Ucab Ajawinelab 24 - Quiché Bible

Ri Nabucodonosor xumajij ri tinimit

¹ Aretak cätajin cajawin ri Joasim, ri Nabucodonosor, ajawinel re Babilon, xumajij ri ulew, oxib junab c'ut xc'oji' ri Joasim chuxe' ri u takanic. Xuq'uex c'ut u chomanic xuwalijisaj c'u rib chrij.

² Are' c'u ri Ajawaxel xebutak ulok chrij ri Joasim jumulaj eläk'omab aj caldeyib, aj siriyab, aj moabib xukuje' aj amonib. Xebutak ulok chrij ri Juda, rech caquisachisaj u wäch, je jas ri u yo'm u bixic ri Ajawaxel cumal ri e pataninel tak rech ri e k'axal tzij.

³ Xuc'ulmaj c'ut ri Juda wa' rumal rech chi ri Ajawaxel je xuchomaj u banic, che resaxic ri Juda chuwäch qui mac quech tak ri macaj ri xebuban ri Manases,

⁴ xukuje' rumal ri quic' ri xutixo ri man c'o ta u mac ri xunojasibej rech ri Jerusalen. Rumal rech wa' ri Ajawaxel man xraj ta chic xusach ta chic u mac.

⁵ Ri u tz'akatil ri u tzijobelil ri Joasim xukuje' ronojel ri xubano tz'ibatal chupam ri wuj rech ri qui tzijobelil tak ri ajawinelab pa Juda.

⁶ Aretak cäminak chic, are' xajawin ri u c'ojol chupam ri u c'olbal ri Joaquin u bi'.

⁷ Kas chi' c'ut ri ajawinel re Ejipt man xel ta chi bic chupam ri rulew, rumal rech chi ri ajawinel re Babilon u ch'äcom ronojel ri ulew ri e c'o can pa u k'ab nabe, kas ruc' ri nima' re Ejipt c'ä ruc' ri nima' Euprats.

Ri Joaquin xukuje' ri e rach k'atal tak tzij xec'am bic pa Babilon

⁸ Wajxaklajuj (18) u junab ri Joaquin aretak xuchaplej ajawinic, oxib ic' c'ut xajawin pa Jerusalen. Nehusta u bi' ri u nan, u mia'l ri Elnatan, aj Jerusalen.

⁹ Ri e u banoj man e utz ta xeril ri Ajawaxel, xak junam ruc' ri xebuban ri u tat.

¹⁰ Pa ri k'ijol ri', ri e rajch'ojab ri Nabucodonosor, ajawinel re Babilon xepe che u banic ch'o'j ruc' ri Jerusalen xquisutij c'u rij che u banic ch'o'j ruc'.

¹¹ Aretak c'u cätajin u banic ri ch'o'j ruc' xopan ri Nabucodonosor.

¹² Are' c'u ri Joaquin, ajawinel re Juda, rachil ri u nan, xukuje' ri e rach k'atal tak tzij, ri e c'amal tak be xukuje' ri achijab ri junam qui wäch ruc', xquijach quib pa u k'ab ri ajawinel re Babilon, ri xebuyutu. Xc'ulmataj wa' chupam ri wajxakib junab ri rajawinic ri Nabucodonosor.

¹³ Xuchaplej c'ut ri Nabucodonosor quesaxic conojel ri k'inomal ri e c'o chupam ri rachoch ri Ajawaxel xukuje' ri c'o chupam ri rachoch ri ajawinel je, jacha' ri u yo'm u bixic ri Ajawaxel, xebupaxij conojel ri jastak re k'an puak ri xebuban can ri Salomon ri ajawinel re Israel che ri rachoch ri Ajawaxel.

¹⁴ Xebuyut c'u bic conojel ri aj Jerusalen, conojel ri e c'amal tak be xukuje' conojel ri cowilaj tak ajch'ojab, xukuje' conojel ri queta'm u banic jun chac xukuje' ri e ch'ayal tak ch'ich', c'ä xetz'akat na lajuj mil (10,000) ajpache'. Xuwi c'u xecanaj can ri mebayib tak winak chupam ri ulew.

¹⁵ Ri Nabucodonosor xebuc'am bic ri Joaquin rachil ri u nan, xukuje' tak ri rixokil, ri e rach k'atal tak tzij, xukuje' tak ri winak ri e nimak na qui k'ij ri e c'o pa ri ulew. Xeresaj bic pa Jerusalen xebuc'am bic pa Babilon.

¹⁶ Chinimalaj conojel ri nimak qui k'ij ri xeyut rumal ri ajawinel re Babilon ri xebec'am bic, e wukub mil (7,000); e jun mil (1,000) c'ut ri queta'm u banic jun chac xukuje' e ch'ayal tak ch'ich', e c'o chi c'u wi ri' ri cowilaj tak achijab ri e utz che u banic ch'o'j.

¹⁷ Ri ajawinel re Babilon xucoj can ri Mataniy che ajawinel, che u q'uexwäch ri Joaquin ri u c'ojol ri ratz ri Joaquin, xuq'uex c'ut ri u bi' xucoj c'u Sedequiy chrij.

Ri rajawinic ri Sedequiy

¹⁸ Juwinak jun (21) u junab ri Sedequiy aretak xuchaplej ajawinic, julajuj (11) junab c'ut xajawin pa Jerusalen. Hamutal c'ut u bi' ri u nan, u mia'l ri Jeremiy, aj Libna c'ut.

¹⁹ Ri e u banoj itzel xeril ri Ajawaxel, e junam ruc' ri xebuban ri Joasim.

²⁰ Rumal ri' xoyowar ri Ajawaxel chrij ri Jerusalen xukuje' chrij ri Juda, xebuq'uiak bic chuwäch. Xuwalijisaj c'u rib ri Sedequiy chrij ri ajawinel re Babilon.