitij ri winak.

⁴ Xquic'ot c'u jun jul chuxe' ri nimalaj u tapia ri tinimit, pune' c'u sutital rij cumal ri aj caldeyib are' c'u ri ajawinel xukuje' conojel ri ajch'ojab xebanimaj bic chak'ab xquiya' can ri tinimit. Xebel bic pa ri oquibal ri c'o chquixo'l ri quieb nimak tak tapia, chupam ri be ri c'o chquipam tak ri u tiquibal tak u cotz'i'j ri ajawinel, are' c'u xquimajij ri be ri cäbe pa ri beya' re ri Jordan.

⁵ E are' tak c'ut ri ajch'ojab aj caldeyib xquiterenej ri ajawinel Sedequiy pa rakan, xequik'i' c'ut pa ri lianic re Jerico. Conojel ri rajch'ojab xquiya' can u tuquiel xquijabuj c'u quib.

⁶ Ri aj caldeyib xquichap ri ajawinel xquic'am c'u bic chuwäch ri ajawinel re Babilon, ri c'o pa Ribla, chupam ri ulew re ri Hamat. Chila' c'ut xuk'at wi tzij ri Nabucodonosor puwi' ri Sedequiy,

⁷ chuwäch c'u wa' xtakan che u k'atic qui kul ri e u c'ojol. Are c'u ri che ri Sedequiy xuya' takanic chi chec'otix ri u bak'wäch chcoj c'u pa tikom ch'ich' che u c'amic bic pa Babilon.

Ri u sachisaxic u wäch ri rachoch Dios

⁸ Pa ri uwuk rajilabal ri ro' ic' re ri ubelejlajuj (19) u junab ri rajawinic ri Nabucodonosor, ajawinel re Babilon, ri Nabuzaradan, rach k'atal tzij ri ajawinel xukuje' takanel paquiwi' ri chajil tak rech ri ajawinel, xopan pa Jerusalen

⁹ xuporoj c'ut ri rachoch Dios, ri rachoch ri ajawinel xukuje' conojel ri ja ri e c'o chupam ri tinimit, kas c'u e are xenabejisax conojel ri cachoch tak ri nimak tak qui k'ij,

¹⁰ ri ajch'ojab aj caldeyib ri e achilaninak xequit'akij tak ri e nimak tak tapia ri e u sutim rij ri Jerusalen.

¹¹ Ri Nabuzaradan xeresaj bic xebuc'am bic pa Babilon ri e canajinak chupam ri tinimit xukuje' ri qui junamam qui wäch ruc' ri ajawinel re Babilon, xukuje' ri queta'm u banic jun chac.

¹² Xuwi xebuya' can jujun ri sibalaj e meba' na ri e c'o chquixo'l ri winak, rech quequilij ri ticbal tak uva xukuje' tak ri ulew.

¹³ Ri aj caldeyib xequimuch tak ri jastak ri e re k'an ch'ich' ri e c'o chupam ri rachoch Dios: ri rakan tak ja, ri e tiq'uilibal xukuje' ri nimalaj c'olbal ja', xquic'am c'u bic ronojel ri k'an ch'ich' pa Babilon,

¹⁴ xukuje' xequic'am bic ri e yabal chaj, ri e paq'uebal, ri e kopibal tak u wi chaj, ri nimak tak paq'uebal xukuje' conojel tak ri chaconisan re k'an ch'ich' ri quebajwataj che ri k'ijilanic.

¹⁵ Ri qui nimal ajch'ojab xebuc'am bic conojel ri jastak re k'an puak xukuje' re sak puak: ri e yabal rachak k'ak' xukuje' ri e nimak tak lak.

¹⁶ Ri quieb rakan ja, ri nimalaj c'olbal ja' ri e tiq'uilibal ri xtak qui banic rumal ri Salomon chupam ri rachoch Dios, ri capajanic man cäban ta cuinic che retamaxic.

¹⁷ Chquijujunal ri rakan ja coc'ow na belejeb bara' ruc' oxib k'abaj u taq'ui'c, c'o chi c'u na jun retz'balil puwi' ri quetan quieb bara' ruc' quieb k'abaj u taq'ui'c c'o c'u jun c'at re k'an ch'ic' chrij, ri wiktal che crabaj. Ri quieb rakan ja xak e junam.

Ri resaxic bic ri tinimit Juda

¹⁸ Ri qui nimal ajch'ojab xuyut xukuje' ri Seraiy, qui nimal ri e cojol tabal tok'ob xukuje' ri Soponiy ri ucab cojol tabal tok'ob ri cajunamataj ruc', xukuje' ri e oxib chajil rech ri u chi' ri rachoch Dios.

¹⁹ Chquixo'l ri winak ri e aj tinimit xuyut ri qui nimal ajch'ojab ri cätakan paquiwi' ri ajch'ojab, job achijab ri quepatanij che ri ajawinel ri e c'o chupam ri tinimit, ri nim u banic ri quemolow tak ri achijab rech queboc che ajch'ojab xukuje' oxc'al (60) achijab ri e c'o chupam ri tinimit ri nimak tak qui k'ij.

^20-21 Ri Nabuzaradan xebuc'am bic conojel wa' chuwäch ri ajawinel re Babilon ri c'o pa Ribla, chupam ri rulew ri Hamat. Xtakan ri ajawinel re Babilon che qui cämisaxic chila'. Jera' xban che resaxic bic ri aj Juda pa ri culew.

Niq'uiaj winak chic xebanimajic xebe pa Ejipt

²² Ri Nabucodonosor, ajawinel re Babilon, xucoj can ri Jedaliy che k'atal tzij, u c'ojol ri Ahicam ri' u mam c'ut ri Sapan, rech cätakan paquiwi' ri winak ri xebuya' can pa Juda.

²³ Aretak c'ut ri e qui nimal ri ajch'ojab aj Juda xukuje' ri cajch'ojab xquetamaj wa', xebe pa Mizpa che u tzijobexic ri Jedaliy. E are' tak wa', ri Ismael u c'ojol ri Netaniy; ri Joanan, u c'ojol ri Carey; ri Seraiy, u c'ojol ri Tanumet, aj Netop; xukuje' ri Jaazaniy, u c'ojol jun achi aj Maac. Xebachilax tak bic cumal ri cajch'ojab.

²⁴ Ri Jedaliy xuban ri chi'nic ri kas cäban na, xcha' chque xukuje' chque ri cajch'ojab, xubij c'u chque chi maquixe'j quib chquiwäch ri e qui nimal tak ri ajch'ojab aj caldeyib, xan' chixjekel can chupam ri ulew chipatanij c'ut ri ajawinel re Babilon, utz c'u quixel na.

²⁵ Pa ri uwuk ic', ri Ismael u c'ojol ri Netaniy ri' u mam c'ut ri Elisam, rija'lil ri ajawinel re Juda, xopanic e rachilam bic lajuj achijab, conojel c'ut xeboc che u cämisaxic ri Jedaliy xukuje' ri aj Juda xukuje' ri aj caldeyib ri e c'o apan ruc' pa Mizpa.

²⁶ Conojel c'ut ri winak rumal ri qui xe'n ib chquiwäch ri aj caldeyib, xewalijic, xebe pa Ejipt, chinimak chi ch'utik xukuje' chi e qui nimal tak ajch'ojab.

Ri Joaquin quesax pa che' caya' u k'ij pa Babilon

²⁷ Chupam ri juwinak wukub (27) rajilabal ri ucablajuj (12) ic' re ri juwinak wuklajuj (37) junab che ri resaxic bic ri Joaquin pa Juda, xuchaplej ajawinic pa Babilon ri ajawinel Ebil-merodac, ri xel u c'u'x che ri Joaquin xresaj c'u pa che',

²⁸ xuban utzil che are', xuya' na u k'ij chquiwäch ri niq'uiaj ajawinelab chic ri junam ri e c'o ruc' pa Babilon.

²⁹ Je c'u ri' xcuinic xresaj ri atz'iak chrij ri xucoj pa che' xuchap c'u wa'im ruc' ri ajawinel pa ronojel ri u c'aslemal.

³⁰ Pa ronojel c'u na ri u c'aslemal, ri Joaquin xtoj ri u k'ij rumal ri ajawinel re Babilon.