Ucab Ajawinelab 13 - Quiché Bible

Rajawinic ri Joacaz pa Israel

¹ Pa ri juwinak oxib u junab ri rajawinic ri Joas pa Juda, u c'ojol ri Ocoziy, ri Joacaz, u c'ojol ri Jehu, xuchaplej ajawinic pa Israel, wuklajuj junab c'ut xajawin pa Samar.

² Man e utz ta c'ut ri e u banoj ri xebuban chuwäch ri Ajawaxel, xebuban c'ut ri e junam tak macaj, ri xbanowic chi xemacun ri e aj Israel rumal ri Jeroboam, u c'ojol ri Nabat, man xutanaba' ta quibanic.

³ Rumal c'u ri' xnicow ri royowal ri Ajawaxel chrij ri Israel, q'ui c'u k'ijol xebujach pa u k'ab ri Hazael ajawinel re Siriy, xukuje' pa u k'ab ri Ben-adad, ri u c'ojol.

⁴ Ri Joacaz xuban ch'awem ruc' ri Ajawaxel xc'amowax c'ut ri u ch'awem ri xuban ruc' ri Ajawaxel, rilom c'ut ri c'ax ri cätajin cuban ri ajawinel re Siriy chque ri aj israelib.

⁵ Xuya' c'ut ri Ajawaxel jun torol quech ri e aj Israel, xetorotaj c'ut ri aj israelib pa u k'ab ri Siriy xejeki' chi c'u jumul pa utzil pa tak ri cachoch, jacha' ri nabe canok.

⁶ Man c'u xquitanaba' ta c'u quibanic ri macaj ri xequiban ri e rija'lil ri Jeroboam ri xbanowic chi xemacun ri e aj Israel, xane' xquitakej c'u macunic. Ri u wächbal ri Asera xutakej c'olem pa Samar.

⁷ Ri Joacaz man e c'o ta chic rajch'ojab xecanajic xak xuwi cawinak lajuj (50) ajch'ojab ajquiejab, lajuj carwaj re ch'o'j xukuje' lajuj mil ajch'ojab ri xak quebin chi cakan, rumal rech chi ri ajawinel re Siriy xuq'uistzij paquiwi' xebuc'äjij.

⁸ Ri u tz'akat ri u q'uisbalil ri u tzijobelil ri Joacaz xukuje' ronojel ri xubano, xukuje' tak ri e u mayibalil, e tz'ibatal chupam ri wuj rech ri qui tzijobelil tak ri cajawinelab ri Israel.

⁹ Aretak xcämic, xmuk pa Samar. Are xajawin na ri Joas pa ri u c'olbal ri u c'ojol.

Ri rajawinic ri Joas pa Israel

¹⁰ Pa ri juwinak wuklajuj junab ri rajawinic ri Joas, ajawinel pa Juda, ri Joas, u c'ojol ri Joacaz, xuchaplej ajawinic pa Israel, waklajuj (16) junab c'ut xajawin pa Samar.

¹¹ Man e utz ta c'ut ri e u banoj ri xebuban chuwäch ri Ajawaxel, man xutanaba' ta c'u quibanic ri macaj ri xuban ri Jeroboam ri u c'ojol ri Nabat, ri xbanowic chi xemacun ri aj Israel, xane' xutakej u banic rech.

¹² Ri u tz'akatil ri u tzijobelil ri Joas xukuje' ronojel ri xubano, xukuje' tak ri e u mayibalil, xukuje' ri xuban che u tijic u chuk'ab ruc' ri Amasiy, ajawinel re Juda, tz'ibatal chupam ri wuj rech ri qui tzijobelil tak ri rajawinelab re Israel.

¹³ Aretak xcäm ri Joas, xmuk pa Samar cuc' ri cajawinelab ri e aj Israel. Are' chi c'u xpaki' ri Jeroboam pa ri tem re ajawibal.

Q'uisbal k'alajisanic xukuje' ri u cämical ri Elisey

¹⁴ Xkaj c'u ri Elisey che jun yabil re cämical, ri Joas rajawinel ri Israel xbe che rilic, xok'ic xulak'apuj c'ut, je xubij wa': “¡Nu tat, nu tat, lal uxinak c'u che ri Israel jacha' jumulaj cowilaj tak ajch'ojab!”

¹⁵ Ri Elisey xubij che: “C'ama' la jun q'uiakbal ch'ab xukuje' jujun tak ch'ab.” Ri ajawinel xuc'am jun q'uiakbal ch'ab xukuje' jujun tak ch'ab.

¹⁶ Xubij c'ut ri Elisey che: “Suc'umaj ib la che u q'uiakic jujun ch'ab.” Aretak cätajin cuban ri ajawinel wa', ri Elisey xebuya' ri u k'ab puwi' ri e u k'ab ri ajawinel

¹⁷ xubij c'u che: “Jaka' la ri wenta'n ri cäca'y pa ri elebal k'ij.” Ri ajawinel xujako, ri Elisey xuya' takanic che: “¡Q'uiakan c'u la!” Ri ajawinel xuq'uiak ri ch'ab. Xurak c'u u chi' ri Elisey: “¡Ch'ab u to'tajisanel ri Ajawaxel! ¡Ch'ab to'tajisanel cuc'ulelaj ri Siriy! ¡Lal quebech'äc na la ri aj siriyab pa Apec, caq'uis c'u na la tzij paquiwi'!”

¹⁸ Xubij chi c'u che ri ajawinel: “Chec'ama' tak la ri ch'ab.” Aretak xebuc'am ri ajawinel, ri Elisey xuya' takanic che: “Soco' la ri ulew.” Ri ajawinel oxmul xusoc ri ulew, xuk'il c'u rib.

¹⁹ Ri k'axal tzij xoyowar ruc' xubij c'u che: “We ta omul o wakmul xsoc ta la ri ulew, xcuin ta la ri' che qui ch'äquic ri aj Siriy c'ä xq'uis ta na la tzij paquiwi'; are c'u ri camic xa' oxmul quech'äc na la.”

²⁰ Xcäm ri Elisey, xmuk c'ut. Chujunab c'ut quepe ri jutak k'at eläk'omab aj Moab caquimajij ri ulew,

²¹ c'o jumul e c'o jujun aj israelib cätajin caquimuk jun achi, aretak xtake qui wäch chi e petinak juk'at chque we eläk'omab ri', xquiq'uiak can ri cäminak chupam ri mukutal wi ri Elisey xebe c'ut. Xuwi c'u xut'inaxtaj tak rib ri cäminak ruc' ri u bakil ri Elisey, xc'astajic cätac'aq'uic xwalijic.

²² Ri Hazael, ajawinel re Siriy, xuc'äxc'obisaj ri Israel joropa' k'ij xc'asi' ri Joacaz.

²³ Xel c'u u c'u'x ri Ajawaxel chque xukuje' xutok'obisaj qui wäch, xa' rumal rech ri u c'ulwächinic xuban ruc' ri Abraham, ri Isaac xukuje' ri Jacob, xoc c'u il chque man xraj ta c'ut xusachisaj ta qui wäch mawi xeburokij ta bic chuwäch. Man u banom ta c'u c'ä camic.

²⁴ Aretak ri Hazael ajawinel re Siriy, xcämic, are' xajawin ri u c'ojol pa ri u c'olbal ri Ben-adad u bi'.

²⁵ Are' c'u ri Joas, u c'ojol ri Joacaz, xebutokij ri tinimit tak pa u k'ab ri Ben-adad ri xebutokij wa' pa ri ch'o'j che ri Joacaz, ri u tat. Oxmul c'ut xch'äcan ri Joas puwi' ri Ben-adad, xebutzelej chi c'ut ri tinimit tak re Israel.