Ucab Ajawinelab 16 - Quiché Bible

Ri rajawinic ri Acaz pa Juda

¹ Pa ri uwuklajuj (17) junab ri rajawinic ri Pek, u c'ojol ri Remaliy, xuchaplej ajawinic ri Acaz, u c'ojol ri Jotam, ajawinel pa Juda.

² Juwinak (20) u junab xuchaplej ajawinic, waklajuj (16) junab c'ut xajawin pa Jerusalen; man e suc' ta c'ut ri e u banoj chuwäch ri Ajawaxel Dios, jacha' ri xuban ri David ri u mam,

³ xane' are xutakej u banic ri xquiban tak ri ajawinelab re Israel, c'ä xuporoj c'u ne ri u c'ojol xuchi'j che tabal tok'ob, jacha' ri itzel qui nak'atisabal ri itzel tak winak ri xeburokij bic ri Ajawaxel chquiwäch ri aj israelib.

⁴ Xebuchi'j c'u ne tabal tak tok'ob xukuje' xuporoj c'u c'oc' tak k'ol paquiwi' tak ri quek'ijilax wi diosib, paquiwi' tak ri juyub xukuje' chquixe' tak che' ri k'eku'm qui xak.

⁵ Pa ri k'ijol ri', ri Rezin, ajawinel re Siriy, xukuje' ri Pek, ri u c'ojol ri Remaliy, ajawinel re Israel, xebe chusuq'uil ri Jerusalen che u banic ch'o'j ruc'. Xquisutij rij ri Acaz, man c'u xecuin ta che u ch'äquic ri tinimit.

⁶ Are' c'u ri ajawinel re Edom xuch'äc ri tinimit Elat; xebopan c'ut ri aj Edom, aretak e besatajinak chi bic ri aj Juda cumal xejeki' can chila' c'ä camic.

⁷ Are' c'u ri Acaz xebutak bic tako'n ruc' ri Tiglat-pileser, ajawinel re Asiriy, rech quequibij che, ri xubij bic: “We pataninel ech la ri' jacha' jun c'ojol la. Rumal ri' chpet la che nu to'ic chinesaj la pa u k'ak' ri ajawinel re Siriy xukuje' pa u k'ab ri ajawinel re Israel, ri cätajin quech'ojin wuc'.”

⁸ Ri Acaz, xumajij ri sak puak xukuje' ri k'an puak ri c'o chupam ri rachoch ri Ajawaxel xukuje' ri k'inomal ri c'o chupam ri rachoch ri ajawinel, xebutak bic wa' jacha' jun sipanic che ri ajawinel re Asiriy,

⁹ ri xunimaj u tzij xwalij c'u che u banic ch'o'j ruc' ri Damasc, xcuin c'u che u ch'äquic, xeresaj c'u na bic ri winak ri e c'o chupam, xebutak c'u bic pa Kir xucämisaj c'ut ri Rezin.

¹⁰ Aretak c'u xbe ri ajawinel Acaz pa Damasc che u rikic rib ruc' ri Tiglat-pileser, ajawinel re Asiriy, xril ri porobal ri c'o chi'. Xutak bic jun u wächbal ri porobal ruc' tz'akatil che ri cojol tabal tok'ob Uriy,

¹¹ xuban c'ut jun porobal ri Uriy are c'u xutakej ri u cholajil ri u banic ri xtak u bixic che rumal ri ajawinel Acaz aretak c'o pa Damasc, tz'akatinak chi c'ut aretak xtzelej ulok ri Acaz pa Damasc.

¹² Aretak c'u xopan ri ajawinel u petic pa Damasc xucaye'j c'ut ri porobal, xkeb ruc' xuchi'j c'u tabal tok'ob ri cächajirisaxic puwi';

¹³ xuporoj junam c'u xuban che jas ri xban che ri sipanic quech c'äj, xujamij c'ut ri u sipanic re u wa'l uva puwi' ri porobal, xukuje' xuchicoj ri qui quiq'uel ri e tabal tak tok'ob re utzirisan ib.

¹⁴ Are c'u ri porobal re k'an ch'ich' ri c'o chuwäch ri rachoch ri Ajawaxel, xresaj ri Acaz xresaj chupam ri u c'olbal xuya' pa ri u mox ri porobal, canajinak c'u can chuxo'l ri u porobal ruc' ri rachoch ri Ajawaxel.

¹⁵ Xuya' c'u na takanic che ri cojol tabal tok'ob ri Uriy chi puwi' ri nimalaj porobal cäporox wi na ri tabal tok'ob ri cachajirisaxic re ak'abibal xukuje' ri sipanic que tak c'äj re benak k'ij, xukuje' jacha' ri u tabal tok'ob ri ajawinel ri cächajirisaxic xukuje' ri sipanic quech tak c'äj rech ri ajawinel, xukuje' ri tabal tok'ob ri cachajirisaxic xukuje' tak ri sipanic que tak c'äj xukuje' ri rech ri u wa'l uva rech ri tinimit chnimalaj ronojel. Xukuje' xubij che chi chuchicoj conojel ri qui quiq'uel ri tabal tok'ob ri quechajirisaxic xukuje' ri quech ri tabal tak tok'ob, are c'u ri porobal re k'an ch'ich' cäcanaj wa' xuwi che tz'onobal u no'j ri ajawinel che ri Ajawaxel.

¹⁶ Ri Uriy, cojol tabal tok'ob, xuban ronojel ri xtak che u banic rumal ri ajawinel Acaz.

¹⁷ Ri Acaz xeburamij tak ri k'atibal ri e c'o chquixo'l tak ri tac'alibal xresaj ri nimalaj c'olbal ja' ri c'o paquiwi' ri ama'ib tak wacax ri e re k'an ch'ich' ri qui tok'em, xuya' c'u puwi' jun lajom abaj.

¹⁸ Xa' c'u rech utz cäril ri ajawinel re Asiriy, xresaj ri tac'alibal ri c'o chupam ri rachoch ri Ajawaxel ri xban che ri k'ij re uxlanem, xukuje' ri oquibal ri c'o chrij ri xuwi cacojow ri ajawinel.

¹⁹ Ri u tz'akatil ri u tzijobelil ri Acaz xukuje' ronojel ri xubano, tz'ibatal chupam ri wuj rech ri qui tzijobelil tak ri ajawinelab pa Juda.

²⁰ Aretak xcämic, xmuk cuc' ri e u mam chupam ri u Tinimit ri David, are chi c'u xajawin ri u c'ojol chupam ri u c'olbal, ri Ezequiy u bi'.