Ucab Ajawinelab 22 - Quiché Bible

Ri rajawinic ri Josiy pa Juda

¹ Wajxakib u junab c'ut ri Josiy aretak xuchaplej ajawinic, juwinak julajuj (31) junab c'ut xajawin pa Jerusalen. Ri u nan Jedid u bi', u mia'l ri Adaiy, aj Boscat c'ut.

² Ri e u banoj ri Josiy e suc' xeril ri Ajawaxel, are c'u xutakej u banic ronojel ri xuban ri David, ri u mam, man c'o ta xujech'ba ta wi rib.

Cäriktaj ri u wujil ri pixab

³ Pa ri wajxaklajuj (18) junab ri rajawinic ri Josiy, ri ajawinel xutak bic chupam ri rachoch ri Ajawaxel ri Sapan ri catz'iban ri cac'ulmatajic, u c'ojol ri Azaliy ri' u mam c'ut ri Mesulam. Xubij che:

⁴ “Jät che rilic ri Hilsiy, ri qui nimal ri e cojol tabal tok'ob, chabij c'u che chi chumulij ri puak ri c'amom bic chupam ri rachoch ri Ajawaxel ri qui mulin ri e chajil tak ri oquibal ri queyok chque cumal ri winak,

⁵ quijacha' c'u chque ri quetakan paquiwi' ri ajchaquib ri quebanow tak ri chac chupam ri rachoch ri Ajawaxel, rech ri e are' quequitoj tak ri ajchaquib ri quebanow u banic ri rachoch Dios,

⁶ ri u bixic: ri ajanelab, ri quetakan paquiwi' tak ri chac, ri yacal tak ja, rech xukuje' quequilok' tak ri che' ri tzoc'om tak abaj ri quebajwataj che u banic ri rachoch Dios.

⁷ Chabij che xukuje' chi muta' chque joropa' ri caquisach che ri puak, caquitz'akatisaj c'u ya' u cojic.”

⁸ Ri Hilsiy, ri qui nimal cojol tabal tok'ob xutzijoj che ri Sapan, ri catz'iban ri cac'ulmatajic chi u rikom ri wuj re ri pixab chupam ri rachoch ri Ajawaxel; xujach c'u ri wuj pa u k'ab, ri Sapan xusiq'uij u wäch.

⁹ Xbe c'u na ri Sapan che u bixic che ri ajawinel, xubij c'u che: “Ri e pataninel tak ech la xquimulij ri puak ri c'o pa ri rachoch Dios, xquijach c'u pa qui k'ab ri quetakan paquiwi' ri quebanow u banic ri rachoch ri Ajawaxel.”

¹⁰ Xukuje' xuya' u bixic ri Sapan che ri ajawinel chi ri cojol tabal tok'ob ri Hilsiy xujach jun wuj pa u k'ab, xusiq'uij c'ut ri cubij ri wuj chuwäch ri ajawinel.

¹¹ Aretak xuta' ri ajawinel ri cubij ri wuj re ri pixab, xujis ri ratz'iak chrij,

¹² xuya' c'u takanic che ri Hilsiy, ri Ahicam, u c'ojol ri Sapan, ri Acbor, u c'ojol ri Micaiy, ri Sapan ri catz'iban ri cac'ulmatajic, xukuje' ri Asaiy rach k'atal tzij ri ajawinel:

¹³ “Jix jitz'onoj che ri Ajawaxel che nu q'uexwäch xukuje' che u q'uexwäch ri tinimit xukuje' che u q'uexwäch ronojel ri Juda, ri cakaban che ri cubij we wuj ri' ri rikom; sibalaj ba' yactajinak royowal ri' ri Ajawaxel chkij uj, rumal rech chi ri e ka mam man xquiya' ta qui xiquin che ri cubij we wuj ri' mawi xquiban ta ronojel ri tz'ibatal chupam.”

¹⁴ Ri Hilsiy, ri Ahicam, ri Acbor, ri Sapan xukuje' ri Asaiy, xebe che rilic ri Huld k'axal tzij, rixokil ri Salum, u c'ojol ri Ticba ri' u mam c'ut ri Haras, ri chajil ri c'olbal atz'iak ri c'o chupam ri rachoch Dios, ri Huld jekel chupam ri u cätas ri Jerusalen, are tak c'u xquich'abej,

¹⁵ ri ixok xutzelej u bixic chque: “Are wa' ri cutzelej u bixic ri Ajawaxel, ri u Dios ri Israel: ‘Chibij che ri winak ri ix takowinak ulok che u tz'onoxic chwe,

¹⁶ chi ri in, ri Ajawaxel, quinbij: Quinwerej na ulok jun u q'ueyowal puwi' we c'olbal ri' xukuje' paquiwi' ri winak ri e c'o chupam, je jas ri cubij ri wuj ri xusiq'uij u wäch ri ajawinel re Juda.

¹⁷ Kas in quixutum canok qui porom c'u c'oc' k'ol chquiwäch jule' tak diosib, xa' c'u woyowal caquiyac rumal ronojel ri cäquibano; rumal ri' nicowinak ri woyowal chrij we c'olbal ri', man c'u cächup ta na.

¹⁸ Chibij ba' che ri ajawinel re Juda, ri xixutak ulok che u tz'onoxic che ri Ajawaxel, are' c'u ri Ajawaxel, ri u Dios ri Israel, cubij xukuje': Rumal c'u rech chi a yo'm a xiquin che ri a tom,

¹⁹ rumal c'u rech chi slabetajinak ri awanima' xatkeb c'u wuc' aretak xatatabej ri k'alajisanic ri nu yo'm chrij we c'olbal ri' xukuje' ri winak ri e c'o chupam, chi quejocoq'uex na bic e c'okotajinak c'ut, rumal rech chi xajis ri awatz'iak chawij xukuje' chi xatok' chnuwäch, ri in xatintatabej. In, ri Ajawaxel, quinbij chawe.

²⁰ Rumal c'u ri', quinya' na chawe chi catcäm pa jamaril, carika' c'u na awib cuc' ri e a mam, man cawil ta c'u na ri u q'ueyowal ri quinwerej na ulok puwi' we c'olbal ri'.’ ” Ri e u tako'n ri ajawinel xetzelejic rech caquic'am bic che ri xtzelex u bixic.