Ucab Ajawinelab 17 - Quiché Bible

Ri u ch'äctajic ri Samar xukuje' ri resaxic bic ri Israel

¹ Pa ri cablajuj (12) junab ri rajawinic ri Acaz, ajawinel re Juda, ri Osey, u c'ojol ri Ela, xuchaplej ajawinic puwi' ri Israel, belejeb junab c'ut xajawin pa Samar.

² Ri e u banoj e itzel xeril ri Ajawaxel, pune' man kas je jas ri xquiban tak ri ajawinelab ri xec'oji' can nabe chuwäch pa Israel.

³ Ri Salmanasar, ajawinel re Asiriy, xch'ojin ruc' ri Osey, xux c'u pataninel rech wa' xtojon c'u pa u k'ab.

⁴ Xretamaj c'ut ri Salmanasar chi ri Osey are' cäraj cuwalijisaj rib chrij, xukuje' chi e u takom bic tako'n ruc' ri So, ajawinel re Ejipt, man cäraj ta chi c'ut cutoj ri cuchuj re chujunab pa u k'ab. Xuya' c'u takanic ri Salmanasar che u chapic ri Osey chcoj c'u pa che';

⁵ xebumajixtaj c'u conojel ri tinimit xch'ojin ruc' ri Samar, oxib junab c'ut xbeytaj ri ch'o'j ruc'.

⁶ Chuq'uisbal, pa ri ubelej junab ri rajawinic ri Osey, ri ajawinel re Asiriy xuban rech che ri Samar, aretak c'ut ri e aj israelib xebuc'am bic pa Asiriy xebujekeba' c'ut pa Halah pa ri rulew ri Habor, nima' re Gozan, xukuje' pa ri qui tinimit tak ri aj Medib.

⁷ Xbantaj we c'ulmatajic rumal rech chi ri aj israelib e macuninak chuwäch ri Ajawaxel ri qui Dios, ri xebesan ulok pa Ejipt xeresaj c'u chuxe' ri u takanic ri paraon, ajawinel re Ejipt, xequik'ijilaj c'u tak diosib

⁸ xquitakej c'u qui banic quech ri e qui banoj ri nimak tak tinimit ri xerokix bic chquiwäch rumal ri Ajawaxel, xukuje' ri etzelal ri xequijekeba' tak ri ajawinelab re Israel.

⁹ Che c'u u tz'akat, ri aj israelib xequibij itzel tak tzij che u yok'ic ri Ajawaxel ri qui Dios, xequiwoc tak k'ijilabal ri quek'ijilax wi diosib pa tak ri qui tinimit, junam xukuje' xequiban pa tak ri tac'atak tak ja' quech chajibal xukuje' chquipam tak ri qui tinimit ri e kasan pa nimak tak tapia.

¹⁰ Xukuje' xequitac'aba' tastalic tak abaj xukuje' ri e qui wächbal tak ri Asera paquiwi' tak ri juyub xukuje' tak ri che' ri e k'eku'm qui xak,

¹¹ je xquibano jastak ri qui nak'atisabal tak ri winak ri xeresaj bic ri Ajawaxel chquiwäch, xequiporoj c'oc' tak k'ol xequiban itzel tak jastak, je xquiban wa' che u yaquic royowal ri Ajawaxel.

¹² Xequik'ijilaj tak diosib, ri bim chque rumal ri Ajawaxel chi man cuya' taj cäquibano.

¹³ Ri Ajawaxel u yo'm chic u bixic chque ri aj israelib cumal conojel ri e k'axal tak tzij xukuje' cumal ri queca'y pa che' pa abaj chi chequiq'uexa' tak ri itzel tak qui be che qui tz'akatisaj c'ut qui banic tak ri e u takomal xukuje' conojel tak ri pixab re ri tijonic ri e u yo'm chque ri e qui mam cumal ri e pataninel tak rech ri e k'axal u tzij.

¹⁴ Man c'u xquinimaj taj ri xbix chque, xane' sibalaj e taquib e jacha' ri e qui mam, ri man xquicu'ba' ta qui c'u'x chrij ri Ajawaxel ri qui Dios;

¹⁵ man nim ta xequil tak wi ri e u pixab, xukuje' ri c'ulwächinic ri xuban cuc' ri e qui mam, xukuje' tak ri takanic ri e u yo'm tak chque. Xeteri c'u chquij tak diosib ri man c'o ta jubik' qui cuinem, ri cumal c'u wa' xequitzak ri qui cuinem, are c'u xquiban quech jas ri xquiban tak ri winak ri e c'o che qui c'ulja, ri u bim ri Ajawaxel chque chi man cäquiban taj.

¹⁶ Xequitzak can conojel tak ri e u takomal ri Ajawaxel ri qui Dios, xequiban quieb alaj ama'ib tak wacax re k'an ch'ich' ruc' k'ak' xukuje' jun u wächbal ri Asera, che c'u u tz'akat xequik'ijilaj conojel ri ch'imil ri e c'o cho ri caj xukuje' ri Baal.

¹⁷ Xquibano chi xeporox tak ri e qui c'ojol xukuje' tak ri e qui mia'l pa ri k'ak' che tabal tak tok'ob, xequiban tak ch'obonic xukuje' k'ijinic, xquijach quib che u banic ri etzelal chuwäch ri Ajawaxel, je c'u xquiban wa' che u yaquic ri royowal.

¹⁸ Rumal c'u ri' xpe ri royowal ri Ajawaxel puwi' ri Israel xresaj c'u bic chuwäch, man c'o ta c'u xebuya' can chque xak xuwi ri ramak' ri Juda.

¹⁹ Ri Juda xukuje' mawi xebutz'akatisaj qui banic ri e u takomal ri Ajawaxel ri u Dios, xane' are xequitakej qui banic ri nak'atisabal ri e qui jekebam ri aj Israel.

²⁰ Are' c'u ri Ajawaxel xebuxutuj conojel ri quija'lil ri aj israelib xebumach'irisaj ruc' ri qui jachic pa qui k'ab ri quetokin ri jastak quech c'ä xeresaj na bic chuwäch.

²¹ Xutas ri rija'lil ri David che ri Israel, e are c'ut ri aj Israel xquiban cajawinel che ri Jeroboam, ri u c'ojol ri Nabat, ri xbanowic chi ri aj israelib xquitas quib chrij ri Ajawaxel sibalaj c'u xemacunic.

²² Jeri' ri e aj Israel xequitakej qui banic tak ri junam tak macaj ri xebuban ri Jeroboam, man c'u xequitanaba' ta qui banic.

²³ Chuq'uisbalil c'ut ri Ajawaxel xresaj na ri Israel chuwäch, jacha' ri u yo'm u bixic cumal conojel tak ri e k'axal u tzij, ri e pataninel tak rech, je c'u ri' ri e aj Israel e yutuyuj xec'am bic pa Asiriy, ri c'ä e c'o chila' camic.

Xek'ax jule' tak winak chic pa Samar

²⁴ Ri ajawinel re Asiriy xebuc'am bic winak aj Babilon, aj Cut, aj Aba, aj Hamat, xukuje' ri aj Separbaim, xebujekeba' c'ut chquipam tak ri tinimit re Samar, che qui q'uexwäch ri aj israelib. Je xquiban wa' xeboc che echbenic pa Samar xejeki' c'u chquipam tak ri qui tinimit.

²⁵ Rumal c'u rech chi we winak ri' man quek'ijilan ta che ri Ajawaxel, aretak xquichaplej u jekebaxic quib ri Ajawaxel xebutak ulok coj, ri xequicämisaj jujun chque.

²⁶ Xebe c'u che u bixic che ri ajawinel re Asiriy: “Ri winak ri xebac'am bic pa ri tinimit Samar rech quejeki' chila', man queta'm taj ri tastalic cojonic che ri u dios we ulew ri', rumal c'u rech chi man queta'm taj, ri are' xebutak ulok coj, ri cätajin quecämisanic.”

²⁷ Xuya' c'u takanic ri ajawinel re Asiriy: “Chitaka' bic jun chque ri e cojol tabal tok'ob ri xic'am ulok che patanijic, rech quejekel chila' chebutijoj c'u che ri cojonic che ri u dios ri ulew.”

²⁸ Jun c'ut chque ri e cojol tabal tok'ob ri esam ulok pa Samar xbec xejekel pa Betel, xebutijoj c'u che u ya'ic k'ijilanic che ri Ajawaxel.

²⁹ Chquijujunal c'ut ri nimak tak tinimit xuban ri u dios pa ri tinimit ri e jekel wi, xquiya' c'u pa ri k'ijilabal ri naj e belinak chicaj ri e qui yacom tak ri aj samarib.

³⁰ Ri e aj Babilon xquiban jun u wächbal ri Sucot-benot; ri e aj Cut xquiban jun re Nergal; ri e aj Hamat xquiban jun Asim.

³¹ Ri e aj Aba xquiban jun Nibaz xukuje' jun Tartac; ri e aj Separbaim quequiporoj tak ri e qui c'ojol pa ri k'ak' jacha' tabal tok'ob che ri Adramelec, xukuje' che ri Anamelec, e are' tak qui diosib wa'.

³² Caquiya' c'u k'ijilanic xukuje' che ri Ajawaxel, xequicoj c'u tak qui winakil che cojol tabal tok'ob chquixo'l rech quepatanij chquipam tak ri k'ijilabal ri quek'ijilax wi ri diosib.

³³ Je c'u ri' pune' quequiya' k'ijilanic che ri Ajawaxel, xukuje' qui takem qui k'ijilaxic tak ri e qui diosib, je jas ri qui nak'atisabal tak ri winak ri xebesax wi ulok.

³⁴ C'ä je c'u cäquiban camic jas ri xquiban nabe, man caquiya' ta c'u k'ijilanic che ri Ajawaxel mawi xequinimaj tak ri e u pixab mawi tak ri e u takanic, mawi xequinimaj tak ri tijonic xukuje' tak ri takomal ri xubij ri Ajawaxel chi quequitz'akatisaj ri e rija'lil ri Jacob, ri xucoj Israel che u bi'.

³⁵ Aretak ri Ajawaxel xuban jun c'ulwächinic cuc', xuya' takanic chque: “Mebiya' k'ijilanic chque tak diosib, mawi mimej iwib chquiwäch che qui patanixic.

³⁶ Chiya' k'ijilanic chwe in, chwe in ri Ajawaxel ri i Dios, ri xixesan ulok pa Ejipt ruc' ri u cojic ri nimalaj u cuinem. Xuwi chwe in rajawaxic quiya' wi k'ijilanic, xukuje' chimeja' wi iwib xukuje' chebichi'j wi tabal tak tok'ob.

³⁷ Kas c'u utz qui tz'akatisaxic tak ri pixab ri takanic ri tijonic xukuje' tak ri takomal ri e tz'ibatalic ri e nu yo'm chiwe, mebiya' c'u k'ijilanic chque tak diosib.

³⁸ Masach ri c'ulwächinic pa i jolom ri nu banom iwuc', mawi mebiya' k'ijilanic chque tak diosib,

³⁹ xane' xuwi chwe in, ri Ajawaxel ri i Dios, quixinwesaj c'u na pa qui k'ab tak ri e i c'ulel.”

^40-41 E are c'u we nimak tak tinimit ri', man xquiya' ta qui xiquin che ri xbix chque, xane' are xquitakej qui banic ri e qui nak'atisabal nabe; xukuje' caquiya' c'u k'ijilanic che ri Ajawaxel, xukuje' qui takem qui k'ijilaxic tak ri e qui diosib. Xukuje' tak ri e quija'lil xquitakej qui banic quech ri xequiban ri e qui mam, c'ä je c'u cäquiban camic.