Ucab Ajawinelab 18 - Quiché Bible

Ri rajawinic ri Ezequiy pa Juda

¹ Pa ri urox junab re ri rajawinic ri Osey, u c'ojol ri Ela, ajawinel re Israel, ri Ezequiy, u c'ojol ri Acaz, ajawinel re Juda, xuchaplej ajawinic.

² Juwinak job (25) junab c'ut ri u junab, juwinak belejeb (29) junab c'ut xajawin pa Jerusalen. Abi u bi' ri u nan, u mia'l ri Zacariy.

³ Ri e u banoj tak ri Ezequiy e suc' chuwäch ri Ajawaxel, e jacha' ronojel ri xebuban ri David ri u mam.

⁴ Are' ri xebensan tak ri k'ijilabal ri quek'ijilax wi diosib, xebuc'äjij ri tastalic tak abaj, xebupaxij tak ri e u wächbal tak ri Asera xukuje' xumuch ri cumätz re k'an ch'ich' ri xuban ri Moises ri c'ä quitakem u poroxic c'oc' k'ol chuwäch Nehustan quecha' c'u che.

⁵ Ri Ezequiy xujiquiba' u c'u'x chrij ri Ajawaxel, ri u Dios ri Israel. Chquixo'l conojel tak ri ajawinelab re Juda ri xebajawin can nabe o ri c'äte' xebajawin, man c'o ta jun jacha' ri are'.

⁶ Jic xbin chuwäch ri Ajawaxel mawi jumul xutas ta rib chrij, xane' xebutz'akatisaj tak ri takomal ri xebuya' qui bixic ri Ajawaxel che ri Moises.

⁷ Rumal ri' xtok'obisax u wäch rumal ri Ajawaxel cuban c'u che chi ronojel ri chuchaplej u banic utz quel chuwäch. Ri Ezequiy xuwalijisaj rib chrij ri ajawinel re Asiriy man xraj ta chic xupatanij.

⁸ Xch'äcan c'u paquiwi' ri aj pilisteyib c'ä pa Gaz xukuje' tak ri u c'ulbatil, kas cuc' tak ri tac'atak tak ja quech chajibal c'ä cuc' tak ri tinimit ri e c'o pa nimak tak tapia.

Ri u tzakic ri Samar

⁹ Pa ri ucaj junab ri rajawinic ri Ezequiy, are c'u ri uwuk junab re ri rajawinic ri Osey. U c'ojol ri Ela, ajawinel re Israel, ri Salmanasar, ajawinel re Asiriy, xusutij rij ri tinimit Samar, xch'ojin c'u ruc',

¹⁰ c'ä choxib junab c'ut xcuin che u ch'äquic. Are' ri uwak junab re ri rajawinic ri Ezequiy belejeb c'ut re ri rajawinic ri Osey pa Israel aretak xch'äc ri Samar.

¹¹ Ri ajawinel re Asiriy xeresaj bic ri aj israelib xebutak pa Asiriy xebujekeba' c'u pa Halah, pa ri ulew re Habor, nima' re Gozan, xukuje' chquipam tak ri tinimit aj medib.

¹² Xc'ulmataj c'u wa' rumal rech chi man xeniman ta che ri Ajawaxel ri qui Dios, man nim ta xquil wi ri u c'ulwächinic xukuje' man xquiya' ta qui xiquin che ronojel ri xetak che qui banic rumal ri Moises, ri pataninel rech ri Ajawaxel, man xquinimaj ta c'ut u banic.

Ri Senaquerib xumajij ri Juda

¹³ Pa ri ucajlajuj (14) junab re ri rajawinic ri Ezequiy, ri Senaquerib, ajawinel re Asiriy xch'ojin cuc' conojel tak ri tinimit aj Juda ri e kasan pa nimak tak tapia, xek'ax c'u pa u k'ab.

¹⁴ Ri Ezequiy ajawinel re Juda, xutak bic jun wuj ruc' ri ajawinel re Asiriy, ri c'o pa Lacs, ri je cubij wa': “Xa man xinch'ob ta ri xinbano. Chel la bic pa ri wulew quintoj c'u na ri puak ri catok'ij la chwe.” Rumal ri' ri ajawinel re Asiriy xubij che ri Ezequiy, ajawinel re Juda, chi chutojo' quieb sient ruc' wajxaklajuj (218) quintal sak puak xukuje' juwinak quieb (22) quintal k'an puak.

¹⁵ Ri Ezequiy xujach ronojel ri sak puak ri xurik chupam ri rachoch ri Ajawaxel xukuje' ri e c'o chupam ri u k'inomal ri rachoch are'.

¹⁶ Pa ri k'ijol ri', ri Ezequiy xeresaj tak ri e u chi ri rachoch ri Ajawaxel xukuje' tak ri rapalil, ri kas are' xch'ukuw che k'an puak, xebuya' c'u che ri ajawinel re Asiriy.

¹⁷ Ri ajawinel re Asiriy c'äte' chi c'u xutak chi ulok ruc' ri ajawinel Ezequiy jun qui nimal ajch'ojab ri nim rekle'n, jun rach k'atal tzij ri u cuban u c'u'x chrij xukuje' jun qui nimal ajch'ojab ri nim rekle'n, ri xc'amow qui be juk'at cowilaj tak ajch'ojab, xebel c'u ulok wa' pa Lacs xebe pa Jerusalen, che u banic ch'o'j ruc'. Aretak xebopan pa Jerusalen, xquiya' quib chuxcut ri cäbin wi ri ja' ri cäbe chupam ri c'olbal ja' ri c'o ajsic, chupam ri be ri cabe pa ri rulew ri Ch'ajal Atz'iak.

¹⁸ Xquisiq'uij c'ut ri ajawinel, xukuje' ri Eliaquim, u c'ojol ri Hilsiy, ri are' quinimal ri chajil re ri rachoch ri ajawinel, ri Sebna, ri tz'ibal tzijol, xukuje' ri Joa, u c'ojol ri Asap, ri rajtz'ib ri ajawinel, xebel bic che qui c'ulaxic.

¹⁹ Chila' ri qui nimal ri ajch'ojab aj asiriyab xubij chque chila': “Chiya' u bixic che ri Ezequiy ri cubij ri ajawinel ri nim u banic, ri ajawinel re Asiriy: ‘¿Jas ri banowinak chawe chi cana' awib chi sibalaj co at c'olic?

²⁰ ¿La xa' pu cachomaj chi ri je'lalaj tak tzij xak junam qui k'ij cuc' ri nawinic xukuje' ri chuk'ab che u banic ch'o'j? ¿Jachin chrij a jiquibam wi a c'u'x chi xawalijisaj awib chwij?

²¹ Quinwilo chi a jiquibam a c'u'x chrij ri to'banic ri cuya' ri Ejipt chawe. Utz ri', ri Ejipt xa' jun aj ri wak'arinak, we c'u ne cutok'ej rib jun puwi', cäjutjub che cut'is rib chupam ri u k'ab. Are je u banic wa' ri paraon, ajawinel re Ejipt, chque conojel ri caquijiquiba' qui c'u'x chrij.

²² We c'u ri ix quibij chwe: ri uj ka jiquibam ka c'u'x chrij ri Ajawaxel ri ka Dios, ri Ezequiy ¿La ma ta pa u xebuchupisaj qui wäch ri c'olbal quech tak k'ijilanic xukuje' tak ri porobal che we Dios ri', xuya' c'u takanic chi conojel ri winak ri e c'o pa Juda xukuje' ri e c'o pa Jerusalen chquiya' k'ijilanic che xuwi puwi' ri porobal ri c'o pa Jerusalen?

²³ Chac'ulaj u wäch ri tzij ri cubij ri wajaw chawe, ri ajawinel re Asiriy: in quebenya' quieb mil quiej chawe, we quebarik aj quiejab chque.

²⁴ Ri at man at ta ticarel che u banic chi jun chque ri e qui nimal ri wajch'ojab ri sibalaj man nim ta u k'ij chquixo'l ri aj asiriyab rech canimajic, ¿La are ta c'u pa a c'u'x chi catcuinic quebarik quiej xukuje' ajquiejab pa Ejipt?

²⁵ Xak c'u u wi' chic, ¿La are pa a c'u'x chi in petinak che u banic ch'o'j xukuje' che u sachisaxic u wäch we ulew ri' ri ma ta c'u are' ri Ajawaxel in takowinak ulok? ¡Are' xintakow che u banic ch'o'j ruc' ri Ezequiy xukuje' che u sachisaxic u wäch!’ ”

²⁶ Ri Eliaquim, ri Sebna xukuje' ri Joa xquitzelej u bixic che ri qui nimal ajch'ojab aj Asiriy: “Bana' la tok'ob chujch'abej la pa aramey, ri uj cäkach'obo. Man cujch'abej ta la pa hebrey, caquita' c'u conojel ri winak ri e c'o puwi' ri nimalaj tapia cätajin caquitatabej.”

²⁷ Are c'ut ri qui nimal ri aj Asiriy xubij: “Man che ta ri awajaw, mawi chiwe ta ix ri xinutak wi ulok ri ajawinel re Asiriy ri quebenbij ta wi tak we tzij ri'; xane' kas chque tak ri winak ri e c'o puwi' ri nimalaj tapia, ri e are', xukuje' ri ix, quitij na ri kas nim i chul xukuje' quikumuj na ri kas alaj i chul.”

²⁸ Are c'u ri qui nimal ajch'ojab, tac'alic sibalaj co xurak u chi' xch'aw pa hebrey: “Chitatabej ri cubij ri ajawinel ri nim u k'ij, ri ajawinel re Asiriy:

²⁹ ‘Miya' iwib pa subic rumal ri Ezequiy; ri are' man cäcuin taj quixuto' pa nu k'ab.’

³⁰ We ri Ezequiy cucoj u chuk'ab chiwe chi chijiquiba' i c'u'x chrij ri Ajawaxel, cubij c'u chiwe: ‘Ri Ajawaxel kas quixuto' na; ri are' man cuya' ta na c'olbal chi cakaj ta we tinimit ri' pa u k'ab ri ajawinel re Asiriy’,

³¹ miya' i xiquin che ri cubij chiwe. Ri ajawinel re Asiriy xinutak ulok che u bixic chiwe chi mixch'ojin ruc', chi'x k'ax pa u k'ab, we je quiban wa' chijujunal quixcuinic quitij na ri u wächinic ri i uva ri u wächinic ri i higo xukuje' quikumuj na ri kas i ja' ri i c'olom.

³² C'äte c'u quixinc'am na bic pa jun ulew ri cajunamataj ruc' ri iwech ix, jun ulew ri cäwächin wi trico xukuje' tak uva, che u banic caxlanwa xukuje' u wa'l uva, jun ulew ri caq'uiy wi ri aseitun ri cuya' aseit ri xukuje' c'o wi u juyubal räx cab. Quiwoc'owisaj c'u na jun utzalaj c'aslemal man c'u quixcäm ta na. Miya' c'u i xiquin che ri cubij ri Ezequiy chiwe, xa' c'u subunic ri cubano aretak cubij chiwe chi are' ri Ajawaxel cäyo'w na ri ch'äcanic chiwe.

³³ ¿La c'o pa u jun chque ri qui diosib ri jule' tak tinimit chic ri xcuin ta che u to'ic ri rulew pa u k'ab ri ajawinel re Asiriy?

³⁴ ¿Jawije' tak e c'o wi ri e u diosib ri Hamat xukuje' ri Arpad? ¿Jawije' tak e c'o wi ri e u diosib ri Separbaim, ri Ena xukuje' ri Ib? ¿La xa' pa u xecuinic xquito' ri Samar pa u k'ab ri ajawinel re Asiriy?

³⁵ ¿Jachin chque jun chque conojel ri qui diosib tak we ulew ri' ri xcuintaj xuto'tajisaj taj ri u winak ri ma ta xkaj pa u k'ab ri ajawinel re Asiriy? ¿Jas c'u che qui chomaj chi ri Ajawaxel cacuinic cuto'tajisaj ri Jerusalen?”

³⁶ Ri winak man xech'awtaj man c'o ta c'u jun tzij ri xquitzelej ta u bixic che, u bim c'ut ri ajawinel chque chi c'o jas maquitzelej u bixic che.

³⁷ Are c'u ri Eliaquim, qui nimal ri chajil re ri rachoch ri ajawinel, ri Sebna, ri cätz'iban ri tzijol, xukuje' ri Joa, rajtz'ib ri ajawinel, xeboc il xquijis ri catz'iak chquij xebe c'u che rilic ri Ezequiy rech quequibij che ri xubij ri qui nimal ri ajch'ojab aj Asiriy.