Ucab Ajawinelab 12 - Quiché Bible

¹ Xc'ulmataj c'u wa' chu wukub junab ri rajawinic ri Jehu; cawinak (40) junab xajawin pa Jerusalen. Sibiy u bi' ri u nan, aj Beerseb.

² Ri e u banoj tak ri Joas ri xebubano e suc' chuwäch ri Ajawaxel, rumal rech chi xya' u no'j rumal ri Joiad, ri cojol tabal tok'ob.

³ Man c'u xebesax taj ri quek'ijilax wi ri diosib, ri xquitakej wi quichi'xic tabal tak tok'ob ri tinimit xukuje' xequiporoj wi c'oc' tak k'ol.

^4-5 C'o jun k'ij, xubij ri Joas chque ri e cojol tabal tok'ob: “Chimulij ix ronojel ri puak que ri sipanic ri quec'am ulok pa ri rachoch ri Ajawaxel, ri puak ri caquitoj ri winak chquijujunal xukuje' ronojel ri cuchuj ri caquic'am ulok ri winak xak pa quech wi chquijujunal chupam ri rachoch ri Ajawaxel. Chitaka' c'u u c'ojoxic ri e u rikom wi tak c'ax ri rachoch ri Ajawaxel.”

⁶ Xtz'akat c'u juwinak oxib junab ri rajawinic ri Joas, ri e cojol tabal tok'ob man qui c'ojom taj ri rachoch ri Dios.

⁷ Ri ajawinel Joas xusiq'uij ri cojol tabal tok'ob Joiad xukuje' ri niq'uiaj e cojol tabal tok'ob chic, xubij c'u chque: “¿Ri ix jasche man i c'ojom taj ri rachoch Dios? Camic cächaptaj bic man c'o ta chi puak quic'am pa qui k'ab ri c'olol tak puak; chijacha' c'ut ri c'o iwuc' che u c'ojoxic ri rachoch ri Dios.”

⁸ Ri e cojol tabal tok'ob xquinimaj chi man caquic'am ta chi ri puak pa qui k'ab ri winak, xukuje' chi man e are' ta chic ri quec'ojon ri rachoch Dios.

⁹ Ri cojol tabal tok'ob Joiad xuc'am jun caxa, xuwor jun jul puwi' ri tz'apibal rech, xuya' pa u wiquiak'ab ri porobal, jas ri u banom chupam ri rachoch ri Ajawaxel; ri e cojol tabal tok'ob ri quechajin ri oquibal chuchi' ri rachoch Dios caquiya' ronojel ri puak chupam ri queyok chupam ri rachoch ri Ajawaxel.

¹⁰ Aretak c'u caquilo chi q'ui chic ri puak ri c'o chupam ri caxa, copan ri rajtz'ib ri ajawinel rachil ri qui nimal ri e cojol tabal tok'ob cacajilaj c'ut ri puak ri caquirik chupam ri rachoch ri Ajawaxel; quequiya' c'ut chquipam jujun tak c'olbal,

¹¹ aretak c'u ajilatajinak chic, caquijach pa qui k'ab ri quetakan paquiwi' ri ajchaquib ri quechacun chupam ri rachoch Dios rech quequitoj tak ri ajanelab xukuje' ri c'amal tak qui be ri ajchaquib ri quebanow ri chac chupam ri rachoch ri Ajawaxel,

¹² xukuje' ri e yacal tak ja xukuje' ri e tzoc'ol tak abaj, rech quequilok' tak ri che' xukuje' tak ri abaj ri quetzoq'uic ri quebajwataj che u c'ojoxic ri rachoch Dios xukuje' chiquiya' ri cajwataj u sachic chupam ri rachoch Dios.

¹³ Ri puak ri' ri cac'am bic chupam ri rachoch ri Ajawaxel man quecoj ta che qui banic tak kumubal re sak puak, kopibal tak mecha, nimak tak lak, ri trompet tak o apachique niq'uiaj jastak chic re k'an puak re sak puak,

¹⁴ xane' cäjach pa qui k'ab ri e c'amal tak u be ri chac rech cäquiban u banic ri rachoch ri Ajawaxel.

¹⁵ Man c'u cäta' ta chque ri achijab ri cäjach ri puak pa qui k'ab che qui tojic ri ajchaquib joropa' ri caquisach che qui tojic ri ajchaquib ri quebanow ri chac, sibalaj c'u tz'akat u cojic ri puak cäquicojo.

¹⁶ Are' c'u ri puak ri quech tak ri sipanic u mac ri chak'maquil xukuje' u mac ri macaj man quec'am ta bic chupam ri rachoch Dios, xane' quech ri e cojol tabal tok'ob.

¹⁷ Pa ri k'ijol ri', ri Hazael, ajawinel re Siriy, xch'ojinic xutokij ri Gat xk'ax c'u pa u k'ab, xpe c'u che u banic ch'o'j ruc' ri Jerusalen.

¹⁸ Are' c'u ri Joas, ajawinel re Juda, xebumajij conojel ri chaconisan ri e qui tasom can tak ri ajawinelab che k'ijilanic ri Josapat, ri Joram xukuje' ri Ocoziy, ri xebajawin can nabe chuwäch puwi' ri Juda xukuje' xuc'am ri kas are' tasowinak, c'o chi c'u wi na ri' ronojel ri k'an puak ri xriktaj chupam ri rachoch ri Dios xukuje' ri c'o chupam ri rachoch ri ajawinel, ronojel c'ut xa' jun xuban che xutak bic che ri Hazael, xutanaba' c'ut u banic ch'o'j wa' ruc' ri Jerusalen.

¹⁹ Ri u tz'akatil ri u tzijobelil ri Joas xukuje' ronojel ri xubano, tz'ibatal chupam ri wuj rech ri qui tzijobelil tak ri ajawinelab pa Juda.

²⁰ Kas e are' ri e rach k'atal tak tzij xquiwalijisaj quib chrij, xquicämisaj c'u chupam ri nimalaj ja ri c'o pa ri xulanic ri cäbe pa Sila.

²¹ Je c'u ri', ri Josacar, u c'ojol ri Simeat, xukuje' ri Jozabad u c'ojol ri Gomer, e rach k'atal tak tzij, xquisoc che cämical, aretak c'ut xcämic xmuk pa ri u Tinimit ri David. Are c'u xajawin ri u c'ojol pa ri u c'olbal, ri Amasiy u bi'.