Ucab Ajawinelab 19 - Quiché Bible

Ri Juda cäto'taj pa u k'ab ri Senaquerib

¹ Aretak ri ajawinel Ezequiy xuta' ri xbixic, xujis ri ratz'iak chrij, xebucoj wakwoj tak atz'iak chrij che u c'utic chi c'axc'obinak ri ranima' xbe c'ut pa ri rachoch ri Ajawaxel,

² xutak c'u bic ri Eliaquim, qui nimal ri chajil re ri rachoch, ri Sebna ri cätz'iban ri tzijol xukuje' ri e cojol tabal tok'ob ri sibalaj e nimak tak winak chic, e qui cojom wakwoj tak catz'iak che u c'utic chi c'axc'obinak ri canima', che rilic ri Isaiy ri k'axal tzij, u c'ojol ri Amoz,

³ che c'u u bixic che ri bim ulok rumal ri ajawinel: “Camic uj c'o chupam jun nimalaj c'ax, c'äjisabal wächaj xukuje' mach'irisan ib, jacha' jun ixok ri, xopan u k'ij che alc'ualanic, ri catuktubic.

⁴ C'o ta banom wi chi ri Ajawaxel ri a Dios u tom ta we tzij ri' ri xebubij ri qui nimal ajch'ojab ri takom ulok rumal ri rajaw, ri ajawinel re Asiriy, che u yok'ic ri c'aslic Dios, c'o ta banom wi chc'äjisax ta u wäch rumal ri jastak ri xebuta' ri Ajawaxel ri a Dios. Chabana' ba' jun ch'awem ruc' paquiwi' ri c'ä e to'tajinak canok.”

⁵ Ri e rach k'atal tak tzij ri ajawinel Ezequiy xebe che rilic ri Isaiy,

⁶ ri Isaiy xubij chque chi chiquibij che ri cajaw: “Ri Ajawaxel cubij: ‘Man caxe'j ta awib chque tak we yok'obal ri' ri xquibij ri e u tako'n ri ajawinel re Asiriy che nu yok'ic.

⁷ In quenbana' chi copan jun xibin ib ri cäbanow che chi cätzelej pa ri rulew, quinban c'u na che chi xa' cacämisax chila'.’ ”

⁸ Ri qui nimal ri ajch'ojab aj asiriyab xretamaj chi ri ajawinel re Asiriy u yo'm can ri tinimit Lacs. Xuya' c'u can ri Jerusalen, xurika' c'u ri ajawinel re Asiriy cätajin cach'ojin ruc' ri Libna.

⁹ Chila' xuta' wi u bixic ri ajawinel re Asiriy chi ri ajawinel Tirac re Etiopiy u chaplem u banic ch'o'j ruc'. Jumul chi c'ut ri ajawinel re Asiriy xebutak ulok tako'n ruc' ri ajawinel Ezequiy re Juda,

¹⁰ che u bixic che: “Ri a Dios, ri a jiquibam wi a c'u'x, u jiquibam u bixic chawe chi ri Jerusalen man cakaj ta na pa nu k'ab; maya' c'u awib pa subic che.

¹¹ At a tom u tzijol ri qui banom tak ri ajawinelab re Asiriy cuc' conojel tak ri ulew ri xequisachisaj c'u qui wäch. ¿La catto'taj ta c'u na can at?

¹² Ri diosib, ¿La xa' pu xequito' ri jule' tak tinimit chic ri xsachisax qui wäch cumal ri xetakan can nabe chnuwäch: ri Gozan, ri Aran, ri Resep, xukuje' ri winak re Bel-eden ri xejeki' pa Telasar?

¹³ ¿Jawije' tak e c'o wi ri ajawinelab re Hamat, Arpad, re Separbaim, re Ena xukuje' re Ib?”

¹⁴ Ri Ezequiy xuc'am ri wuj ri xjach pa u k'ab cumal ri tako'n, xusiq'uij c'ut u wäch. Xbextax c'u chupam ri rachoch Dios, xulic'a c'ut ri wuj chuwäch ri Ajawaxel,

¹⁵ je ch'awem wa' xuban ruc' ri Dios: “Ajawaxel, u Dios ri Israel, ri c'o ri u tem re ajawibal paquiwi' ri aj cajalaj tak to'banelab ri e c'o qui xic': xuwi ri lal lal Dios ri lal c'o paquiwi' conojel ri ajawibal ri e c'o cho ri uwächulew; lal xbanow la ri caj xukuje' ri ulew.

¹⁶ Kas choc la il, Ajawaxel, chatatabej c'u la. Chejaka' la ri bak'wäch la, Ajawaxel, chca'y c'u la. Chetatabej la ri tzij ri xebutak ulok qui bixic ri Senaquerib chwe, tzij tak ri conojel queyok'on che la, ri lal c'aslic Dios.

¹⁷ Kastzij, Ajawaxel, chi ri ajawinelab tak re Asiriy quisachisam qui wäch ri nimak tak tinimit xukuje' tak ri e culew,

¹⁸ e qui q'uiakom tak c'ut ri e qui diosib chupam ri k'ak', kas c'u tzij chi man e diosib taj, xa' e jastak e re che' o re abaj ri xa' e banom cumal achijab. Rumal ri' xequisachisaj qui wäch.

¹⁹ Are c'u ri camic, Ajawaxel xukuje' ka Dios, maya' ba' la c'olbal chi cujkaj pa u k'ab, rech conojel ri winak re ri uwächulew chquetamaj chi ri lal, Ajawaxel, chi xuwi ri lal lal Dios.”

²⁰ Are' c'u ri Isaiy xutak u bixic che ri Ezequiy: “Are wa' ri cubij ri Ajawaxel, Dios re Israel: ‘In xintatabej ri bochi'nic ri xaban chwe che ri cubij ri Senaquerib, ajawinel re Asiriy.’ ”

²¹ E are tak tzij wa' ri e u bim ri Ajawaxel ri cuc'ulmaj na ri ajawinel re Asiriy: “Ri tinimit Sion, jacha' jun ali, cutze'j a wäch, Senaquerib. Ri Jerusalen cusutusa' ri u jolom che retz'bexic a wäch aretak cattzelej chawij.

²² ¿Jachin ri a c'axc'obisam xukuje' a yok'om? ¿Jachin chrij xajak wi ri ach'abebal xukuje' xebasolcopij tak ri a bak'wäch che ruc' nimal? ¡Chrij ri tastalicalaj u Dios ri Israel!

²³ Cumal tak ri e a tako'n xayok' ri Ajawaxel Dios. Xabij: ‘Cuc' ri q'uialaj nu carwaj quech ch'o'j xinpaki' paquiwi' tak ri juyub, c'ä puwi' ri Libano ri sibalaj naj elinak chicaj. Xebenkasaj tak ri e u chacalte' ri sibalaj naj e elinak na chicaj, ri e u chäj ri sibalaj e je'l tak na. Xinopan paquiwi' ri e u juyub ri sibalaj naj e elinak chicaj, pa tak ri e u c'ächelaj, ri e je ta ne qui banic ticbal cotz'i'j.

²⁴ Pa tak ulew ri man weta'm ta qui wäch xebenc'ot tak c'ua' xebenwuq'uiaj c'u tak we ja' ri', cumal c'u tak ri wakan xebenchaki'jarisaj conojel tak ri nima' ri e c'o pa Ejipt.’

²⁵ ¿La ma ta pa u aweta'm chi in ri' ri Ajawaxel, ri e u chomam qui banic tak we jastak ri'? Kas ojer ulok nu chomam qui banic ulok, camic c'ut nu banom ri nu chomam ulok; rumal ri' ri at casachisaj qui wäch tak ri tinimit ri e kasan pa nimak tak tapia xaban c'u chque chi xebux jumulaj tak abaj.

²⁶ Ri e qui winakil, man c'o ta qui cuinem, e nojinak che xe'n ib xukuje' q'uixbal, e uxinak jacha' k'ayes rech ri juyub, e jacha' räx echa', e jacha' ri k'ayes ri queq'uiy paquiwi' tak ri ja ri quec'atisax rumal ri quiakik' ri cäpe pa ri elebal k'ij.

²⁷ In e weta'm conojel tak ri e a banoj xukuje' conojel tak ri e a chac; in weta'm chi at oyowarinak chwij.

²⁸ In weta'm ri a ch'ujilal xukuje' ri a c'anal, quencojo' jun quetequic ch'ich' che ri a tza'm, jun jiq'uibal rij wi'aj pa a chi', quinban c'u chawe chi cattzelej chi pa ri be ri xatpe wi.”

²⁹ Xubij c'ut ri Isaiy che ri Ezequiy: “Are' jun etal wa' che ri quec'ulmataj na: che we junab ri' xukuje' ri cäpe na ri ix quiwe'j na ri trico ri xak caq'uiy ulok pa rech wi, pa ri urox junab cuya' quixticonijic xukuje' quixk'atowic, quebitic tak uva quebitij tak c'ut ri qui wächinic.

³⁰ Ri quec'asi' can pa Juda quebux na e jacha' ri tico'n: cäbe na ri qui c'amal chupam ri ulew quewächin c'u na.

³¹ Quecanaj c'u na can quieb oxib pa Jerusalen; chupam ri juyub re Sion c'o ri quec'asi' na canok. Wa' are c'u cäbanow na ri nicowemalaj u lok'ok'ebal c'u'x ri Ajawaxel ri c'o ronojel u cuinem.

³² Ri cutaklebej na ri ajawinel re Asiriy cächa' ri Ajawaxel: ‘Man coc ta na pa Jerusalen, man c'o ta jun ch'ab cutzokopij ta na che, man cucoj ta na tak quetecak ch'ich' che u banic ch'o'j ruc' mawi cuyac na jun ak'anibal chrij.

³³ Kas pa ri be ri xpe wi, catzelej chi wi na; man coc ta na chupam we tinimit ri'. In, ri Ajawaxel, quinya' ri nu tzij.

³⁴ In quinto' na u wi' we tinimit ri' quinto'tajisaj c'u na, xa' che u tok'obisaxic u wäch ri pataninel wech ri David xukuje' c'u ri in chbil wib.’ ”

³⁵ Kas pa ri chak'ab ri' ri tako'n aj caj rech ri Ajawaxel xopanic xebucämisaj jun sient jumuch' ruc' job mil (185,000) achijab aj asiriyab ri e c'o pa ri kajebal, chucab c'u k'ij aretak xsakarisanic conojel e cäminak chic.

³⁶ Are' c'u ri Senaquerib ajawinel re Asiriy, xebuc'am bic ri jastak rech xtzelej c'u pa Ninibe.

³⁷ C'o c'u jun k'ij, aretak cätajin cäk'ijilan chupam ri rachoch ri Nisroc, ri u dios, ri Adramelec xukuje' ri Sarezer ri e u c'ojol xebopan ruc' xquicämisaj c'ut, xebanimaj c'u bic xebe pa ri ulew ri Ararat. Ri xajawin c'u na chupam ri u c'olbal are' ri u c'ojol, ri Esaradon u bi'.