Ucab Ajawinelab 11 - Quiché Bible

Ri Ataliy cutokij ri tem re ajawibal

¹ Aretak ri Ataliy, ri u nan ri Ocoziy, xretamaj chi xcäm ri ral, xwalijic xebucämisaj conojel ri e rija'lil ri ajawinel.

² Are' c'u ri Josab, u mia'l ri ajawinel Joram rana'b c'ut ri Ocoziy, xuresaj ri Joas, u c'ojol ri Ocoziy, chquixo'l ri e u c'ojol ri ajawinel ri cätajin qui cämisaxic, xc'u' chuwäch ri Ataliy, rachil ri chajil re chupam jun warabal. Rumal c'u ri' man xcäm taj,

³ ri Joas wakib junab xc'u' chupam ri rachoch ri Ajawaxel. Pa tak ri k'ij ri xajawin ri Ataliy, puwi' ri ulew.

⁴ Pa ri uwuk junab, ri Joiad xutak qui siq'uixic ri e qui nimakil tak ri ajch'ojab, xukuje' ri aj sereteyib xukuje' ri chajinelab, xebucoj c'u chupam ri rachoch ri Ajawaxel, jawije' ri c'o wi. Chila' xuban wi jun c'ulwächinic cuc' chuxe' ri chi'nic ri kas cäban na, xuc'ut c'ut ri u c'ojol ri ajawinel chquiwäch.

⁵ Xuya' c'u takanic chque: “Are wa' ri quibana' ix: jun oxil cachajin chupam ri rachoch ri Ajawinel pa ri k'ij re uxlanibal;

⁶ jun oxil chic cac'oji' chuchi' ri oquibal re Xur; ri jun oxil chic cac'oji' chuchi' ri oquibal chrij ri ja ri e c'o wi ri chajinelab. Je c'u quiban wa' che u jachalalaxic iwib che u chajixic ri rachoch ri ajawinel.

⁷ Ri cak'at ri caquitanaba' chajinic pa ri k'ij re uxlanem, are' quebechajin chi chupam ri rachoch ri Ajawaxel, quec'oji chuxcut ri ajawinel.

⁸ Ri ix quicholajij iwib chrij ri ajawinel chijujunal chiwuc'aj ri i ch'ojibal pa i k'ab, jachin c'u ri cutijtobej roquic chixo'l, cäcäm na. Ix quixachilan na ri ajawinel apawije' ta ne ri cäbe wi.”

⁹ Ri e qui nimakil ri ajch'ojab xequiban conojel ri xetak che u banic rumal ri cojol tabal tok'ob ri Joiad. Chquijujunal xequic'am ri takanic paquiwi' tak ri cachijab, je xban chque ri queboc che chajinelab pa ri k'ij re uxlanem xukuje' ri quebelic, xebopan c'u chuwäch ri cojol tabal tok'ob Joiad.

¹⁰ Ri cojol tabal tok'ob xebujach ri tz'imaj tak ch'ich', ri quetecak tak ch'ich', pa qui k'ab ri e qui nimakil tak ajch'ojab ri e rech can ri ajawinel David, ri e c'o can chupam ri rachoch ri Ajawaxel.

¹¹ Ri chajinelab xec'oji' pa tak ri qui c'olbal, kas pa ri riquiak'ab c'ä pa ri u mox ri rachoch Dios, xukuje' chrij ri porobal, chquijujunal cuc'am ri qui ch'ojibal pa qui k'ab che u chajixic ri ajawinel.

¹² Xresaj c'u ulok ri Joiad ri u c'ojol ri ajawinel xucoj ri corona che ri u jolom xukuje' ri niq'uiaj wikbal chic che jun ajawinel, aretak c'u k'ijitajinak chic ri aseit puwi' ri u jolom xquiya' k'alajisanic chrij chi are' ajawinel. Conojel xquipak'apa ri qui k'ab xukuje' xquirakala' c'u qui chi': “¡Kaya' u k'ij ajawinel!”

¹³ Aretak ri Ataliy xuta' ri rakoj tak chi'aj cumal ri chajinelab xukuje' cumal ri winak, xoc chupam ri rachoch ri Ajawaxel, jawije' ri e c'o wi conojel.

¹⁴ Xca'y c'u apan che ri ajawinel, tac'al ruc' ri rakan ja, je jacha' ri nak'atisabal. E c'o c'ut ri c'amal tak be pa tak u xc'ut xukuje' e c'o ri juk'at ajk'ojomab, sibalaj cätajin quejajat tak ri winak cätajin quecok'esaj trompet. Ri Ataliy xujis ri ratz'iak chrij, xurak c'u u chi': “¡Man kas ta ix jic! ¡Man kas ta ix jic!” xcha'.

¹⁵ Are' c'u ri cojol tabal tok'ob ri Joiad xuya' takanic chque ri e quinimakil ri ajch'ojab ri quetakan paquiwi' ri ajch'ojab: “¡Chiwesaj bic chquixo'l ri winak, jachin c'ut ri caterenem bic chucämisaj chi ch'ich'!” U yo'm c'u takanic ri Joiad chi man cacämisax ta chupam ri rachoch ri Ajawaxel,

¹⁶ xquichapo xquesaj bic pa ri coquibal tak ri quiej chupam ri rachoch ri ajawinel, chila' c'u xquicämisaj wi.

¹⁷ Ri Joiad xuban c'u na jun c'ulwächinic ruc' ri Ajawaxel, ri ajawinel xukuje' ri tinimit, chi ri e are' xquicoj quib chuxe' chi quebux u tinimit ri Ajawaxel, ri ajawinel xukuje' ri tinimit.

¹⁸ Xebe c'u conojel chupam ri rachoch ri Baal xquikasaj c'u pa ulew, xequic'äjij tak ri porobal ri e c'o chupam xukuje' tak ri e diosib. Are c'u ri Matan, ri cojol tabal tok'ob, xk'at ri u kul chquiwäch ri porobal. Chuq'uisbalil, ri cojol tabal tok'ob xucoj juk'at chajinelab chupam ri rachoch ri Ajawaxel;

¹⁹ xebuc'am c'ut ri e qui nimakil tak ri ajch'ojab, ri aj sereteyib ri chajinelab xukuje' conojel ri winak, junam xcachilaj bic ri ajawinel kas pa ri rachoch ri Ajawaxel c'ä pa ri rachoch ri ajawinel, xeboc pa ri oquibal jawije' e c'o wi ri chajinelab. Ri Joas xt'uyubax puwi' ri tem re ajawibal,

²⁰ ronojel c'ut ri tinimit xquicotic. Cämisatajinak chi c'ut ri Ataliy chi ch'ich' re ch'o'j chupam ri rachoch ri ajawinel, ri tinimit xjeki' pa utzil.

Ri rajawinic ri Joas pa Juda

²¹ Wukub u junab ri Joas aretak xuchaplej ajawinic.