Ucab Ajawinelab 14 - Quiché Bible

Ri rajawinic ri Amasiy pa Juda

¹ Pa ri ucab u junab re ri rajawinic ri Joas, u c'ojol ri Joacaz, ajawinel re Israel, ri Amasiy u c'ojol ri Joas, xuchaplej ajawinic pa Juda.

² Ri Amasiy juwinak job (25) u junab aretak xuchaplej ajawinic, juwinak belejeb (29) junab c'ut xajawin pa Jerusalen. Ri u nan Joadan u bi', aj Jerusalen.

³ Ri e u banoj tak ri Amasiy e suc' chuwäch ri Ajawaxel, man kas ta c'u je jacha' ri xuban ri David ri u mam. Xak c'u junam xubano jas ri xuban ri Joas ri u tat,

⁴ man c'u xebesax taj ri c'olbal ri quek'ijilax wi ri diosib, ri xequitakej wi qui chi'xic tabal tak tok'ob ri tinimit xukuje' qui poroxic c'oc' k'ol.

⁵ Aretak xurik u chuk'ab ri Amasiy pa ri takanic, xebucämisaj conojel ri e qui nimakil ajch'ojab ri xecämisan ri u tat.

⁶ Man c'u xebucämisaj taj ri e qui c'ojol tak ri cämisanelab, je c'ut, jas ri tz'ibatal chupam ri u pixab ri Moises, ri Ajawaxel xuya' takanic: “Ri tataxelab man cuya' taj quec'okox che cämical u mac rech ri qui banom ri e qui c'ojol, mawi ri c'ojolaxenlab rumal rech ri qui banom ri e qui tat, xane' chquijujunal quecäm na rumal ri kas qui mac.”

⁷ Ri Amasiy are' ri xecämisan ri lajuj mil aj edomib pa ri Beya' re Atz'am xuch'äc c'ut ri Sel, xucoj c'u Jocteel che u bi', are c'u u bi' c'ä camic.

⁸ Oc'owinak chi c'u wa', xutak bic jun wuj ruc' ri Joas, u c'ojol ri Joacaz ri' u mam ri Jehu, ajawinel re Israel, ri xubij bic: “Tasaj, cakaca'yej c'u na ri ka palaj.”

⁹ Ri Joas je xutzelej bic u bixic wa' che: “Ri quiäkwok' xutak u bixic che ri chacalte' ri co pa ri Libano: ‘Chaya' ri a mia'l che ri nu c'ojol, rech cux rixokil.’ Xoc'ow c'ut jun juyubal awaj chila' xuxak'alej c'u can ri quiäkwok'.

¹⁰ Quinya' a k'ij chi xebach'äc ri aj edomib, are c'u cäbanow wa' chawe chi caban nimal. Utz ri', chana' awib chi nim a banic; are c'u utz na chi chatcanaj chupam ri awachoch. ¿Jasche are cawaj cac'am ulok u q'ueyowal pawi' xukuje' ri u q'ueyowal puwi' ri Juda?”

¹¹ Man c'u c'o ta xubij u c'u'x ri Amasiy che ri xbix che. Xwalij c'ut ri Joas che u banic ch'o'j ruc' ri Amasiy, pa Bet-sems, ri c'o pa ri rulewal ri Juda.

¹² Xch'äc c'ut ri juda rumal ri Israel, chquijujunal c'ut xebanimajic xebe cho tak cachoch.

¹³ Ri Joas, ajawinel re Israel, xuchap ri Amasiy pa Bet-sems, ajawinel re Juda, xbextax c'ut pa Jerusalen, ri xuworo' jun c'op che ri nimalaj tapia re quieb sient ruc' juwinak bara' (220), kas ruc' ri Oquibal aj Eprain c'ä ruc' ri Oquibal pa ri Xquina.

¹⁴ Xuban c'u rech che ronojel ri k'an puak ri sak puak xukuje' conojel ri jastak ri e c'o chupam ri rachoch ri Ajawaxel xukuje' ri k'inomal ri c'o chupam ri rachoch ri ajawinel. Aretak c'u xechaptaj bic jujun winak rumal, xtzelej pa Samar.

¹⁵ Ri u tz'akatil ri u tzijobelil ri Joas xukuje' ri xubano, xukuje' tak ri e u mayibalil xukuje' ri ch'o'j ri xuban ruc' ri Amasiy, ajawinel re Juda, tz'ibatal chupam ri wuj quech tak ri ajawinelab re Israel.

¹⁶ Aretak xcämic, xmuk pa Samar cuc' tak ri ajawinelab re Israel. C'äte c'u ri xajawin ri Jeroboam (ri u c'ojol) pa ri u c'olbal.

¹⁷ Ri Amasiy, ri u c'ojol ri Joas ajawinel re Juda, xc'asi' na canok olajuj (15) junab chwi' ri u cämical ri Joas, u c'ojol ri Joacaz ajawinel re Israel.

¹⁸ Ri u tz'akatil ri u tzijobelil ri Amasiy tz'ibatal chupam ri wuj rech ri qui tzijobelil tak ri ajawinelab re Juda.

¹⁹ Xquiwalijisaj c'u quib ri winak pa Jerusalen chrij ri Amasiy rumal ri' xanimajic xbe pa Lacs; xterenex c'u bic pa ri tinimit, chila' c'u xcämisax wi.

²⁰ Xc'am c'u ulok chrij jun quiej xmuk c'u pa Jerusalen cuc' ri e u mam, pa ri u Tinimit ri David.

²¹ Ronojel c'ut ri tinimit re Juda xumajij ri Azariy, xuban c'u ajawinel che che u q'uexwäch ri Amasiy ri u tat. Waklajuj c'ut u junab ri Azariy,

²² are' c'u wa' ri, chwi' ri u cämical ri u tat, xuban u banic ri tinimit Elat xutzelej c'u pa u k'ab ri Juda.

Ri rajawinic ri ucab Jeroboam pa Israel

²³ Pa ri olajuj junab ri rajawinic ri Amasiy, u c'ojol ri Joas, ajawinel re Juda, ri Jeroboam, u c'ojol ri Joas, ajawinel re Israel, xuchaplej ajawinic pa Israel, cawinak jun (41) junab c'ut xajawin pa Samar.

²⁴ Are c'u xuban ri etzelal chquiwäch ri e u bak'wäch ri Ajawaxel, man xutas ta c'u rib mawi che jun chque ri macaj ri xuban wi ri Jeroboam ri u c'ojol ri Nabat, ri xbanowic chi xemacun ri Israel.

²⁵ Ri Jeroboam xebujekeba' chi jumul ri e u c'ulbatil ri Israel, kas pa ri oquibal re Hamat c'ä chuchi' ri plo Araba, je jas ri u yo'm u bixic ri Ajawaxel, ri u Dios ri Israel, rumal ri Jonas ri pataninel rech, u c'ojol ri Amitay, k'axal tzij aj Gat-heper.

²⁶ Rumal rech chi ri Ajawaxel xrilo ri c'ayilaj rikoj c'ax ri u rikom ri Israel, ri man c'o ta jun chque ri ma ta u rikom rech, man c'o ta c'u jachin jun ri cäyo'w ta to'banic che ri Israel.

²⁷ Xebuto'tajisaj c'ut rumal ri Jeroboam, u c'ojol ri Joas, c'ä maja' c'u cuchomaj u chupisaxic ri u bi' ri Israel cho ri uwächulew.

²⁸ Ri u tz'akatil ri u tzijobelil ri Jeroboam xukuje' ronojel ri xubano, xukuje' tak ri e u mayibalil xukuje' tak ri ch'o'j ri xebubano, ri xuban che u tzelexic ri Damasc xukuje' ri Hamat pa u k'ab ri Israel, tz'ibatal chupam ri wuj rech ri qui tzijobelil tak ri ajawinelab re Israel.

²⁹ Aretak xcäm ri Jeroboam, xmuk cuc' tak ri ajawinelab ri xebajawin pa Israel. Are c'u xajawin na ri Zacariy (ri u c'ojol) pa ri u c'olbal.